أسعار بعض قطع غيار الانترا MD من غبور رأسا.

[svneleven]

امبارح كنت في غبور أبو رواش بعمل صيانة ال 15000 كم و كنت ناوي اسألهم علي أسعار بعض قطع الغيار المهمة المهم سلمت العربية و انطلقت علي بتوع قطع الغيار و معاية لسته تتكون من حوالي 30 بند. لقيت راجل و ست و الاتنين فاضيين طبعا دخلت علي المزة لأن الصراحة الراجل كان قتم حبتين. المهم اديتها الورقة قالتلي طب تعالي كمان يومين لأن دول كتير قوي و راحت ضاحكه طبعا ضحكت و قولت يا فرج الله هتجيب الأسعار المهم الراجل القتم اللي جنبها راح حاطط عينه في الورقة و تقريبا سخنها راحت قايله لا لا احنا أخرنا 2 أو 3 قطع لكن ديه مقايسة و مش ينفع ممكن تطلع فوق للتأمين قولت ليه يعني ايه المشكلة قالتلي عشان بس ما نعطلش باقي العملا بصيت حواليا ما لقيتش صريخ ابن يومين علي الشباكين قولتلها ما فيش حد خالص قالتلي معلش مش ينفع. الصراحة اتفقعت و قولتلها ايه ده ده روتين حكومة صحيح اتخنقت مني لكن ما ردتش كان نفسي تطول معايا عشان اعرف اتخانق لكن للأسف ما ادتنيش فرصة المهم طلعت علي التأمين فوق لقيت راجل محترم الصراحة جهز الأسعار علي ما استلمت العربية. الأسعار بقي لذيذة جدا أتمني تستمتعو و أنتو بتقرو و أتمني ربنا ما يحكمش علي حد فينا يجيب أي حاجة من ال لستة ديه:
فلتر زيت 30 جنيه.
فلتر هوا 95 جنيه.
فلتر تكييف 225 جنيه.
بوجيهات 200 جنيه.
سير محرك 190 جنيه.
تيل أمامي 675 جنيه.
تيل خلفي 400 جنيه.
جوز طنابير أمامي 1450 جنيه.
جوز طنابير خلفي 2200 جنيه.
مساعد أمامي 850 جنيه.
مساعد خلفي 800 جنيه.
مقص أمامي 1000 جنيه.
فانوس أمامي كامل 1950 جنيه.
فانوس خلفي 1150 جنيه.
اكصدام أمامي أو خلفي 1550 جنيه.
باب أمامي أو خلفي 2800 جنيه.
مرايا شمال و يمين 2400 جنيه. الصراحة نسيت اسأله واحدة و الا اتنين لكن واضح انها الاتنين..
كابوت 2400 جنيه.
رادياتير 1900 جنيه.
سربنتينة 2450 جنيه.
علبة دركسيون 3000 جنيه.
رفرف أمامي 1200 جنيه.
رفرف خلفي 4000 جنيه.
فوج 625 جنيه.
الشبكة الأمامية 500 جنيه.
كبالن 3200 جنيه.
طلمبة بنزين 2200 جنيه.
دينامو 2750 جنيه.

[sherifabden]

يا نهار ابيض ليه قطع الغيار غالية اوي كدا ؟؟
وعموما الف شكر على المجهود

[AbOnOrA]

هى غالية نار بس ده المتوقع لان ديه اخر موديل وديه اسعار التوكيل لكن بره هتلاقيها ارخص
انا بس مستغرب من سعر الرفرف الخلفى اصلاً مفيش حاجة اسمها رفرف خلفى لانه بيبقى حته واحدة مع قائم السقف والعتب بيتباع ازاى لوحدة ده !!!

[svneleven]

المشاركة الأصلية كتبت بواسطة sherifabden يا نهار ابيض ليه قطع الغيار غالية اوي كدا ؟؟ وعموما الف شكر على المجهود

فعلا غالية مووت و شكرا علي مرورك الكريم.

[svneleven]

المشاركة الأصلية كتبت بواسطة AbOnOrA هى غالية نار بس ده المتوقع لان ديه اخر موديل وديه اسعار التوكيل لكن بره هتلاقيها ارخص انا بس مستغرب من سعر الرفرف الخلفى اصلاً مفيش حاجة اسمها رفرف خلفى لانه بيبقى حته واحدة مع قائم السقف والعتب بيتباع ازاى لوحدة ده !!!

اللي حصل اني لقيت حد في المنتدي هنا كاتب أسعار قطع الغيار اللي فاتت كلها لعربية مش فاكر نوعها المهم أنا أخدت الأسماء كلها كوبي و بيست في ملف وورد و طبعتها و أديتها للراجل في التوكيل و رجعت له بعد نص ساعة كان هو كتب كل حاجة في الورقة أخدتها و مشيت.
لكن واضح أنه يقصد الجزء الخلفي من أول الفانوس لحد الباب بالقايم.