حادث تصادم إلنترا مع مرسيدس و توك توك .. !!

[mando122006]

السلام عليكم جميعاً ...

حضراتكم أنا معى عربية النترا موديل 2013 ...
بمناسبة العيد .. الأسبوع الماضى حدث لى أمرين وأنا سايق العربية ..

1 - كنت سايق فى الحى السابع فى مدينة نصر .. والطريق مزدحم .. فجأة حدثت إنفراجة مرورية .. واللى بيحصل عندنا فى مصر .. من كتر الانتظار والضيق .. فى ناس أول ماتلاقى ثغرة فى الطريق تروح دايسة بنزين عشان تفك من الزحمة ..

المهم حصل الامر .. وكنا عدد 3 سيارات مسرعين أعتقد فوق 30 كم/س فى شارع مزدحم .. واحد حمار - أعذرونى فى اللفظ - داخل يوتيرن شمال فجأة (إتجاه معاكس) وإضطر للوقوف فجأة لأنه وجد سيارة تدخل الملف من الجانب المقابل .... اللى وراه فرمل و وقف .. وانا التانى فرملت ووقفت عربيتى .. اللى ورايا كان سايق مرسيدس موديل تسعينات مش عارف فرامله فيها إيه .. ولا كان ساهى .. عربيته وقفت بعد ما خبطت عربيتى من الجانب الأيمن للإكصدام الخلفى ... نزلت وأنا ناوى على شر .. لأنها تانى مرة تحصل معايا فى خلال 3 أشهر (كنت سايق بعربية والدى على كوبرى 6 أكتوبر والطريق زحمة والسرعة بطيئة وواحد برضه خبط العربية م الخلف) .. لقيت صاحب المرسيدس راجل كبير فى السن و أول كلمة صدرت منه .. "اللى تأمر بيه أنا حنفذه .. واللى عاوزه أنا ح ادفعه .. وأروح معاك التوكيل أصلح العربية على حساب .. ) بصراحة لقيت الموضوع مش مستاهل - وجهة نظرى الأولية - وكنت مستعجل لإرتباطى بأمر هام ..

بالإضافة إلى إنفصال الإكصدام من الجانب الأيمن عن السيارة قليلاً .. نتيجة التصادم .

2 - خبطة التوك توك ... واد صايع - ككثير من سائقى التكاتك فى مصر - وأعذرونى ع اللفظ - قاعد يتمايل يمين شمال فى زفة فرح ... غلطتى الكبرى إنى حاولت اعدى منه .. سيبت الأسفلت وطلعت يمين ع التراب بسرعه عاليه (خطأ آخر) لأتجاوزه - وياريتنى ما عملت كده - الواد رمى نفسه يمين اكتر وخبط عربيتى .. والناتج الصور التى سأعرضها لاحقاً ... والحمد لله رب العالمين انا ومن معى بخير .. رغم صدمة الحادث خصوصاً إنى كان معى بنات صغار .. وكانت عدم مسئولية منى أن اتصرف مثل هذا التصرف .. فكان ينبغى علىّ وقتها ألا أقترب من هذا التوك توك المتهور .. حتى لو إتأخرت بضعة دقائق إضافية ... أهو درس و اتعلمته ..

إشتريت زجاج مرآة جديدة م التوكيل بـ 175 ج ..

انا مأمن ع العربية تأمين شامل .. مع *** ..
حاسس إن المعرض دبسنى فى الشركة دى , من خلال ما جاء بالوثيقة ..
* شرط الإصلاح بالتوكيل المعتمد :
من المعلوم والمتفق عليه أنه فى حالة إصلاح السيارات بالتوكيل المعتمد يتم خصم 10% من إجمالى التعويض .
*شرط السرقة : من المعلوم والمتفق عليه وخلافاً لما جاء بالوثيقة اعلاه يتم خصم 25% من إجمالى التعويض المستحق فى حالة السرقة الكلية و الجزئية للسيارة .

تنصحونى بإيـــــــــه :

- الخبطات و الخدوش الموجودة فى السيارة تستاهل اوديها التوكيل .
- أم أنه يكفى إصلاحها بورشة إصلاح خارج الوكيل .
- هل يلزم ان أستلم فاتورة إصلاح - عليها ضريبة مبيعات - من الورشة لصرفها من شركة التأمين .
- هل يلزم تحرير محضر بواقعة حادث التصادم لصرف أى مبلغ أم أنه يشترط تحرير هذا المحضر لو مبلغ التعويض المطلوب - طبقاً لفاتورة الإصلاح - زاد عن مبلغ معين ..
وكيف أحرر محضر لسواق تكتك خبطنى ولا أعرف عنه شىء .. (حدث إشتباك مع سائق التكتك .. وكان الأمر معرض للتصعيد بمشاركة أقرانة من سائقى التكاتك .. لكن ربنا ستر)

أم اترك العربية لحالها لكسر العين ..
حادثة التوك توك .. سافرت فى بلاد وقرى صغيرة .. وشكل الإلنترا الخارج خطف الأنظار .. وسمعت كلام عن إعتقاد البعض بأنها أفضل من المرسيدس و أن سعرها يصل لـ300 ألف جنيه !!! .. وكتير من الكلام والنظرات الغريبة .. !!

[screamseko]

اولا فداك مليون عربيه انت وبناتك
ولو ان الخبطه تزعل لان العربيه لسه بورقها
بخصوص التامين انا زيك برضه في الشركه العربيهوالبندين دول موجودين غير ان فيه 15 %مصاريف اداريه
يعني لما اصلح في التوكيل حدفع 25 % مامن ازاي انا مش فاهم وعلي كده الاسم بدون تحمل

المهم
بما انك كده كده حتدفع
صلح في ورشة التوكيل اضمن
ومكنتش جبت مرايه ودخلتها مع التامين

روح شركة التامين واطلب مقايسه للاصلاحات اللي انت عايزها والمهندس حيعاين وحيكتب تقرير ووتروح تصلح علي قد التقرير بالظبط لان اي حاجه مش مكتوبه في التقرير مش حيصرفولك تعويض عنها
وحاول تدخل خبطة الاكصدام الاولانيه في التقرر ان حد دخل فيك من ورا لما حصلت الحادثه عشان تبقي حادثه واحده

وتقريبا المحضر بيتعمل للحوادث الاكتر من 5000 جنيه ودي مش حتعدي ان شاء الله

[mando122006]

المشاركة الأصلية كتبت بواسطة screamseko اولا فداك مليون عربيه انت وبناتك ولو ان الخبطه تزعل لان العربيه لسه بورقها بخصوص التامين انا زيك برضه في الشركه العربيه والبندين دول موجودين غير ان فيه 15 %مصاريف اداريه يعني لما اصلح في التوكيل حدفع 25 % مامن ازاي انا مش فاهم وعلي كده الاسم بدون تحمل المهم بما انك كده كده حتدفع صلح في ورشة التوكيل اضمن ومكنتش جبت مرايه ودخلتها مع التامين روح شركة التامين واطلب مقايسه للاصلاحات اللي انت عايزها والمهندس حيعاين وحيكتب تقرير ووتروح تصلح علي قد التقرير بالظبط لان اي حاجه مش مكتوبه في التقرير مش حيصرفولك تعويض عنها وحاول تدخل خبطة الاكصدام الاولانيه في التقرر ان حد دخل فيك من ورا لما حصلت الحادثه عشان تبقي حادثه واحده وتقريبا المحضر بيتعمل للحوادث الاكتر من 5000 جنيه ودي مش حتعدي ان شاء الله

ربنا يبارك فيك .. البنات كانوا من العيلة .. انا لسه أعزب ..
وبعد اللى شفته فى زفة الأفراح بقيت أفكر جديا فى موضوع جواز من غير زفة !
ده لما أفكر فى الجواز أساساً ..

المهم :
بالنسبة للمراية : كنت مستعجل عليها .. عشان السواقة فى القاهرة .. بتكون المسافات بين العربيات بالـ سنتيمتر ومحتاج مراية حقيقية متعود عليها ..

بالنسبة للمقايسة :
أنا كنت فاكر إنها بتحصل فى مركز الوكيل .. يعنى هناك بيكتب المطلوب وبعد الموافقة على إصلاح المطلوب بالسعر المحدد , أدفع من جيبى ثم أذهب لأسترد الثمن من شركة التأمين ..
مكنتش أعرف إن شركات التأمين لديها مهندسين لهذا الأمر ..

أعذرونى لسه جديد فى المسائل دي ...

وشكراً جزيلاً للتفضل بالمشاركة والرد ..

[screamseko]

يباشا عقبال منحضر فرحك ان شاء الله ونباركلك قريب

بالنسبه للتامين انا برضه مكنتش اعرف كل ده ومتعاملتش لغاية دلوقتي معاهم
بس المنتدي هنا بيعرفك كل حاجه ويفهمك كل حاجه انت عايز تفهمها وهو ده اللي حصل معايا

تحية شكر واعزاز لمصر موتورز وكل القائمين عليه

ابقي بص بصه علي قسم التامين اللي في المنتدي حتعرف حاجات كتير

[AutoPaint]

قدر الله وماشاء فعل
حضرتك تصلح فى المكان اللى انت عايز تصلح فى اهم حاجة عند شركة التامين مقايسة وقاتوره
ويتم معاينة السيارة فبل الاصلاح وبعد الاصلاح
مش لازم محضر فى حالة عربية حضرتك.
مش لازم القاتوره يكون عليها ضريبة مبيعات
تحيانى لك