مشكلتي مع الدركسيون .. ساعدوني

[Loay94]

المشاركة الأصلية كتبت بواسطة مانوورة جزاك الله خيرا يا لؤي .. ياريتني و الله امشي جنب الرصيف .. المدرب مش مديني فرصة احاول اتحكم في الدركسيون .. قلقاااان مني ههههههههههههه خايف علي نفسه بقي العمر مش بعزقة و ربنا يستر بقي و متكسبفينيش يا صنارة ههههههههه

بصراحة انا مبعترفش ابدا بتعليم المدارس و كدة اولا لانه حيبقى همه العربية اكتر من انه يعلمك
ثانيا بيعلمك حاجات عمرك محتعمليها فى الحقيقة لانه بيعتمد على اساسيات محفوظة مش على الى بيحصل فى الواقع و من الاخر لو عندك عربية انزلى و معاكى واحدة صاحبتك بتعرف تسوق لكن واحد يعلمك دى رخمة حتى انت حتبقى قاعدة مكسوفة او متاخدة منه و حتكسفى تقوليلو حاجة و فى مرحلة التعليم اهم حاجة انك تقعدى مع حد فاهم و تسأليه فى السواقة لحد ما يولع فى نفسه انا على فكرة اتعلمت بلطجة اول يوم سواقة نزلت خد العربية من ورا بابا و شديت واحد صاحبى معايا بيعرف يسوق و تعالى شوفينى دلوقتى لو المدرسة دى حطلعلك رخصة كملى و خلاص لكن لو مش حطلع رخصة فكك منها و اعملى زى الى بقلك عليه

[nawwara]

انا من رأيى انك افضل حاجة لما تنزلى لوحدك الموضوع ده هايتظبط معاكى بمنتهى السهولة
واخدة بالك من تنزلى لوحدك دى ؟

[Mohammed Hamada]

السلام عليكم
سؤال صغير لحضرتك

العربية اللى بتتعلمى عليها باور و لا لأ ؟ لو باور و مش عارفة تسيطرى عليها أطلبى منه المرة الجاية تغيير العربية بعربية بدون باور لحد ما تخدى على السواقة و على الدركسيون و مش حيحدف منك لأنه حيبقى تقيل

[queen]

المشاركة الأصلية كتبت بواسطة مانوورة جزاك الله خيرا يا queen ، هي كل المشكلة ان المدرب بتاعي معقدني من موضوع الدركسيون دا كل حصة يقولي الدركسيون عندك ضايع و مينفعش كدا انا دلوقتي معاكي و بعد كدا هتكوني لوحدك و انا لسه مجبتش عربية .. يدوب بتعلم السواقة عشان ان شاء الرحمن اجيب عربية قريب .. و المفروض انه عارف ان انا لسه جديدة و لسه بتعلم .. ميظغطش عليا في موضوع الدركسيون دا نظام تعقيد يعني محسسني ان انا في المستحيل .. ربنا يكرم ان شاء الله .. و الحمد لله ان انا بستجيب بسرعة لقواعد القيادة فمش عارف يزعقلي بقي .. و حلو كدا عشان متتشدش اعصابي .. و شكرا ليكي جدااا يا queen

لا شكر على واجب

وعايزه اقولك ان المدارس فعلا مش بتعلم كويس لانهم بيخافوا على عربياتهم وبيلتزموا بكلام نظرى اكتر م الواقع اللى هيقابلك
انا عن نفسى رحت مدرستين ومتعلمتش اسوق بجد غير لما جبت سواق يعلمنى على عربيتى وهو ده اللى خلانى ابطل اخاف وشويه وبدأت اعتمد على نفسى

فى المدرسه الاولى المدرب كان صاحب المدرسه وكان مرعووووب على عربيته وطول الوقت لما تبطل منى يقولى كمان مره تعملى كده والعربيه تخرب واشيلها على كتفى ولما اغلط فى أى حاجه يقولى معرفش ليه مبتسمعيش الكلام مع انى سامعه الكلام بس لسه مش عارفه اتحكم وفضل يعقدنى وحسيت انى عمرى ما هسوق فى حياتى وانى فاشله 100% واضطريت اقوله انا اول مره اقعد على كرسى السواقه فى حياتى وحاول تعذرنى شويه وهو مفيش فايده وفى الآخر قلتله انا مش فارقه معايا وعارفه انى مش هخرج من عندك اسوق بكره فاعتبر انى جاهله وانك بتمحيلى اميتى بس عشان يهدى شويه مع انى بشهادته الدركسيون كنت بتحكم فيه كويس مشكلتى كانت الحساسيه على الدواسات واكيد حساب المسافات زى كل الناس وبجد خلصت الكورس وانا معرفش ان العربيه فيها سرعه غيرالأول لانه مقاليش اى معلومات غير كده وكمان اكتشفت ان عربيته دبرياجها تقيل جدا وكان بايظ فيها كذا حاجه وانا مش فاهمه وفاكره كل العربيات كده وان السواقه شىء مستحيل ولولا انى كنت فى ضروره شديده للسواقه وكنت مصره اتعلم كنت زمانى اتعقدت ونسيت الموضوع.

عشان كده بقولك متهتميش برخامته اوى وركزى انتى بس ومهم أوى تتعلمى على عربيه مانيوال ويكون الدركسيون من غير باور عشان فعلا يبقى تقيل وتفهمى زواياه وانا فاكره كانوا بيقولوا ان اللفه ع الدركسيون 1 سم لاى اتجاه بتفتح العجل 50 سم عشان كده خلى ايدك حساسه ومتلفيش بعنف ولسه ادامك شويه على ما تملكى كل حاجه فى العربيه .

وان شاء الله استناكى قريب وانتى داخله سباق الفورميولا الجاى

[محمدصلاح القاضى]

اولا مبروك مقدما على الرخصه
ثانيا طالما حضرتك بتعرفى تنقلى الغيارات وتتحكمى فى مشى العربيه فرامل وبنزين ودبرياج يبقى كدا عال العال اوووى
ثالثا مشكله الدركسيون معاكى دى مشكله عبييييييييطه جدااا جداااا ومتخليش الموضوع دا يأثر عليكى خالص
لان ببساطه العيب فى حاجه واحده هو انك بتمسكى الدركسيون بطريقه مش مظبوطه شويه ودى بقى ازاى
انك بتمسكى الدركسيون بكل قوتك وبتنشفى ايدك عليه كأنه هيطير منك ولا حاجه ودى حلها
انك تركبى وانتى عندك ثقه جامده جدااا وتمسكى الدركسيون براحه وبكل بساطه بس شرط تكون متحكمه فيه مش حاطه ايدك عليه بس وواحده واحده هتلاقى الامور انظبطت والدينا بقت ورد وفل وياسمين واهم حاجه فى السواقه الثقه بالنفس والقلب الحديد