حكـــــــــــــــــــــــ ـــــــــــاية شـــــــــــــــــــــهيد

[of_hon]

المشاركة الأصلية كتبت بواسطة Romeeoo اكيد طبعا كلامك ميه ميه بس ماتنساش ان الحسنة بتعم مثلا انا كنت راجع من اسكندرية وقفنى امين شرطه بيقولى الرخص وريتهاله قالى الرخصة مش بإسمك ليه وفين التوكيل؟ وخد 20 ج كده وكده

يص ياباشا ده من اكتر الحالات التي بتكرر معانا كلنا ( وانا معاكوا بس انا رد فعلي بيبقي غريب شوية )

اغلب الحالات الامين ( مش الضابط ) بيبقي واقف عشان يطلع سبوبة مش عشان الشغل
فيه هنا حالتين :
لو فيه ضابط واقف في اللجنة : وهنا والتصرف ده فيه واحد عمله معايا وانا شغال ايام التدريب كنت واقف في لجنة جالي أمر علي الجهاز فسبت اللجنة ورحت الأوضة بتاعت اللجنة عشان أخلص ورق وبتاع فقولت للأمين شوف انت الشغل علي بال ما اجي ولعب الدنيئة معايا وقلب فلوس من واحد تقريبا 50 جنية وبعد شوية وانا في الأوضة لقيت راجل شكلة محترم قوي وكبير في السن قالي باشا انا عايز أقولك حاجة قولتلوا اتفضل قالي الأمين اللي بره خد مني خمسين جنية وقالي انها ليك قولتله ايه دليلك قاليالخمسين جنيه اللي معاه مقطوعة من طرفها قولتله والله ما اعرف حاجة عن كده وطلعتله كل الفلوس اللي في جيبي وقولتله فتشني لو عايز قالي يبقي الامين بيلم فلوس باسمك قولتله سيبهولي وعلي الفور استدعيته عندي في الأوضة و خليت زمايله يكلبشوه وخدت علي القسم ورحت انا والراجل وعملتلوا محضر ( الصراحة المأمور ما كنش راضي واتخنق مني بعديها ليه مش عارف ) والامين ده دخل محكمة عسكرية اتفصل فيها من الخدمة وراح بعديها النيابة وما اعرفش خد فيها كام سنه محبتش اتابع وفي الأخر طلع الراجل الكبير ده مفتش داخلية وكان عايز يشوفني هتصرف ازاي والحمدلله خدت ثناء في ملفي بعتز بيه جداااا .
أنا شايف انك ولو عملت كده يبقي دي خدمة كبيرة قوي للمجتمع اللي انت عايش فيه وللضابط برده وهيخلي الناس اللي بتنزل معاه خدمات تخاف منه وتعمله حساب علي الأقل ياخي في يومه هيخافوا يعملوا حاجة .


أما لو مفيش ضابط واقف خالص طول ماورقك سليم وكل حاجة معاك تمام تنح معاه وحسسه انك فاهم وانه مش هيطول منك لا أبيض ولا أسود لان تمام ومتقعدش تقولي ما هو ممكن يتلكك ويطلعلي القطط الفطسانة والحاجات دي ولو اضطريت تدفع مثلا مخالفة أو حاجة المفروض متبقاش مخالفة بص كوبس قوي في الوصل وشوف ماضي باسم مين والتاريخ وكله تمام سيبه واطلع علي القسم واعمله محضر أو علي النيابة وحقك هيجيلك هجيلك .

بس المشكلة عندنا السلبية وكله يقولك انا مالي هو أنا فاضي مادفع وخلاص خليني اروح وكلام فاضي ملوش لازمة وفي الأخر الناس تشتكي وتقولك لازم تسلك نفسك كل بالفهلوة و الفكاكة .

اعتقد كلامي منطقي .

[of_hon]

المشاركة الأصلية كتبت بواسطة sh_masry (وكله ناسي الضباط المحترمة اللي بتموت عشاني وعشانك اظن لما انت تبقي في العيد بتعيد مع أهلك وبتضحك وتهزر وحياة لذيذة أظن الضابط اللي واقف في نقطة التفتيش ولا اللي طالع مأمورية في الجبل وشايل روحه علي كفه ) يا سيدى الفاضل مع احترامى لكل ضباط الشرطه المحترمين , بس للأسف فيه ظباط تانيه كتير بتنسى ان فيه شعب كتير منه برده محترمين و متعلمين و مثقفين و لكن كل ده بيتنسى و بتطلع الأنا بتاعه السلطه و النفوذ ..... و بعدين زى ما فيه سهداء فى الشرطه فيه برده شهداء فى الجيش و الحربيه و جميع القوات المخوله بحمايه البلد من الداخل و الخارج ... و بقول حمايه مش ارهاب و عنف و قله ادب ...... و حتى فيه شهداء كتير من المدنيين زى اللى بيعدى الشارع و يموت ده نحسبه عند ربنا شهيد ان شاء الله و برده اللى تقع عليه عمارته و اللى يموت من الضرب فى القسم و اللى يتهان و من كتر الأهانه من ذوى السلطه يجيله سكته قلبيه و يموت و اللى بيتكهرب و يموت شهيد و اللى يدخل عليه بلدوزر بالأمر من ذوى السلطه و يوقع بيته فوق دماغه شهيد .......... يا سيدى الفاضل , الأقدار مكتوبه عند ربنا من يوم ما خلقت الأرض و حتى يوم الساعه , و اللى بيطلع المأموريات اللى حضرتك بتقول عليها دى بيطلعها من واجبه و لأداء شغله اللى بيأخذ عليه مرتب من الضرائب اللى بيدفعها الشعب علشان حمايه الشعب مش بيطلعها حبا فى الخير و ان كان حبا فى الخير يبقى ربنا يجازيه جزاء خير ان شاء الله و اللى بيقف فى نقاط التفتيش دى فى العيد ان كان محترم و ذو شخصيه محترمه فأهلا و سهلا به و نتمنى له كل الخير و المحبه و ان كان واقف علشان يعتت الناس اللى بتعيد و هو مش عارف يتفسح و يعيد و ينفسن على البشر يبقى ربنا ينتقم منه قادر يا كريم و اخيرا نحن حتى ان تذكرنا الشهداء من جميع الوظائف فلن نوفيهم حقهم و لكن من يتذكر الأحياء ؟؟؟؟؟؟؟؟؟؟ يا استاذى لك كل الشكر للتذكره و لكن الموضوع بقى اكبر منى و منك كتير و ربنا يوفقك و يعينك لما فيه الخير لنا و لك .

ياباشا شكلك متشائم قوووي بس حضرتك اكدت علي كلامي اللي انا قولته لازم نبين الأبيض ونقوله احسن والأسود لازم نكشغه ونعريه قدام الناس عشان يبقي عبرة لغيرة وفي كل المجالات مش الشرطة بس .

[mida012]

السيد المواطن تعليق بسيط

الاصل في مهنتك هو الاحساس بالمسئولية تجاه المربع الجغرافي اللي انت عايش في

يعني مثلا

زمان كان الناس لازم يكون معاهم شخصية جريئة قوية يتلموا عليها الناس عشان يتقووا بيها لية لانة حاسس وحسسهم بمسئولية منة عليهم وبالتالي اكيد في مشقة من تحمل مسئولية حمايتهم

يبقي مهنتك مش مرغوبة في زمنا لية لان اليومين دول مفيش حد بيتحمل مسئولية اللي حوالية دة الناس جوة بيوتها مش طايقين يتحملوا مسئولية بعضهم من التصدعات الاخلاقية البيئية العولمية المتتطرفة

اذن لو الناس او الشباب فهموها كدة ( وظيفتك يعني ) هتلاقي طوابير التقديم اللي كل سنة بتزيد فاضية ايوة مش دورهم ولا شخصيتهم ولا حتي تربيتهم الناس دي اتربوا علي طريقة 3 5 2 كلة مع نفسة

يبقي ساعتها محتاج اجابة منك واللي دخل الكلية واللي اتخرج وموجود في اي مكان تابع لوزارة الداخلية السؤال بيقول علل؟ يعني افطن هههههه


هل انت لمي اخترت المكان دة فكرت في كل اللي انا قولتة علي الشخصية والمسئولية واللي واللي


هل لو الكلية بتاخد واحد متفوق علميا يعني من الاخر مجموعة كبير ( بالبلدي مثقف شاطر طول عمرة مميز دماغة نضيفة ) كنت هتلاقي الاشكال الغريبة دي بتخد في الاقسام دة اذا لقيت حد من الناس الشاطرة يوافق انة يضحي عشان بلدة

[sh_masry]

mida012 اعذرنى انا مش فاهم من كلامك حاجه ههههه , ربنا يكون فى عونك يا of_hon و رد بقى يا معلم ههههههههه
ياريت توضحلنا شويه كلامك يا mida012 علشان بجد انا تهت منك انت بتتكلم عن ايه ؟

[Romeeoo]

والله يا جماعة انا رأيى مانحاولش نزهق الراجل المحترم ده ودى فرصة عشان نستفسر منه نتصرف ازاى فى المشاكل اللى بتقابلنا