سؤال بخصوص قاعدة الفتيس والشكمان

[ahmedraafat00]

السلام عليكم

انا يا جماعه الفتره اللى فاتت كان عندى مشكله فى الدبرياج كان سايب خالص والمشكله اتصلحت بعد ما فكينا الفتيس وغيرنا الديسك والعربيه بقيت تمام اوى
بس الميكانيكى بعد ما خلص قالى ان فى حته صغيره فى الشكمان من قدام عايزه تتلحم وكده قولتله هنبقى نعملها قريب المهم النهارده هوه اللى اتصل بيا بيقولى ايه لسه معملتهاش انا استنيتك تتصل بيا وبتاع !!!!!!
انا استغربت اوى للأهتمام ده وخصوصا ان امبارح السايس بتاع الجراج كلمنى وقالى ان فى ناس جم يشوفوا العربيه عشان يشتروها وكانوا عاوزين مفتاحها يشوفوها من جوه وقال ايه انا اللى باعتهم !!! وانا مبعتش حد ومش عاوز ابيعها اصلا وانا شكيت انه يكون هوه اللى باعتهم والله اعلم
الميكانيكى لما اتصل بيا النهارده قالى امتصلتش بيا عشان نعمل الشكمان يعنى قولتله اه هشوف عالاسبوع الجاى واكلمك هيا مش حته عاوزه تتلحم قالى اه بس هنحتاج نفك قاعده الفتيس !!!
وانا الصراحه مش عاوز افتح فتوحه تانى والعربيه لما جربتها الفتيس تمام ومفيش مشكله انا هرفع لحضراتكم صوره صورتها للعربيه من تحت ياريت تقولولى هل فعلا لازم نفك قاعده الفتيس عشان نلحم الشكمان ولا لا ؟؟؟ علما ان الحته اللى عاوزه تتلحم قدام فعلا عند الفتيس
وادى الصوره :

وهل القاعده دى هيا اللى سانده الفتيس يعنى لو تفكيت الفتيس هيقع ولا فى مسامير ماسكاه ؟

[ahmedraafat00]

انا عديت على الولد الميكانيكى من غير العربيه لانه جنبى أسأله هوه بعت حد يشوف العربيه وقالى لا
بعد كده بسأله ايه حوار لحام الشكمان ده ؟! لقيته بيقولى هنفك القاعده ونلحم تحتها ونغير القاعده بتاعت الفتيس عشان وحشه قولتله انت مقولتليش انها وحشه لما فكيت الفتيس قولتلى بس عاوزين نلحم الشكمان قالى ايه ده انا مقلولتلكش ؟ تلاقينى كنت ملخوم فى الدبرياج بس وانت لازم تغيرها عشان دى واطيه وممكن لو اتفكيت مش عارف تحتاج تغير كذا حاجه وبتاع وهيا تمنها 250 جنيه !!!!!!!
انا حاسس انه بيشتغلنى الصراحه يعنى هوه اللى يتصل بيا النهارده ويقولى ايه ياباشا ملكمتينش يعنى عشان نعمل اللحام والقاعده هوه اللى يتصل معقول جدع وخايف عالعربيه للدرجادى ؟!!!!!! حاسس انه عاوز يطلع بمصلحه والسلام وخصوصا انه هوه اللى بيشترى قطع الغيار وهوه اللى هيجيب القاعده دى ده لو هيا عاوزه تتغير اصلا وانا مصورها لحضراتكم فى المشاركه اللى فوق ياريت لو حد يقدر يقولى هيا كويسه ولا فعلا عاوزه تتغير !

[aldesha989]

روح لواحد تانى واقلب الميكانيكى ده شكله عايز يعمل مصلحه ويفتح لنفسه شغل عليك الله الغنى

موضوع الناس ده فعلآ مقلق والله اعلم مين اللى بعتهم بس اركن العربيه فى حته امان وما تسيبش المفتاح نهائى مع اى حد وبلغ السايس انك مش بتبعت حد يشوف العربيه ابدآ ولا حد يشوف العربيه نهائى وانك انت بس اللى بتجيبها وتاخدها فهمه ان مش اى حد يقوله حاجه يصدقها

وربنا يسترها معاك اعوذ بالله من الهم اللى احنا عايشين فيه

[ahmedraafat00]

شكرا ياباشا على الرد والاهتمام
المشكله ان الميكانيكى ده شغله نضيف الصراحه وانا مصدقت لقيت حد بيفهم فى الجيب
وبالنسبه لموضوع الناس ده اللى مجننى فعلا يعنى لو كانوا دخلوا اتفرجوا عليها عادى لكن المشكله انهم قايلين ان انا اللى باعتهم !
وبالنسبه للأمان انا بركنها فى جراج وكمان بما انى مش بخرج بيها غير مره او مرتين فى الاسبوع فبتبقى مركونه جوه خاااااااااالص فى اخر الجراج وعشان اطلع بيها لازم اخرج عربيتين تلاته وكمان اقول للسايس قبلها وده اللى مطمنى شويه
وطبعا المفتاح بيبقى دايما معايا وانا قولت للسايس النهارده متخليش اى حد يخرج بالعربيه خالص ولا ميكانيكى يجي يقولك انا جاى اخد العربيه والاستاذ باعتنى لو فى حد هياخدها انا هكلمك اوقولك
وربنا يسترها علينا يارب

[ahmed_eng2001]

موضوع الناس الى جات تتفرج على العربية من غير ما يتعرفه دول مقلق جدا !!!!!
ربنا يحفظك و يحفظنا جميعا

ياريت حضرتك انت الى تجيب قطع الغيار بنفسك .... انا مش بقول ان الميكانيكى حيسرقك او حيركب قطع غيار قديمة على انها جديدة ..... انت الى لازم تعرف ايه الى ركبتوا فى عربيتك و دى احسن حاجة فى السوق و لا لأ ..... ده عن تجربة مع 2 ميكانيكية ... واحد هو الى كان بيجبلى قطع الغيار ... و التانى كان بيخلينى انا الى اروح اجيب قطع الغيار

اما بالنسبة لقنطرة الفتيس ..... اعتقد و الله اعلم .. ان حضرتك لازم تسند الفتيس الاول ... و بعدين تفك القنطرة .... تلحم الى انت عاوزه و بعدين ترجع تركب القنطرة تانى .....
مش حينفع تسيب الفتيس محمل على الموتور و بس .... و خاصة ان حضرتك عندك فتيس غرز كمان ... يعنى مجموعة الفتيس حتكون تقيلة شوية

ممكن اقترح عليك حاجة ؟؟ ممكن تفك الشكمان من عند الفرن .... و تخرجه كله بره و تلحم الى انت عاوزه و ترجع تركبه تانى .... اعتقد انه حيكون حل افضل لو ينفع انه يتعمل

اه ... فيه مسمار مش مربوط كويس فى القنطرة !!!!