الحمدلله تمت صيانة 30000 KM في التوكيل فرع القطامية على خير

[gad_fcis]

ذي ماكنت كتبت قبل كدا اني مقبل على صيانة 30000 كم لعربيتي BYD F3 أوتوماتيك


و كنت محتار اعملها في التوكيل ولا برى ، عشان كان عندي إنطباع سيء جداً بعد صيانة 25000 كم في التوكيل


المهم مكدبش عليكو أنا فكرت بيني و بين نفسي و قلت كدة كدة الصيانة ديه مش هيحصل فيها حاجة غير تغيير زيت و فلتر و إحتمال تيل فرامل عشان كان عندي صوت بيطلع و أنا بفرمل و الصوت دة أوقات يطلع و أوقات ميطلعش ، فخلاص هتوكل على الله و اعملها في التوكيل و ذي ماتيجي تيجي و بجد المرة ديه هتبقى القشة اللي قسمت ظهر البعير ذي مابيقوله ، يعني لو حصل حاجة أبقى كدة عملت اللي عليا للاخر و بيني و بينكم أنا كنت رايح متحفز بطريقة أنا نفسي إستغربتلهة


المهم اتكلمت يوم السبت و ردت عليا استاذة داليا و طلبت منها تحجزلي معاد الصيانة و عشان مايبقاش فيه ضغط طلبت منها هي تحددلي اليوم و الوقت بشرط إنه مايكونش فيه ضغط عشان العربية تاخد حقها في الصيانة و بناء عليه حجزتلي يوم الاحد الساعة 10 الصبح ، و أنا كنت طالب إن وقت الصيانة ميزدش عن ساعتين عشان أنا هاكون مستأذن من شغلي


يوم الاحد كنت الساعة 10 بالظبط أمام التوكيل ، دخلت و المهندس ماجد جه يستلم مني العربية عشان يعمل أمر الشغل و إذا كان فيه حاجة بشتكي منها ولا لأ


و كانت طلباتي اللي إتكتبت في أمر الشغل كالتالي :


1- صيانة 30000 كم
2-تغيير زيت و فالتر
3-الكشف على صوت بيطلع مع الفرامل و أوقات مش بيطلع (و الحمدلله إنه طلع أمامه )
4-و أنا بفتح الباب اللي ورى السواق بيزيق
5-ظهور صدأ في المجرى بتاعت فتحة السقف


العربية دخلت الورشة الساعة 10.20 بالظبط
و أنا طلعت سلمت على استاذة داليا و و قاعدة في الإستراحة
مفيش 5 دقايق و لقيت المهندس صبحي كبير المهندسين هناك طلعلي و بيسلم عليا و يقوللي إذا كان فيه أي حاجة تانية بشتكي منها ولا لأ ، قلتله لا مفيش حاجة الحمدلله ، طلب مني إن لو المهندس المسؤل عن السمكرة و الدوكو مجاش إلنهردة أبقى أخد معاد تاني عشان يشوفلي موضوع الصدء بتاع مجرى فتحة السقف ، قلتله معنديش مانع خصوصاً إن شغلي ورا التوكيل على طول


قعدت مع استاذة داليا و قلتلها على شكاوي الاعضاء و اعدت عليها اللي حصل معايا في صيانة 25000 كم من مشاكل و شاركنا في الحوار لفترة قصيرة أستاذ محمد رمضان مدير المركز و أكدت عليها على موضوع إن لازم يكون فيه متابعة للناس بعد الشغل و إن العربية متطلعش إلا لما يتراجع أمر الشغل و كل نقطة فيه تمت معالجتها ولا لأ و إذا كانت متعلجتش لازم يتم إخبار العميل بكدة مش يتقال انها إتعالجت و خلاص ، و إن لازم يكون فيه وقت واضح و صريح لكل صيانة العربية تدخل و تطلع فيه و يكون العميل على علم بكدة من وقت حجز الصيانة في التليفون و لو العميل عنده شكوى أو طلب زيادة عن الصيانة الطبيعية يتحسبله وقت إضافي على وقت الصيانة المحدد سابقاً ، و حاجة كمان إن أنا مش مشكلتي مع الناس اللي فوق ، أنا مش هبقى فرحان لو جاتلي مكالمة بعد كل صيانة تطمن على إنطباعي اه في حين إن العامل نفسه اللي بيشتغل بايده في إلعربية معملش شغله صح ، بالعكس أنا ممكن أجي على نفسي و استحمل إن الناس اللي فوق مش بيتعمله معايا كويس بس العمالة عندهم اللي بتشتغل بادها على أعلى مستوى و فيه قواعد واضحة و صريحة بتحكم نظام شغلهم ، و دة طبعاً ميمنعش أكيد إن لو اللي فوق و اللي تحت كويسين يبقى فضل و عدل من عند ربنا




على الساعة 12 كدة المهندس صبحي كلمني و أخبرني إن التيل لسة باقي فيه ربعه بس نصحني اني أغيره عشان مش هيكمل معايا لحد 35000 كم قلتله ماشي غيره بس اعذرني في كلمة معظم الناس اجمعوه إن التيل اللي بيتباع في التوكيل وحش و بيصفر و شوية و يبوظ الطنابير ، قللي متقلقش إنت هتستلم العربية ديه من المهندس صبحي قلتله ماشي غيره


أستاذ أحمد متولي خرج جرب العربية و لما رجع قللي فيه زنة في الدركسيون ، قلتله عارف و أنا عرف حلها عشان هي غاية من وحدة التحكم في الكاسيت عايزة تتربط


المهم العربية خلصت على الساعة 1 كدة و كانت واقفة على موضوع الصدء و كان المهندس حسام المسؤول عن السمكرة لسة مش موجود و اللي فهمته إنه بيلف على كل فروع التوكيل فعشان كدة ملوش مواعيد محددة




استاذة داليا طلبت من الفني المسؤول عن السمكرة و الدهان إنه يشوفلي العربية و بصراحة كان الوقت اتأخر و كان لازم أمشي ،


طلبت من استاذة داليا اني أسلتم العربية و أبقى أجي يوم تاني عشان أعمل الاتي :
1- يشوفولي موضوع الصدء
2-يربطولي على وحدة تحكم الكاسيت
3-فتحة السقف لما تكون مفتوحة بتعمل صوت مع المطبات (لوح الزجاج تحس إنه بيلق و هو جوا السقف )
4-ظبط خلوص الشنطة عشان كانت مفارقة أكتر من العادي




خلاصة الكلام ، أنا المرة ديه خارج و أنا من جوية مستريح و مش محروق دمي و بالعكس أنا اللي طلبت منهم انهم يوقفو شغل في العربية عشان أنا مستعجل


حاجة أخيرة بقى ، جالي تلفون إلنهردة من المهندس صبحي يطمن على الصوت اللي كان بيطلع مع الفرامل راح ولا لسة ، أخبرته إنه مبقاش يطلع بس أنا مش هقدر أحكم إلا بعد ما أمشي بالعربية شوية ، رد عليا و قاللي في أي وقت تعالى و متشلش هم أخوك الكبير المهندس صبحي مسؤول إسأل عليه و ملكش دعوة

[peter magdy]

دا كلام جميل جدا و مشجع لان الواحد كان ميعملش صاينة 5000 اصلا فى التوكيل
الميزتين اللى عجبانى فى التوكيل
1 - ان كل عيب بيظهر فى العربية بيتلافاة فى الموديل اللى بعدة و دى ميزة هايلة
2 - ان الادارة بتحاول تصلح من شغل الصيانة و ارضاء العميل لكن المشكلة بتبقى فى الصنيعية نفسهم عندهم اهمال رهيب
تحية لتوكيل القطامية لمحولاتة فى ارضاء العميل
و بنطالب التوكيل بمقابلة مع العملاء للتواصل و معرفة طلبات العميل الغير متاحة فى التوكيل

[mhamdy75]

مبروك الصيانة الموفقة

[ehabpopo]

مبروك الصيانة ... وربنا يديك خيرها ويكفيك شرها يا محمد
انا سعيد بسماع الكلام ده ... وربنا يوفق مركز القطامية ... وهو ده اللى احنا منتظرينة منهم من زمان ...ربنا يوفقهم ودائما قى تقدم إن شاء الله

[emad habib700]

الحمد لله ويستمر رضاء العملاء والله الموفق