فكرة لمنع السرقة يمكن البناء عليها وتحسينها

[Eg_Sword]

عندي فكرة يا شباب هي بسيطة وقديمة لكن بها بعض التطوير وقد تكون مشكلة بالنسبة للسارق
الفكرة باختصار هي عبارة عن المواسير التي يتم وضعها أمام وخلف السيارة لمنع سرقتها
وللايضاح
ماسورتين بقطر لا يقل عن 15 سم احداهما يمكن دخولها في الثانية
لو عندك حاجز طبيعي مثل حائط أو رصيف عالي هتحتاج واحدة بس لو ما فيش يبقى هتحتاج اثنين
يفضل لو كان امام بيتك مرصوف
تثبيت الماسورة الواسعة بالأرض عن طريق حفر حفرة ووضع الماسورة فيها على أن يكون بها كانات لمنع نزعها بسهولة
والماسورة الثانية تركب فيها مع وجود فتحتات لتركيب قفل ظاهر ويكون جيد للحيلولة دون كسره بسهولة
طيب وفين الجديد ؟؟
الجديد هو قفل داخلي مثبت في الماسورة الموجودة تحت الأرض
عبارة عن بنز راكب على محور في حال تحركه يقوم باختراق فتحتين في الماسورتين فيثبتهما داخليا
حد فاهم حاجة ؟؟
يعني كأنه مسمار يمكن تحريكه للأمام والخلف ويوجد امامه فتحتين للماسورتين في حال تحريكه للأمام يقوم بربط الماسورتين معا
طيب وازاي هنحرك مسمار تحت الارض وفي الخرسانة او الأسفلت ؟؟
عن طريق سلك الفرامل (يوجد سلك فرامل العجل والموتوسكلات بأطوال كبيرة)
نقوم بتركيبه ودفنه في الارض بحيث لا يظهر ودفنه في حائط البيت لو كنت ساكن في دور علوي لمسافة تكفي لعدم الوصول إليه يعني بما لا يقل عن 5 امتار مثلا لو انك ساكن في دور عالي وبعد كدة مش مهم يكون ظاهر
عن طريق سحب هذا السلك من الشباك او البلكون قبل الخروج يتم تحرير القفل الداخلي وهنا يمكنك رفع الماسورة من امام السيارة ووضعها في مكان آمن ثم التحرك
لكن يجب أن يكون المسافة بين الماسورة والسيارة اقل من 20 سم وتكون الماسورة قريبة من منتصف السيارة حتى لا يمكن الخروج بالسيارة مابين الماسورة والحاجز الآخر.
ارجو ان تكون الفكرة مفهومة
وبالمناسبة فكرة القفل الداخلي سهلة ويمكن أن يبدع الاخوة المشاركون في افكار اكثر سهولة واسهل في التنفيذ
ساحاول رسمها لاحقا وعرضها عليكم

[memo59]

شكرا على الفكرة الممتازة و ياريت الصور لتوضيح اكتر و موفق

[drmohamedkhater]

انا عامل الموضوع ده على العربية عندى بس من غير القفل الداخلى اللى حضرتك بتقول عليه
بس انا حاطط 2 ماسورة واحدة خلف العربية و التانية جنب العربية من الخارج و قدامها فيه عمود نور
المشكلة دلوقت مش قدام البيت - المشكلة لما الواحد يروح مشوار و هيطول فيه شوية يركن العربية فين و خاصة اذا كان المكان مافيهوش جراش ولا سايس

[eng/walaaeldeen]

السلام عليكم
احسن حاجه ان الناس بتقسم الشوارع وكل واحد حاطط ماسورتان في الشارع نفسي اعرف هو البلد باعت الشوارع ديه ولا ايه
لما بأروح مشوار في القاهره كل واحد حاطط المواسير كأنه شاري الشارع
الحمد لله ان في المنيا مافيش الأسلوب ده لأنه بصراحه اسلوب مش كويس
والله المستعان

[drmohamedkhater]

استاذى الفاضل . دى الطريقة اللى بنقدر نحافظ بيها على ممتلكاتنا فى ظل الانفلات الامنى .
لما تصحى سيادتك من النوم و تيجى تروح شغلك و متلاقيش عربيتك واقفة قدام البيت . موقفك هيكون ايه
جارنا نازل يصلى الفجر ملقاش العربية قدام بيته ساب الصلاة و راح يجرى فى الشوارع يدور على العربيه و عمل محضر فى القسم و بعد كدا دفع 8 الاف و 300 جنيه علشان ترجع .
لما تبقى الحكومة تأمن الناس و تحافظ على الامن و الامان . او على الاقل اللى اتسرق منه حاجة ترجعهاله من غير ما يدفع و ميقلوش ليه ادفع احسن وقتها هنبقى نشيل المواسير و نرجع حته الارض اللى اغتصبناها من الحكومة على كلام حضرتك . قولى على حل احافظ فيه على عربيتى . و ايه اسعار ايجارات الجراجات ولعت نار بسبب موضوع السرقه دى . اللى ايده فى الميه مش زى اللى ايده فى النار.