تجربتى مع زيت XADO مع مجموعه مرممات الماتور والفتيس موضوع طويل الامد حصرى على مصر موتورز

[sayed2077]

السلام عليكم ورحمة الله وبركاته

--اولا وقبل اى شىء هذا الموضوع كل الكلام اللى فيه حدث
وحقيقى والله عز وجل يشهد على صدق كل كلمه اكتبها لكم
وانها تجربه بكل حياديه وامانه ويشهد الله على ما اقول--

طبعا كله عارف انى لسه عامل نص عمره لماتور الاكسيل وطبعا صوت الماتور كان وحش جدااا وكان لازم اغير زيت التعاون اللى انا حطه فى العمره ده علشان صوت الماتور مش عاجبنى

المهم من حوالى اربعة ايام اتصل بيا صديق عزيز جداااا وبلغنى على انه معاه منتجات لشركة XADO ومنها مرممات الماتور وهو عارف انى لسه معمر فكلمنى علشان يدينى مجموعه مرممات الماتور طبعا انا هشرح كل حاجه بعدين بس كل حاجه هتيجى بالتتابع المهم قالى لو عاوز زيت انا معايا قولته اه فعلا انا محتاج زيت للماتور علشان وبعدين اتكلمنا شويه وقولتله انى هركب اسطوانه ودسك للعربيه وبالتالى هفضى زيت الفتيس وهحط زيت فتيس جديد فلقيته قالى ان معاه كمان جيل XADO لترميم الفتيس وبعد محادثه طويله اتفقنا على ميعاد محدد علشان اخد منه الاشياء التالية مجانا على سبيل التجربه ثم عرض تجربتى على مصر موتورز امامكم

1:زيت ماتور XADO HOT ROAD
20w -50
API-L
الزيت ده مكافىء لزيت شل هيلكس الاصفر 5000

2:مجموعة مرممات XADO للموتور لما بعد العمره عباره عن ثلاث انابيب جيل وهشرح كل حاجه عنه بعدين

3:انبوبه XADO لترميم الفتيس

طبعا بعد نهاية المحادثه دخلت قريت عن شركة XADO وفهمت فى الاخر ان الشركه ديه شركة اوكرانيه قعدت تعمل ابحاث لمده يجى 20 سنه فى حاجه او تكنولوجيا جديده ايه هى
التكنولوجيا ديه اسمها Revitalization ايه يا عم الحج التكنولوجيا ديه بص يا حج كلنا عارفين ان الماتور من الشغل بتاعه بيفضل يعمل خدوش فى الجسم بتاعه من جوه ومع الزمن الماتور بيفوت وبيبوظ والمكان بتاع البساتم بيوسع قام الناس ديه قعدت 20 سنه بتفكر ازاى نملى الخدوش بحاجه زى ماده كده تحافظ على الماتور لاقصى وقت ممكن جم قالوا نعمل جزيئات ماده بتكنولوجيا الميكرو حاجه دقيقه جداااا علشان اول ما تلاقى خدوش فى جسم الماتور تقوم تملى الخدوش ديه وكل الثغرات اللى فى الماتور تتسد عملوا كدا فعلا بس اكتشفوا ان حجم الجزيئات الميكرو كبير ومش بيؤدى الغرض المطلوب منه 100% طيب راحوا شغالين تانى وقالك نعمل جزيئات الماده ديه بحجم النانو النانو ده اصغر بكتير من المايكروا وعلشان احاول اوضح لكم النانو ده اد ايه مثلا لو جبنا جزىء نانو وحطيناه على راس دبوس هيبقى الامر عامل بالظبط كانك جبت زلطه وحطيتها فوق الكره الارضيه متخيل بقى حجمه صغير اد ايه وشوف انت بقى الزلطه الصغيره ديه واخده حجم اد ايه من الكره الارضيه طبعا يعتبر مش موجوده اساسا
نفس الشىء بقى مع جزيئ النانو لو حطيناه على راس دبوس كانك محطيتش حاجه اساسا على راس الدبوس ده المهم لما عملوا الجزيئات اللى عاوزينها تملى الخدوش اللى فى الماتور جوه بحجم النانو طبعا الموضوع نجح لان النانو بيملى بنجاح اى خدوش فى الماتور لصغر حجمه المتناهى الصغر
وفعلا الماده ديه بتكون طبقه على اجزاء الموتور من جوه عباره عن سيراميك ومعدن (طبعا مش سراميك البيت ) على كل جسم الماتور من جوه بتخلى سطح الماتور اقوى 10 مرات من الحديد اللى متصنع منه الماتور بالتالى بيستحمل الاحتكاك اكتر والشغل اكتر لدرجة انك لما تستعمل مادة المرمم ديه فى الماتور بتاعك مفعولها بينتهى بعد 100 الف كلم تخيل مدى صلابتها انها تستحمل 100 الف كلم شغل

المهم شركة XADO ديه بعد الابحاث يجى عشرين سنه واخيرا نجحوا فى انتاج الماده ديه راحوا اخدوا موافقات دوليه من معامل ومختبرات كتير اووى من اغلب دول العالم المتقدم اللى شهد لهم بالنجاح وخلاص اول ما اخدوا كل الشهادات الدولية ديه بدئوا الانتاج الفعلى لمنتجات الزيوت وزيوتهم بتمتاز بانها بتحتوى مادة المرمم اللى بترمم الماتور من جوه و ايضا انتاج مواد الترميم للماتور والفتيس والكارونه

مع العلم ان شركة XADO ديه شركة اساسا اوكرانيه وبتنتج كل المنتجات بتاعتها فى اوكرانيا ما عدا زيوت السيارات بتنتج فى هولندا

وده كان خلاصه ما اعرفه عن شركة XADO ...

جه تانى يوم بعد المحادثه اللى بينى وبين صديق وفعلا بعد الافطار اتقابلنا وادانى الاشياء اللى اتفقنا عليها

واول ما روحت البيت روحت مصور الحاجه اللى ادهانى علشان اوريهالكم فى التقرير ده ان شاء الله

ديه اول حاجه زيت XADO
HOT ROAD
لزوجه 20w-50
مكافىء لزيت شل هيلكس الاصفر 5000 كلم
والزيت ده مضاف اليه مادة الترميم بتاعت الماتور
والزيت ده هولندى الصنع




وديه صورة مجموعه مرممات الموتور
عباره عن ثلاث انابيب كل انبوبه حجمها 9 مل بتتحط على غيار الزيت الجديد وبعد 200 كلم تحط الانبوبه التانيه وبعد 200 كلم كمان تحط الانبوبه الثالثه وبعدين تفضل ماشى على الزيت اللى انت حطه ده اقل حاجه 1500 كلم علشان يكون ماده المرمم ديه اتمت ترميم الموتور بكفائه واوعى ترمى الزيت قبل كده طيب مثلا انت حاطط زيت 5000 وعملت اول 1500 كيلو ومش عاوز ترمى الزيت احب اقولك مش فارقه كمل ال 5000 بتوع الزيت عادى متقلقش هو كان اهم حاجه انك متغيرش الزيت قبل 1500 كلم علشان مادة الترميم تكون مليت كل الخدوش اللى جوه الماتور

طيب واحد بيسئلنى وانا سامعه بيقول هو الماده ديه بتتحط على المواتير اللى عاوزه عمره ولا ايه اقوله لا بالنسبه للثلاث انابيب دوول فافضل وضع تحطهم فيهم ان مثلا واحد ماتور عدى اول 100 الف كلم واول 100 الف كلم دول احسن فتره فى حياه اى موتور بعد كدا الماتور بيبداء كفائته تقل ساعتها تقدر تحط مجموعة ترميم الماتور المكونه من ثلاث انابيب ديه علشان ترجع للماتور كفائته تانى ل 100 الف كلم كمان او مثلا انت واحد لسه معمر ماتورك او عامل نصف عمره برضوا لما احنا بنعمل العمره الماتور مبيكونش بكفائه 100% فبرضوا ممكن نحطله الماده ديه علشان يرفع كفائة الماتور تانى ويخليه يرجع لايام الشباب من جديد







وديه ميدلية هديه مع مجموعه مرممات الموتور

طيب واحد بقى ماتوره خفيف وبياكل فى زيت وطالع عينه ساعتها مينفعش يحط المجموعه ديه لان الوسع و الخلوصات جوه كبرت اووى لدرجه انك مبقاش ينفع خلاص موضوع الترميم ده لان خلاص كدا عمر الماتور الافتراضى خلص اساسا بس فيه جل من الشركه ديه بتبقى علبه واحده بس 9 مل تمنها اغلى من مجموعة الترميم المكونه من ثلاث انابيب مكتوب عليها انها للماتور الخفيف فقط ومبتتحطش للمواتير الكويسه

ديه بقى صورة جيل المرمم بتاع الفتيس والكارونه وطبعا برضوا بيتحط لفتيس حالته كويسه كل اللى بيعمله انه بيعلى كفائة الفتيس او الكارونه تانى بس مش معنى كده انك تحطه لفتيس طالع عينه او كارونه اصلا ماتت من زمان ونقول ده هيصلحها لا هو بيتحط لفتيس او كارونه كفائتهم اقل حاجه 70% مثلا ويحاول يرفع كفائتهم ل 90 -95 % تانى بس مش مثلا فتيس ولا كارونه كفائتهم 30-40 % يعنى ماتور قبل كدا مرتين ونيجى نحطهم وننتظر انه يصلحهم تانى وبرضوا المرمم ده عبارة عن انبوبه حجمها 9 مل و بتحطها فى الفتيس او الكارونه مع الزيت ولازم مترميش الزيت ده قبل ما تعمل 1500 كيلو ولو عاوز تقعد اكتر بالزيت براحتك بس مترميش الزيت قبل 1500 كلم



وديه شوية ملصقات وكده اخدتهم من صديقى



طبعا تانى يوم روحت اشتريت دسك واسطوانه للعربيه

واشتريت زيت فتيس موبيل من البنزينه لزوجته متعدده الدرجات 87w-140

وروحت على الميكانيكى غيرنا الدسك والاسطوانه وبعدين كان الفتيس فاضى زيت طبعا حطينا الزيت الجديد وفوقيه عبوه المرمم بتاعت الفتيس ديه و كده خلصنا الفتيس بعدين

نزلنا زيت الماتور وحطينا عبوه زيت الماتور و دورنا الماتور 5 دقايق وبعدين حاطينا انبوبه مرمم الماتور وكده فاضل معايا انبوبتين كمان هحطهم اول واحده بعد 200 كيلو والتانية بعد 200 كيلو كمان

نيجى بقى انا دلوقت عداد العربيه عامل 158 الف كلم بالظبط

عملت 50 كلم زياده بس بعد ما حطيت الزيوت سواء ماتور او فتيس

نيجى بقى للملاحظات اللى انا ملاحظها فى اول 50 كلم

بالنسبه للموتوور ففعلا حاليا صوت الماتور بقى هادددددى جداااا وبقى تجميعه على السرعه افضل بكتير وبمراحل عن زيت التعاون القديم ال 1000 كلم فعلا حسيت انى حاطط بلسم مش زيت ماتور

بس برضوا ده لسه تقيم مبدئى يعنى لسه هسافر ان شاء الله فى العيد ولما ارجع اقولكم اخبار الاداء على الطريق ان شاء الله

نيجى بقى للفتيس الفتيس عندى فيه صوت ونه كده عند سرعه 70-80 بس قبل وبعد السرعه ديه مفيش ونه انا شايف ان الونه قلت شوية بس مازالت موجوده برضوا بس برضوا انا كل اللى عملته 50 كلم متر ولازم استنى 1500 كيلو علشان مفعول المرمم سواء للماتور او للفتيس يكون اشتغل تمام على الاخر

طبعا الموضوع ده طويل الامد يعنى التجربه مستمره ان شاء الله لغاية حتى بعد ما اخلص ال 5000 بتوع الماتور وبما انى انا من الناس اللى بعمل كيلومترات قليله اوووى قبالتالى قدامى بتاعى 4 -6 شهور علشان اقول التجربه ديه للاخر خالص
فبالتالى الموضوع ده متجدد دائما ان شاء الله لغاية ما نقول خلاصه التجربه والقول الحق فى الزيت ده والمرمم
ونقول اخبار كل حاجه بصدق تام ان شاء الله

واتمنى ان الموضوع يكون عاجبكم ان شاء الله
و
اللهم اغفر للمؤمنين والمؤمنات والمسلمين والمسلمات الاحياء منهم والاموات
و
السلام عليكم ورحمة الله وبركاته

[Hisham.Elgazzar]

ربنا يوفقك بإذن الله
انا هحاول أجرب زيت الموتور
ويفضل اول 1500 متقرصش على العربية بردو
ومتابع معاك

[ramy safwt]

بص بقى سلام عليكم فى الاول


موضوع ان زيت يتحط مكان زيت الواحد متعود على شيل هيليكس بالنسبالى و ربنا يسترها معاه

موضوع الانابيب الثلاثة و استخدام تقنيات النانو تكنولوجى ده سليم مية فى المية فى مواد و طلاءات اساسا بتستخدم مع اى محرك احتراق داخلي و حتى فى سبائك المفاعلات الاندامجية من جوه و بتفضل محافظه عليها سنين طويلة و وظيفتها الاساسية مش ملئ الفراغات انما تكوين طبقة نانومترية من البلورات تغلف الجسم كله و تقدر تتحمل الضغط والحرارة لحد معدل معين اتصممت ليه

اتوقع انه يكون فى انابيب لسعات لترية مختلفة اذا كانت الشركة فعلا فكرت بالمستوى اللى قعد 20 سنة ابحاث مع ان فى براءات اختراع كتيرة لمواد و طلاءات كده و موجوده فى السوق بره

نفس الكلام بخصوص انبوبة الفتيس تغلف مش بتملاء

مهم جدا اذا كنت ناوى تبيع او توزع كميات اننا نعمل شوية تجارب اختبار و نحط نتائجها على النت

زى مثلا اننا نصور دية على ميكروسكوب الكترونى عندى او اى معمل ترتضيه و نشوف تركيبة ده ازاى

نجرب ده على اجزاء ميكانيكية مختلفة و نحطه فى كونتينر و نفجر فيها شوية مواد ملتهبة هتعادل تأثير ساعات استخدام طويلة جدا و نشوف بعد كده شكل الجدران هيحصله ايه على ميكروسكوب مسح ذرى

نجرب ده على 10 مواتير مختلفة من اعضاء المنتدى المتطوعين لتجربتة بشرط تكون العينة مجانية و انا شخصيا هدفع ثمن العينة اللى هاخدها اختبرها و اجربها عندى

تحياتى ليك و رمضان كريم

[ابو هيما]

ألف شكر ياباشا على نقل التجربة وربنا يجعلها فى ميزان حسناتك

[محمد فيصل]

100000 مبروك النصف عمرة
والدسك والاسطواته
1000000شكر على نقل التجربه
إن شاء الله تصبح النتيجة مرضيه وجيده فى المجمل
حاول ان تستخدم السيارة فى الفترة الاولى بهدوء وبدون قرص كما نصحك الاخ الكريم :هشام الجزار
وايضاً حاول ان يكون فصل الدبرياج على اول الدواسه وذلك لاطاله عمرالاسطوانه والدسك وايضاً لتسحب معك السيارة جيداً
لا تنسى دائماً لا تستخدم سيارتك ومحركها بارد لان فى هذة الحاله كل مرممات الشركه الهولنديه الاكورانيه المنشأ لن تعطى لك نتيجه جيدة سيد
عيد سعيد يسر الله لك طريقك فى السقر ذهاب وعودة سالمه أن شاء الله