تجربتي مع سوزوكي ألتو 800 وتوكيلها مودرن موترز بعد 7 اشهر

[astroman266]

بسم الله الرحمن الرحيم
انا استلمت العربية الحمد لله يوم 25 نوفمبر 2012 من الابيض اوتوموتيف وبالمناسبة لا انصح احد بالتعامل مع هذا المعرض .
الحمد لله العربية فاقت توقعاتي بالنسبة لعربية صغيرة اغلب ما قرأت من تعليقات عليها انها شديدة التواضع لكن اشتريتها لأن امكانياتي لا تسمع بأكبر من ذلك.
1- الاتساع : العربية صغيرة وتناسب اسرة متوسطة ( لدي زوجة واربع اطفال ) واعتقد عندما يكونو في مرحلة سنية اكبر سنجد صعوبة في ركوبها كوني برجع الكرسي للاخر وبالنسبة للشنطة فهي ليست صغيرة للغاية بالنسبة لطلبات البيت العادية ومشتريات الاسرة الشهرية يعني عملية لكن بالنسبة لحقائب سفر وكدا لا اعتقد.
2- استهلاك البنزين : انا بحط فيها بنزين 92 من ساعة ما جبتها وبتملي التنك بحوالي 60 جنية بيعملوا معايا 500 كيلومتر تقريبا بدون تكييف ودا بعد عمل صيانة 5000 كيلو من حوالي شهرين يعني مش استهلاك الزيرو.
3- الاتزان والعفشة : اتزان السيارة متميز ولم الاحظ موضوع عدم الاتزان علي السرعات يمكن لأني لا ازيد السرعة عن 100 وبالنسبة للعفشة فهي جيدة جدا مع العلم انني اعيش في منطقة جديدة والطرق فيها اغلبها غير ممهد .
4- تسارع العربية متميز لكن مع التكييف بيكون سيء ويمكن التغلب علي هذا بتخفيض التكييف الي شرطة او شرطتان والتكييف بشكل عام جيد او بمعني ادق احسن من مفيش.
5- قطع الغيار تعتبر متوفرة برا وجوا التوكيل لكن انا اشتريت من التوكيل لما عملت حادثة بعد ما جبتها بعشر ايام والاسعار مش غالية.
6- السيارة بشكل عام تحفة وتستاهل تمنها بالنسبة لأسرة صغيرة زي ما قلت.
7- نيجي بأه للمشكلة الحقيقية التوكيل بدون مبالغة زي الزفت ولو في كلمة تانية تنفع تتكتب كنت كتبتها والسوء مش في المعاملة ويا ريتو كان في المعاملة هما بصراحة ناس محترمين في التعامل وذوق جدا في الحوار لكن عند المهم الكفاءة مش بيفهموا اي حاجة كفاية اني احكيلكو عن المشكلة اللي اتعملت معايا
عملت صيانة الالف كيلو في فرع الهايكستب يوم 25 ديسمبر 2012 وانا راجع بالعربية لقيت عداد السرعة مش بيشتغل قلت يمكن فيوز ولا حاجة عديت علي كهربائي في صقر قريش فالراجل كشف علي العربية وقالي العربية عايزة حساس سرعة وممكن اصلحوا بس هتخرج من الضمان روح التوكيل يغيروهولك احسن ( الكلام دا اخذ بالتحديد 30 دقيقة ) المهم روحت تاني يوم الهايكستب ومرضتش اقولهم كلام الكهربائي عشان قلت يمكن غلطان المهم اعدوا يحورو ويدورو في العربية من 9 صباحا دخلت الورشة لحد 4ونص عصرا لما جه المهندس الهمام يخبرني بأنهم اكتشفو ان العيب في حسحس السرعة ولا تعليق .
طبعا قلتلو الكهربائي ياخذ نص ساعة وانتو في التوكيل يا محترفين تاخذو اكتر من سبع ساعات قالي معلش المهم قالي ان حساس السرعة مش موجود وللاسف لم يتواجد حتي شهر ابريل من العام الحالي وروحت ركبتو وعملت صيانة 5000 علي اساس معدل استهلاكي وبعد ما ركبوه ومشيت لقيتو مش شغال بردو رجعت تاني قالولي الصنايعية والمهندسين مشيو تعالي بكرة. طبعا كلمت المهندس محمود ابو عرب اللي كنت بتاعبع معاه موضوع قطع الغيار وقالي تعالي ابو رواش وهما هيحلولك المشكلة هما هنا الفرع الرئيسي ولامحترفين وروحت ابو رواش وزي ما اتسلقت في الهايكستب اتحمضت هناك للساعة خمسة ومش عارفين العربيه فيها ايه حساس السرعة ولا الكهربا ولا ولا المهم قالولي سيبها النهاردة ومش عايز اطول اكتر من كدا العربيه قعدت عندهم يومين علي ما ربنا كرمهم وعرفو فيها ايه وصلحوها .

الخلاصة العربية اكتر من ممتازة والتوكيل لما تيجو تتعاملو معاه حاولو تاخذو علاج للضغط والسكر والقلب وبعض المهدئات .

[omar_saad]

السلام عليكم
السيارة جميلة معايا من شهر 2 والحمد لله..
بس عندك حق... اسوأ توكيل في العالم
عندي عضة في الفتيس
ووقولتلهم عليها 6 مرات ... مفيش فايدة
شغلهم في الصيانة سئ جدا...لسة جاي من صيانة ال من10000
من اسبوع والعفشة مش متربطة وبتزيق قدام ... وعالم معندهاش غير التنفيض
حسبي الله ونعم الوكيل فيهم

[ShekeeS]

كنت ريح دماغك واعملها برة ... معلش هين قرشك ولا تهين نفسك

[احمد على 1999]

بص تقريبا مفيش حد مستريح فى توكيل عربيته
بس على قد اللى انت قولته و بالمقارنة بتوكيلات تانية التوكيل دا يعتبر ممتاز

[andro_sn]

مودرن موتورز من اسوا التوكيلات اللي ممكن تشوفها في حياتك ... انا عربيتي عندهم من شهر خمسه في حادثه بسيطه كانت واقفه علي قنطره وجنوط ... خمس شهوررررررر ولسه لحد دلوقتي مستلمتهاش العربيه اتبهدلت عندهم والله حسبي الله ونعم الوكيل فيهم