روحت التوكيل اعمل صيانة

[waleed_es]

رغم إنى حزين لأن مفيش ولا واحد فى المنتدى كتب تجربته مع التوكيل عند الذهاب للصيانة، لكن برضه هقولكم عن تجربتى فى صيانة 10 الاف كيلو. أنا روحت امباح توكيل العبور اعمل صيانة ال 10 الاف، وطبعا بحاول قبلها بشهر ان أحجز لكن كتير محدش بيرد وبعدين قالولى بيانات الصيانة اللى فاتت مش مسجله عندنا وهاتلنا رقم الشاسية اللى كان فى الرخصة والرخصة فى العربية وبنسى كل يوم اجيبها معايا او اجيب رقم الشاسية، المهم علشان موجعش دماغكوا حجزت لكن ميعاد الحجز كان غصب عنى هعدى ال 10 الاف ومش عارف اعمل ايه فى موضوع الزيت، سألت هنا فى المنتدى لو فيه خطورة انى اسيب الزيت لما اروح الصيانة حتى لو زادت الكيلوهات محدش للأسف عبرنى، المهم خفت على العربية وغيرت الزيت بره ومعاه الفلتر طبعا. لما روحت بقى وقولتلهم الكلام ده عملولى محاكمة، دى كده تخرج من الضمان ومش عارف ايه، المهم بعد جدال قالولى اخر مرة تغير بره وقولتلهم ماشى. من المرة اللى فاتت كان فيه عندى مشكلة فى صوت التكييف وقالى المهندس ان المرة الجاية هنكشف على المروحة وممكن نغيرها فى الضمان وكان عندى صفارة فى التيل الخلفى لما امسك فرامل على البطيء وقالوا عملناها وبعد ما مشيت فوجئت انها موجودة زى ما هى. أكدت انا امبارح على الجزئية دى والحمد لله اتحلت يوم واحد بس والنهارده موجودة تانى. نسيت اقولكم انى لما اتحركت بالعربية لقيتها موجودة ورجعتلهم تانى وقالوا عملوها من غير ما يبصوا على تيل ولا غيره تقريبا استخدموا كمبروسور الهواء وراحت امبارح واشتغلت تانى النهارده. ناس زووق زووق زووق. الحاجة التانية كان عندى خبطة فى الكشاف اليمين،خبطه من حنطور راكبه حنطور، المهم خبط الرفرفر واثر على الكشاف ، المشبك اللى ماسكه من فوق اتكسر، فقولتلهم حلولى المشكلة دى، البيه قالى لازم نغير الكشاف بالكامل لأن الإطار اللى اتكسر ده مش موجود. ونسيت اقولكم التكييف قالى معلش اصل لازم العربية تبات عندنا، وكان المرة اللى فاتت زميله قالى تيجى بس بدرى، وفعلا جيت بدرى (اتأخرت ساعة الا ربع بس ههههه). المهم احلى حاجة ان العربية اتغسلت وانا ماشى وبالشفا، دا توكيل رينو العبور، ويارت اسمع ردودكم وتجاربكم اللذيذة.

[ringoo]

هعدى ال 10 الاف ومش عارف اعمل ايه فى موضوع الزيت

1000 كيلو مش حتكون مؤثرة .. عادى .. لكن متنساش نفسك بالذات انت عارف ان دى اول تغييرة زيت للوجان والمفروض انها تكون بدرى شوية
لكن زى ماقولتلك مافيش مشكلة فى 1000 كيلو كدة زيادة مافيش مشكلة ولا على العربية ولا على الضمان
لو عايز تروح لاى بنزينة والعامل يكشف عليه ويأكدلك الكلام علشان تطمن
......................... ......................... .

المهم خفت على العربية وغيرت الزيت بره ومعاه الفلتر طبعا. لما روحت بقى وقولتلهم الكلام ده عملولى محاكمة، دى كده تخرج من الضمان ومش عارف ايه، المهم بعد جدال قالولى اخر مرة تغير بره وقولتلهم ماشى

الكلام دة يبلوه ويشربه ماءه ... لكن مافيش شك ان العمالة فى التوكيل فنيا كويسين وتقة والصيانات كويسة
لكن انك تغير زيت برة التوكيل مش قضية خالص .
طيب عشان نكون واضحين شوية تغير الزيت فى اللوجان ان مكان الفلتر مزنوق شوية ومحتاج مفك معين علشان يتفك
لو الفلتر بتاع العربية مظبوط والعامل خارج التوكيل عنده المفك وانت تقول للعامل ان العربية بتاخد 3.5 لتر زيت بغض النظر عن نوع الزيت اذا العملية زى الفل ويغير على خير ان شاء الله
......................... ..............

من المرة اللى فاتت كان فيه عندى مشكلة فى صوت التكييف وقالى المهندس ان المرة الجاية هنكشف على المروحة وممكن نغيرها فى الضمان وكان عندى صفارة فى التيل الخلفى لما امسك فرامل على البطيء

موضوع الصفارة دة بقى منتشر اوى بسبب المادة اللى شالوها من التيل وبقى مكانها النحاس ... وساعات التيل بيصفر لما يتكون علية تراب عموما جرب تقولهم تانى واشتكى بسبب الموضوع على الاقل تفهم السبب وعامتا هو مش طبيعى
......................... ...........
ربنا يسهل وملاحظاتك كلها تتحل فى الصيانة القادمة

[sameh2009]

انا عملت صيانة 5000 كيلو من شهر تقريبا ولما روحت سألوني العربية معاك من امتي فقلت من خمس شهور"معدل استهلاكي تقريبا 1000 كيلو في الشهر"قالولي ان صلاحية الزيت في المحرك 6 شهور فقط واني بكده المفروض اني اغير زيت وفعلا غيرت زيت وده على عكس ما سمعت هنا في المنتدي ان غيار الزيت بيكون في صيانة ال 1000 وقالولي ان كده هنغير زيت في كل صيانة يعني كل 5000 كيلو ,مش عارف الكلام ده مظبوط ولا لأ؟
تاني حاجه كان فيه عيال تقريبا لعبوا في كالون الشنطة وحشروا حاجات فيه ومن يومها الشنطه مش بتفتح بالمفتاح خالص وقولتلهم في الصيانة ,حاولوا يصلحوه بس معرفوش ,المهم قالولي محتاج كالون جديد وهنسأل الأول في التوكيل ونرد عليك,وبعدها تقريبا ب 3 اسابيع اتصلوا وقالولي الكالون موجود وتعالى ركبه وفعلا رحت وركبوه ومدفعتش ولا مليم.

[waleed_es]

المشاركة الأصلية كتبت بواسطة sameh2009 انا عملت صيانة 5000 كيلو من شهر تقريبا ولما روحت سألوني العربية معاك من امتي فقلت من خمس شهور"معدل استهلاكي تقريبا 1000 كيلو في الشهر"قالولي ان صلاحية الزيت في المحرك 6 شهور فقط واني بكده المفروض اني اغير زيت وفعلا غيرت زيت وده على عكس ما سمعت هنا في المنتدي ان غيار الزيت بيكون في صيانة ال 1000 وقالولي ان كده هنغير زيت في كل صيانة يعني كل 5000 كيلو ,مش عارف الكلام ده مظبوط ولا لأ؟ تاني حاجه كان فيه عيال تقريبا لعبوا في كالون الشنطة وحشروا حاجات فيه ومن يومها الشنطه مش بتفتح بالمفتاح خالص وقولتلهم في الصيانة ,حاولوا يصلحوه بس معرفوش ,المهم قالولي محتاج كالون جديد وهنسأل الأول في التوكيل ونرد عليك,وبعدها تقريبا ب 3 اسابيع اتصلوا وقالولي الكالون موجود وتعالى ركبه وفعلا رحت وركبوه ومدفعتش ولا مليم.

شكرا يا سامح على مشاركتك ويارب بقية الاخوة الموجودين فى المنتدى ميبخلوش علينا بتجاربهم علشان كلنا نستفيد، بس مقولتش يا سامح المكان اللى روحته فين، العبور ولا المقطم ؟؟؟

[sameh2009]

العفو يا استاذ وليد.احنا كلنا بنستفاد من تجارب بعض
الصيانه كانت في العدوي وده بين مدينة المنصورة وسمنود , بس ياريت حد يرد عليا في موضوع ان صلاحية الزيت في المحرك 6 شهور والكلام ده صح ولا لأ؟