ارشيف الاستراحة 2011

[M.TONSY]

والله انا احلامى وطموحاتى على المستوى العام وبالتالى لما تتحقق هتنعكس على كل واحد فينا واحلامى هى
1-نرجع تانى بلد متحضر فى كل حاجة يعنى نظام فى المرور التزام كامل بالقوانين كل واحد يبقى عارف اللى ليه واللى عليه شوارعنا تبقى نظيفة المساحات الخضراء تزيد واخلاقنا مع بعض تكون كويسة وكل واحد يخاف على زعل التانى
2-نبقى من اقوى كيان اقتصادى وزراعى وصناعى وامريكا تاخد مننا مساعدات علشان تواجه الاعاصير ونداينها
3-نكون الاتحاد العربى ونفرض من خلاله عقوبات عربية دولية على اسرائيل ونعمل عليها حصار
ولسة فى احلام كتير حلوة بس دول يارب يتحققوا

[abu_ruqayyah]

المشاركة الأصلية كتبت بواسطة tonsy1979 والله انا احلامى وطموحاتى على المستوى العام وبالتالى لما تتحقق هتنعكس على كل واحد فينا واحلامى هى 1-نرجع تانى بلد متحضر فى كل حاجة يعنى نظام فى المرور التزام كامل بالقوانين كل واحد يبقى عارف اللى ليه واللى عليه شوارعنا تبقى نظيفة المساحات الخضراء تزيد واخلاقنا مع بعض تكون كويسة وكل واحد يخاف على زعل التانى 2-نبقى من اقوى كيان اقتصادى وزراعى وصناعى وامريكا تاخد مننا مساعدات علشان تواجه الاعاصير ونداينها 3-نكون الاتحاد العربى ونفرض من خلاله عقوبات عربية دولية على اسرائيل ونعمل عليها حصار ولسة فى احلام كتير حلوة بس دول يارب يتحققوا

اكيد كلام حضرتك جزء كبير من احلام كل مصري وعربي ويارب يارب فى يوم من الايام يتحقق

[mar mar]

مش عارفه ليه كل واحد عمال يقول حاجات عامه
انتم خايفين ان الناس تعرف احلامكم

انا هبدا بانفسي
علي المستوي الشخصي
باالنسبه للشغل نفسي يوصل للي انا عايزاه ساعات بزهق وامل منه واقول البنت في الاول وفي الاخر مسيرها لبيتها بس بيجين قوه واراده اني عايزه اكبر بالشغل ده بس مش عارفه ليه لحد دلوقتي واقفه محلك سر مش بتحرك سم
احلامي وانا صغير في الشغل كن نفسي ابقي مرشده سياحيه والف مصر كلها لكن الوالدين عندي مرضيوش اني ادخل مجال السياحه
حلمي اللي كان علي المستوي الشخصي نفسي يبقي ليا حجه بتااعتي يعني عماره شقه بيت محل اي حاجه نفسي يبقي ليا مشروعي الخاص اللي ابني عليه مستقبل واساس لاولادي وطبعا المشروع ده يكون مشترك فيه زوجي المستقبلي علشان هو اللي يديروا
نفسي في دنيا من غير مشاكل بحلم ان بيتي انا هيكون من غير مشاكل وعيالي وجوزي هما هيكونوا احسن ناس في الدنيا دي

بالنسبه لاحلام الطفوله
كان نفسي اطلع شاعره اديبه محترمه وحاولت اشترك اكتر من مره في مسابقات للشعر بس فشلت فيها عرفت ان الشعر اللي بكتبوا مجرد هوايه ولم يصل الي الاحترف
فبقيت نادر لما اكتب بس بعتز بكل حرف كتبتوا

زمان وانا صغيره كنت بقول انا مش هتم ال 20 سنه الا لما اكون
1 عندي حساب في البنك
2 ليا حياتي الخاصه بعيد عن عائلتي
3 مهمه جدا في شغلي والشغل مش يمشي من غيري
4 عندي عربيتي
5 عندي شقتي
6 مش ناويه اتجوز
7 ليا علاقات كتير واعرف كل الشخصيات المهمه في الدوله
من الاخر بزنس ومن
الله يرحم ايام زمان
واالله والواحد نفسه يرجع صغير



انا قولت يلا بقي كلوا يقول حقق ايه
عن نفسي مش حققت حجه لحد دلوقتي الاان بقي ليا عربيتي وفتحت دفتر توفير في 4جنيه ونص
لازم ابقي متفائله وابدا من الصفر

بحلم ان يكون عندي كيبورد اعرف اكتب بيه لان الكيبورد باظ ومكسل انزل اشتري واحد

[M.TONSY]

المشاركة الأصلية كتبت بواسطة corsair بحلم ان يكون عندي كيبورد اعرف اكتب بيه لان الكيبورد باظ ومكسل انزل اشتري واحد

تعرف انى بقالى شهور بكتب بـ On-Screen Keyboard بسبب العيال كل ما اجيب كيبورد يبوظوه ... انا بقى من احلامى الشخصية اجيب لابتوب محترم علشان ارتاح من ارف العيال خاربنلى الدنيا ...هههههه