مساعده من نوع خاص ( LADA VS 128 VS DAD )

[xperia]

السلام عليكم يا شباب كييف حالكم
انا شاب 23 سنه بحب العربيات جداا
عندنا فيات 128 موديل 88 حاله جيده
العربيه بصراحه مريحاني في حاجات كتير اولهم بترحم من المواصلات
وفي اي وقت بخدها من والدي وبتبقى معايا
انا بحب الجري جدا ( الجري المعقول )
ال 128 معايا على الطريق ماشاء الله تحفه ثبات وسرعه معقولين جدا لعربيه 128
مشكلتي بقاا جوا البلد مع المطبات والنقر والتكسير اللي في الشوارع بحس انها بقت بطه بلدي .. واحيانا بيبقى في نقر على الطريق السريع زي فواصل الكوبري العربيه بتاخدها الخبطه بحسها بتيجي في عضم العربيه مع ان المساعدين عندي حالتهم كويسه

عمال اقنع والدي انها مش هتستحملنا .. يا عم الحاج دي عربيه ضعيفه لو كلت بيها مطب ممكن تتكسر مننا ده الناس بتقول ان الشاسيه بتاعها على علب صاج
يقولي كويسه ومفيش احسن منها في السعر ده

ف انا عاوز طريقه اقنعه بيها الفلوس اللي هشد عفشه وابواب العربيه والمكنه نحطهم في عربيه لادا موديل 94 روسي 2105 وشفتها في معرض وفبريكه بره وجوه بيقولي ب 23 الف وفيها رخصه 3 سنوات 1300 سي سي

طبعا انا بتكلم صح في نقطه اني اجيب لادا بدل ال 128

هتبقى ماسكه نفسها شويه في موضوع النقر والتكسير والخبط مش هيجي في صاج العربيه زي ال 128 ؟؟؟ ولا العربيات دي كلها واااحد ؟؟
انا مش هاممني لا شكل ولا صوت موتور
انا عاوز عفشه تريحني بنسبه 50% بس عن ال 128 انا مش طالب كتير والله
ولو اللادا افضل .. تنصحوني اقنع والدي ازاي ان ال 128 مش هتستحملنا فتره طويله

[mr_astra]

كلامك مظبوط
لادا فعلا سعرها فى الموديل دة 23 الف اقل الف او اعلى الف بس خلى بالك لان فى لادا كتير احلال تاكسي

ومن حيث العفشة واحساسك بالمطبات عندك حق لان لادا عربية بجد غير الـ 128 كل حصوة بتحس بيها
كمان لادا امان على الطريق جدا وعربية تسافر اسوان ماتقولش لا
فيها عيب تقل الدركسيون عشان تبقى عارف
حاجتها ارخص من الـ 128 واى ميكانيكى بيشتغل فيها وانت ممكن تصلحها بنفسك
صالونها اوسع بقليل من الـ 128 لكن الشنطة اوسع
اطمن بس على الموتور والات الجر بتاعة الادا وخلى بالك لحسن تكون احلال تاكسي

[xperia]

والشاسيه بتاعها ايه اخباره يا مستر استرا ؟؟