البطارية وسننها

[tham1010]

الامر يتلخص فى التالى الجمعة اللى فاتت نسيت نور العربية مولع ومشيت وغطيت لحد بالليل لما النور ظهر وحد نبهنى نزلت لقيت طبعا البطارية فاضية شحن ومش قادرة طبعا تقوم العربية وبيخرج صوت كدة زى صوت ازيز. البطارية جافة 60 امبير

اخدت البطارية اللى كانت العين اللى فيها عاملة لون اسود دليل على ان شحنها فارغ ورحت حططتها على الشحن واستلمتها والعين خضراء والدنيا فل. مش ركبتها على طول ولكن سبتها لانى مش كنت ناوى اخرج بالعربية الاسبوع كلة لحد الجمعة التالية. واليوم الجمعة نزلت ركبت البطارية واخذت بتاع نص ساعة نظافة للسيارة المركونة اسبوع وكنت ولع الراديو وانا شغال.

لما خلصت جيت ادور الماتور لقيت البطارية مش قادرة تقوم العربية يعنى بأجد انى لما ادور الكونتاكت القى اللمبات والساعة فى التابلوة زى ما يكون بتختفى لما ادور وترجع تظهر لما اسيب المفتاح... زى ما يكون التدوير بيسحب الشحن من البطارية كلها لدرجة ان اللمبات فى التبلوة تطفى. وطبعا فى تعتيلة جامدة فى التدوير زى ما يكون بتطلع فى الروح. جربت 3 او 4 مرات وبعدين خفت ألخبط الدنيا سكتها وغطتها وفكيت البطارية وناوى اخدها تتشحن تانى رغم ان العين فى البطارية لونها اخضر دليل على الشحن...

مش عارف الوضع دلوقتى ايه؟ هل البطارية هى السبب؟ أنا شبة متأكد من هذا. وهجرب بطارية تانية بكرة من عند حد معرفة علشان اتأكد

1- ما هو سبب عدم قدرة البطارية على تشغيل السيارة رغم ان العين فى البطارية الجافة دى لونها اخضر مش اسود.

2- هل تشغيلى للراديوا لمدة نص ساعة هو السبب فى ان الشحن ضعف؟ أم ان ركنة البطارية اسبوع بعد الشحن هو اللى خلى الشحن يضعف..

حد ممكن يفسر لى الوضع دة؟؟ شاكر لوقتكم

[eng/walaaeldeen]

السلام عليكم
في بطاريات كتيره بتكون العين مالهاش فايده ومنظر فقط
لو البطاريه بتودع لو شغلت الكاسيت اقل كمان من نصف ساعه ممكن تنام
اشحن البطاريه واكشف هل العربيه فيها اي ماس او تهريب لها
والله المستعان

[tham1010]

متشكر على الرد استاذ ولاء الدين...
البطارية كورى أصلى جاية مع العربية عمرها ابدا ما فى يوم اتأخرت ولو مرة من سنتين ونص على انها تقوم العربية. كانت شغالة زى الساعة والراجل قاس الشحن قبل ما يسلمها لى بعد الشحن وقالى تمام.

دلوقتى بس هو فى خلاف بين الوالد وبينى. هو بيقول لى ان الشحن راح لانك شغلت الراديو لمدة تقترب من النص ساعة قبل ما نتحرك بالعربية شوية. وانا بقول له "لا" السبب اننا تركنا البطارية بدون تشغيل لمدة 6 ايام وهى اصلا كانت مشحونة عند الراجل مش فى حالتها الطبيعية يعنى.. الحقيقة قبل كدة كنت بسيب العربية بدون تدوير لمدة قد تصل 21 يوم بدون تدوير خالص وبرضوا لما كنت بدورها كانت بتقوم العربية من اول مرة رغم المدة الطويلة.

هو البطارية الجافة زى البطارية العادية يعنى ممكن ربع يضرب فيها؟

[ahmed_eng2001]

لو البطارية دى عمرها سنتين و نصف .... يبقى كدة كفاية عليها اوى ... و احتمال كبير ان يكون عمرها الافتراضى خلص ....
و عمر البطارية بيتعرف من الشغل العادى .... بمعنى ... مثلا .... لما حضرتك تدور العربية عادى الصبح ... تروح بيها مشوار ... و ترجع تدورها تانى .. و تدور على طول ... و ترجع بيها البيت
تيجى تدورها تانى يوم الصبح ... لو ما درتش على طول ... حضرتك تشك فى ان البطارية مش طبيعية
حضرتك تروح لكهربائى ... او حد بيبيع او بيشحن بطاريات ... يقيس البطارية من غير حمل ... و يرجع يقيسها تانى مع حمل ... و بيعرف من قراءة العداد
للأسف انا مش فاكر قيم القرائات دى كام !!!!

البطاريا الجافة زى البطاريات السائلة تقريبا من حيث التركيب الداخلى ... و ممكن ان ربع يضرب ... بس انت مش حتعرف ان فيها ربع ضارب علشان هى محكمة الغلق ... انما البطارية السائلة ممكن تعرف انهى ربع ضارب

[AbOnOrA]

اولاً البطارية بعد العمر ده مش بحالتها الطبيعية
ثانياً لما تركن العربيه ايام واسابيع ده بيفضى شحن البطارية لان فيه حاجات زى الانذار والساعة بتستهلك من طاقة البطارية حتى والعربيه مبطله
ثالثاً اى بطارية فى الدنيا بتحتاج انها تفضى وتتشحن بشكل دورى ده اللى يحافظ عليها باقصى كفائه

الخلاصة فى الموضوع ده تعمل الاتى

تاخد وصلة من اى بطارية تانية تقوم بيها العربيه بس او حتى تزق العربيه لو مانيوال وتدورها
وبعدين تاخد بالعربيه مشوار طويل بحيث تشحن طبيعى عن طريق الدينامو وتروح تركنها وتجرب تانى يوم او بعد يومين لو مقامتش تبقى البطارية تعبت خلاص ومحتاجة تتغير

اخيراً البطارية الجافة اللى بشتريها ديه متفرقش حاجة عن البطاريات العادية غير انها مغلفة بس لكن هى هى عادى وعادة عمرها الافتراضى بينتهى بعد سنتين فى المتوسط