مشاكل توكيل منصور شيفروليه
انا اشتريت شيفروليه كروز 2013 الشكل الجديد هي كعربيه ممتازه من كلو ثبات و سحب و شكل و اداء مشابه للالماني بس مشكلتي مع التوكيل لانهم مش فاهمين يصلحوا العربيه ازاي.. من اول صيانه و انا حاسس ان في مشكله في الفرامل و روحت الفرع الرئيسي في الصحراوي و قلت على المشكله قالولي الفرامل سليمه بس للامان اكتر نغير تيل امامي استغربت ان العربيه مش مكمله 5000 كيلو و عايزه تيل كبرت منهم و قلت خاليه في صيانة 10000 اغيره المهم فعلا ده حصل .. بعدها عملت حادثه و غيرت باب خلفي يمين و اكصدام امامي و جنط لان شغلي في اسماعيليه و انا ساكن في الهرم عملت حادثه على الدائري و انا راجع من الشغل و روحت التوكيل فرع الصحراوي عشان اصلح العربيه و غيروا الباب و الاكصدام و الجنط و لما روحت استلم العربيه لاقيت شغل زفت و تفنيش العربيه ازفت في فروق باينه في الاكصدام و الباب برده و باين انهم راشيين مش شغل توكيل ولا حتى بوهيجي تحت الكوبري اشتكيت طبعا و روحت لمدير قسم الصيانه مجدي سالم و واحد اسمه محمد التهامي دخلوا العربيه تاني و برده بعدها الشغل طالع وحش و انا الصراحه قرفت و قررت استلم العربيه عشان اعرف اسافر شغلي لان بقالي 10 ايام من غيرها و زهقت مع الوعد مهم ان لما اجي اعمل الصيانه الدوريه هيظبطوا الفروق و كل ملاحظاتي على العربيه .. بعدها رجعت مشكلة فرامل العربيه وقتها كانت عامله 15000 كيلو و ده ثابت في ريبورت العربيه ان في رعشه بعد سرعة 100 كيلو و دخلت الصيانه و قالولي برده مفهاش حاجه و انهم ظبطوا الفرامل كبرت دماغي و فضلت فتره متعايش مع العيب لانه شويه يظهر و شويه يختفي لغاية لما جبت اخري و العيب بقى ظاهر اوي و موجود باستمرار و روحت التوكيل قالولي عايزه طنابير و تيل امامي و طبعا مسكتش و بعد زعيق و شتيمه اتفقت معاهم اغير الطنابير في الضمان و اتحمل من تمنها 30% و التيل على حسابي و بعد فتره العيب ظهر تاني و روحت عملت مشكله تاني و غيروا الطنابير في الضمان من غير ما اتحمل اي حاجه ,, بعدها الفرامل بقت ضعيفه عن الاول و روحت تاني و طلبت مهندس يطلع يجرب عشان مصورش قتيل في التوكيل و فعلا طلع معايا مهندس اسمه/ عمرو رشاد و فعلا قال الفرامل ضعيفه و فيها مشكله غير الباب الخلفي يمين الي متغير في التوكيل بيسرب هوا من الشوراعه و زوايا العربيه مش مظبوطه و العيب ده من اول ما جبتها و كل شويه يصلحوها و الزوايا برده بايظه و غير التكييف بيدخل ريحه برغم من ان البوابات مقفوله كل ده ثابت في الريبورت و هنزل صوره منه .. المهم العربيه دخلت عشان العيوب دي تتصلح و برده غيروا تيل و طنابير و استلمت العربيه و انا رايح شغلي بعدها عملت حادثه بسبب الفرامل و كنت هروح فيها و الحمد لله ربنا ستر بس العربيه اتخبطت طبعا في الرفرف الامامي يمين و الاكصدام الخلفي غير المرايات و غير العربيه الي خبطها و صلحتها على حسابي بعدها روحت عملت محضر في نيابة الهرم و عملت شكوى في حماية المستهلك .. و لما قعدت مع حماية المستهلك و وريتهم ريبورتات العربيه قالولي العربيه دي فيها عيب صناعه و لازم تتغير و الشكوى مشيت و قعدت مع التوكيل في جلسة تفاوض و طبعا عاملوا من بنها و طلبت ان العربيه تتفحص تبع الجهاز و فعلا روحت هندسة عين شمس و دفعت 1400 جنيه رسوم فحص و بعد كده التقرير طلع غريب جدا و مضمونه ان العربيه كحاله عامه ممتازه بس فيها عيوب و هي قطع في قعدة الموتور , باب خلفي يمين بيسرب هواء , فرامل بترعش بعد 100 كيلو , التكييف بيسرب ريحه و هو شغال , زوايا مش مظبوطه , صوت غير طبيعي صادر من التابلوه .. كل العيوب دي و العربيه حالتها ممتازه ازاي غير ان المهندس الفاحص قايل اني مركب فرش جلد و سبويلر و زينون و نواكل على الابواب و سينسور بارك و ان سبب صوت التابلوه راجع للحاجات الي ركبتها دي طيب ازاي يا محترم حاجات خارجيه بتاثر على تابلوه العربيه غير ان التقرير انتهى الى ان العيوب دي في منها مناسب للكيلو متر المقطوع و محددش ايه العيوب المناسبه للكيلو متر و ايه العيوب الي بسبب التوكيل او عيب صناعه .. تقرير باهت و ركيك و باين انه معمول بالحب ,, انا مسكتش و عملت مذكره في النيابه و مكتب وزير التموين و شاكيت المهندس في جهاز حماية المستهلك و الموضوع خلاص هينزل جلسه في المحكمه الاقتصاديه .. مع العلم ان التوكيل رفض يبعت صوره من هيستوري العربيه بالصيانات كلها الا لما النيابه العامه بعتتلهم و عملتلهم محضر تاني بالرفض ده ,,راحوا بعتوا الهيستوري للنيابه بعد ما رفضوا يبعتوا لجهاز حمياة المستهلك .. كل كلامي ده موثق بورق هرفعه دلوقتي مع الشكوى دي ., و كل واحد لي مشكله مع منصور ميسكتش عشان دول فاكرين ان البلد سايبه وانا والله ما هسبهم و هاخد حقي باذن الله و اي واحد عنده مشكله معاهم زي بتاعتي يقولي و هعرفه يعمل ايه و ان شاء الله الحق هيرجع .. انا اسف على الاطاله بس لازم كنت افضحهم و اوري الناس انهم مش بيرعوا سلامة العملاء بتوعهم.
|
15-12-2014, 11:30 PM
المواضيع المتشابهه
