طازه من مكتب رئيس مجلس الوزراء مشروع قانون يسمح باستيراد السيارات حتى 10 سنوات

[3bd0]

المشاركة الأصلية كتبت بواسطة sayed2077 ياجماعه وعلى العموم انا موافق ان الموضوع يحصل بدون ضوابط ولا شروط ولكن يتم تحرير اسعار البنزين نهائيا يعنى كل نوع بنزين يباع بسعره الحقيقى مع المكسب كمان للدولة

ده ممكن يكون حل كويس على فكرة
حالنا من حال كل بلدان العالم الغير نفطية
بس بشرط متحصلش سرقة، اللي يدخل خزينة الدولة نشوفو بيتصرف على الشوارع والكباري والبنية التحتية بشكل عام

[sayed2077]

المشاركة الأصلية كتبت بواسطة mainz ايه الى خلاها كارثه بقى يابشمهندس اشمعنا عندنا فى مصر بقى الى هتبقى كارثه . طيب ما امريكا كلها عربيات بمحركات ضخمه وعربيات وحوش بتشرب بنزين واوروبا كلها عربيات جديده والقديم الحكومه بتغلى عليه الضرايب والتامين علشان الناس تشترى جديد ومحركات العربيات فى اوروبا معظمها فوق 1800 سى سى والحياه زى الفل المشكله فى معظم الشعب المصرى انه هيصعب عليه انه اشترى عربيه غاليه بمواصافات زى الزفت وبعدين فاجأه الاسعار نزلت وعربيات احسن نزلت والعيشه تنغنغ . يا ريت الناس تبطل بقى النظر تحت رجليها وتنظر الى الامام والى التقدم ومواكبه العصر . ولا انتوا عايزين تخليكوا راكبين الخنافس الى انتوا بتركبوها ديه عاجبكم حالكم اوى كده بالعربيات الى عمرى ما شوفت زيها الا فى مصر حاجه تخنق

بالنسبه لامريكا وان العربيات عندهم ضخمه حضرتك تعرف مساحة امريكا كام مساحتها حوالى 4 مليون كيلو متر مربع والمسافه بين كل ولاية والتانية كام اقل مسافه بين الولايه والتانية الاف الكيلو مترات وبالتالى لازم لما يقطعوا المسافه ديه كلها يبقى العربيه كبيرة علشان راحة السائق و قوة العربيه علشان تستحمل الطريق وعلشان حاجات كتير وده اللى بيخليهم يستخدموا عربيات ضخمه بس انت هنا فى مصر اطول مسافه ممكن تقطعها من الاسكندرية لاسوان حوالى 1000 الى 1500 كيلو يعنى ال 128 تروح المشوار بدون ادنى مشاكل ثانيا فى امريكا البنزين بيتباع بالاسعار الحرة مش زى فى مصر بيتباع باقل من نصف سعرة والباقى تتحملة الدولة غير كده شوف شوارع امريكا عاملة ازاى وتخطيط المدن فيها عامل ازاى انت هنا فى مصر 85 مليون ساكنين على 10 % من مساحة مصر او اقل من كدا كمان يعنى احنا قاعدين على مساحة مائة الف كيلو متر مربع من مليون كيلو متر مربع

ثانيا بالنسبه لان اغلب سيارات اوروبا فوق ال 1800 سى سى مين اللى قال لحضرتك كده الكلام ده غلط نهائيا اوربا بتطبق شروط ومعايير قاسيه بالنسبه لاستهلاك البنزين فى السيارات الجديده وان السيارات الصغيرة الحجم هى اللى بيكون لها تسهيلات كبيرة فى الضرايب علشان بتستهلك بنزين قليل وبالتالى بتحافظ على البيئه ولكن السيارات ذات السعة اللتريه العالية بيبقى عاليها ضرائب باهظه وبتكون غالية فى السعر جامد
وحتى تلاحظ ان دلوقت بقى اغلب السيارات الاوربى بتنتج بمواتير 1400 سى سى و بيتحط فيها تيربوا علشان ياخدوا اعلى اداء من اقل سعة ليتريه

نيجى بقى للخنافس الى فى مصر متنساش انا قولت ايه قولت لو يتم مثالا عمل مشروع زى الاحلال كده ان كل واحد عربيته عمرها اكثر من عشرين سنه مثالا يروح رايح مسلمها للحكومة والحكومه تديله مبلغ مقابلها و تديله جواب بالجواب ده يقدر يروح يشترى عربيه من بروسعيد مثالا ويدخلها بدون ضرايب وبالتالى نكون مشينا العربيات القديمة وجبنا حاجات احدث شوية بس طبعا يتم وضع ضوابط على السعه الليتريه مثالا اعلى سعه ليتريه تكون 1600 سى سى بس ان الحال يبقى سداح مداح وكل من قدره ربنا ومعاه 20000 الف يروح يستورد عربيه كده هيحصل عندك حالة تخمه غير عادية وفعلا الامور هتبقى كارثية بمعنى الكلمه وكمان لعلم حضرتك لما مثالا انا واحد زى حالاتى كان معايا 20000 الف روحت اشتريت عربيه كده كده هى موجوده فى السوق اساسا يعنى كده كده هى ماشية فى الشوارع مش روحت جبت عربيه جديده من برا وحشرتها فى وسط العربيات الموجوده
ارجوا ان تتفهم وجهة نظرى اخى الحبيب
اخوك فى الله سيد

[moslem2]

القرار لو صدر واشك انه هيصدر ممكن يصدر معاه قرارات تانيه تتفادى السلبيات الى هتظهر يعنى مثلا اوقف ترخيص الملاكى الى اقل من سنة 80 وساعتها شوف الزحمه هتخف قد ايه من السيارات دى وان كل اسره يبقى لها الحق فى سياره واحده بس...والله الموفق والمستعان

[mr_astra]

يا سبحان الله
الناس المعترضة على مشروع القانون بجد حاجة تسير الدهشة
سلعة وممكن ترجع لسعرها الطبيعى اية المشكلة فى كدة ...........ولا احنا اتعودنا اننا نتسرق فى كل حاجة
طيب ما لبنان واعتقد دول الخليج بتعمل كدة وبصفة شخصية كمان
لى صديق استورد عربية من اميركا بسعر الـ فيرنا فى مصر لان دة الطبيعى اية المشكلة
واللى بيعول على ان شوارع مصر لا تستوعب كم السيارات دى نظرة انانية ....لان زى ما انت راكب عربية من حق غيرك انة يركب عربية
مشكلة المرور لو اطبق القانون صح مش هايكون فى مشاكل لو ان عربيات السرفيس اتلزمت انة ما يقفش فى نص الشارع مش هنلاقى ازمة فى المرور
لو ان الشوارع اتسفلتت بما يرضى الله الشارع عمرة ما هايقف
لو ان المطبات الصناعية اللى ملية الدنيا اتشالت هايكون فى سيولة فى المرور
لو ان مزلقانات القطارات اتسفلتت بما يرضى الله العربيات هاتعدى بدون مشكلة
لو ان العربيات القديمة اتسحبت من السوق بصورة تناسبية مع الجديد مش هاتضيع وقتك عند ميكانيكى ولا عفشجى والدنيا هاتبقى حلوة لان من حقنا نعيش بنى ادمين
انما احنا اتعودنا على الذل واننا لو اتعالجنا فى مستشفيات الحكومة يبقى بقرار على نفقة الدولة مع انة من البديهى طلما انت مواطن مصرى انك تتعالج على نفقة دولتك
دى حاجة اسمها حقوق المواطن طالما بتشتغل وبتدفع ضرايب 20 % وضريبة مبيعات وضريبة كسب عمل وضريبة عقارية وضريبة تنمية موارد وارباح صناعية وتجارية .......الخ وجمارك
فيرى ليتل فيرى لايت

[alexandrien]

أنا مش فاهم حاجه يا جماعه من مشروع القانون ده
هو يعني لو واحد معاه سياره خارج مصر يبقى كده من حقه انه يستوردا لمصر ؟
من غير شروط ؟