انا ماشي غلط ايه المشكلة !!

[hazem_khidr]

قدر الله و ما شاء فعل يا محمد
تصرفك صح و انا قايلك امبارح لما كلمتني
ال 300 جنيه مش مبلغ بس كان لازم يتأدب و انا لو مكانك كنت حملته تمن الدهان كمان.
امبارح كنت مسافر القاهره لقيت كميه غباوه و استهبال علي الطريق مالهاش حصر
لدرجه اني كرهت الطريق و ختمت في القاهره و انا داخل التحرير من عبد المنعم رياض
ماشي عادي و فجأه لقيت عربيه اوبترا داخل في اليمين و انا بعدي قمت واخد سنه يمين و فرامل و زماره
و البيه ماشي ولا همه قمت محصله و فاتح الزجاج (اصل كنت مشغل التكييف عقبال عندك )
و بقوله ينفع كده يعني (كان معاه مراته و اولاده)
يقوم يقولي انت اللي غلطان قولتله انا ماشي في حارتي ماجتش ناحيتك
فقالي واحد بيعدي قدامي فجأه قولتله يعني دا يديك الحريه تخبطني ما تمسك فرامل ولا تعمل اي حاجه
و روحت مكمل شتيمه و سيبته و مشيت!!!!
يعني غلطان و بيقاوح ولما اتزنق يقول كان واحد معدي في وشي
هو خلاص يعني مافيش حد بيعترف بغلطته
حسبي الله و نعم الوكيل

[mercedes]

المشاركة الأصلية كتبت بواسطة hazem_khidr قدر الله و ما شاء فعل يا محمد تصرفك صح و انا قايلك امبارح لما كلمتني ال 300 جنيه مش مبلغ بس كان لازم يتأدب و انا لو مكانك كنت حملته تمن الدهان كمان. امبارح كنت مسافر القاهره لقيت كميه غباوه و استهبال علي الطريق مالهاش حصر لدرجه اني كرهت الطريق و ختمت في القاهره و انا داخل التحرير من عبد المنعم رياض ماشي عادي و فجأه لقيت عربيه اوبترا داخل في اليمين و انا بعدي قمت واخد سنه يمين و فرامل و زماره و البيه ماشي ولا همه قمت محصله و فاتح الزجاج (اصل كنت مشغل التكييف عقبال عندك ) و بقوله ينفع كده يعني (كان معاه مراته و اولاده) يقوم يقولي انت اللي غلطان قولتله انا ماشي في حارتي ماجتش ناحيتك فقالي واحد بيعدي قدامي فجأه قولتله يعني دا يديك الحريه تخبطني ما تمسك فرامل ولا تعمل اي حاجه و روحت مكمل شتيمه و سيبته و مشيت!!!! يعني غلطان و بيقاوح ولما اتزنق يقول كان واحد معدي في وشي هو خلاص يعني مافيش حد بيعترف بغلطته حسبي الله و نعم الوكيل

السلام عليكم و رحمة الله و بركاته

الراجل ده بقى لازم هوا كمان يتعمل فيه نفس اللى هيتعمل فى الراجل بتاع النص نقل اللى خبط المرسيدس ال 84 , بس ده بقه لازم يكون أدام مراته و عياله , عشان عياله يكبروا و يتعلموا , أن اللى أبوهم عمله ده غلط و لما يكبروا مايعملوش كده , و أهو نبقى كسبنا فى العيال ثواب و علمناهم حاجة للزمن بدل مايطلعوا يعملوا زى أبوهم .

مرسيدس اس 550

[hazem_khidr]

ما تقلقش يا مرسيدس
ماهو انا تعمدت اهزقه قدام مراته و عياله علشان يعرفوا انه راجل مهزأ
بصراحه انا اديته من المنقي خيار زي ما بيقولوا و طلعت اجري كان نفسي يجري ورايا علشان اقف عند اول ضابط في ميدان التحرير ابهدله

[بدر بسيونى]

قدر الله وماشاء فعل والحمدلله انك سليم

بعيدا عن اى حاجة تموت من الغيظ انك تبقى غلطان وبتاوح فى رائ دى قمة قلة الادب

برغم من انى مابخدش عوض فى الادب العادى بس الراجل ده انا حاخد منه عشان ماشى عكس وقليل الادب

واخلاقيات مجتمع بتنهار فعلا الغلط ساد والصح عملة نادرة

واهم حاجة انك بخير

[mohamed ibiza]

مشكورين يا جماعه علي الردود

والله الواحد ما عارف يعمل ايه في البلد دي و مع الناس كل يوم الحال بيبقي من اسوأ لأسوأ

و والله في الحاجات دي والدي مبيرضاش ياخد عوض اساسا بس حاجة تحرق الدم لما واحد غلطان و بيزعق و بيقاوح في غلطه اللي هو طب كده يبقي تعالي و ادفع و اتحرق في الفلوس بقي عشان تتعلم و تحترم نفسك بعد كده و الناس و الطريق اللي انت ماشي فيه

و النهارده بأذن الله هستلم العربية و هصورلكو الباب اتعمل فيه ايه و انتوا هتشوفوا و هتقدرو السرعة اللي دخل فيا بيها كانت عامله ازاي

و ربنا يحمينا جميعا من الحوادث و شرها