ارشيف الاستراحة 2011

[dr.wael7yran]

نبدا بقى ..
طب الاطفال حديثي الولادة .. هو الجزء الخاص بطب الاطفال من بعد الولادة مباشرة و حتى سن 28 يوم ..
دخل مصر من زمان بس بدأ يتطبق و ينتشر في انصاف التمانينات كده ..
و لتقدم الحضانات في مصر فبفضل من الله انخفضت نسبة الوفيات بين المواليد في العشر سنين الاخيرة بما يفوق 70 %
يعني اهه .. بنعمل حاجة اهه ..
و طب الاطفال حديثي الولادة طب من نوع خاص ..
لانه العيان بتاعك لا بيتكلم و لا بيعبر و لا بيشاور و لا اي حاجة ..
ففي حوار بلغة غير مفهومة بين الطبيب او الممرض و الطفل لا يفهمها الا هو ..
و لا حتى ابوه .. و و لا حتى امه بتبقى فاهمة ايه اللي بيحصل ..
و ده بيتم اكتسابه عن طريق الممارسة و الخبرة ..
و كلمة الممارسة معناها سنتين على الاقل بعد سبع سنين كلية ترمي نفسك فى وحدة حضانات ببلاش و تنسى الدنيا بره علشان تتعلم ..
و الحضانة تقوم على عاملين مهمين ..
الجزء البشري .. التمريض و الدكاترة المهرة الخبرة
و التمريض في الحضانة اهم من الدكاترة ..
و الجزء التكنولوجي .. اي الاجهزة ..
و اجهزة الحضانات غالية جدا .. و في قمة التكنولوجيا ( موش القمة اوي ) بس قصدي اجهزة معقدة تكنولوجيا و بتحتاج خبرة و مهارة للتعامل معها و صيانتها ..
و الرعاية بالحضانات درجات مختلفة .. حسب القوى البشرية و الاجهزة الموجودة..
و اعلاهم الحضانة من الدرجة الرابعة و اللي ممكن تستقبل اي مولود عنده اي مشكلة ..
و الحضانات في مصر يا اما في
مستشفى جامعي ..
مستشفى تعليمي ..
مستشفى وزارة الصحة ..
مستشفى خيري ..
مستشفي خيري باجر رمزي ..
مستشفى خاص ..

و نكمل بعدين ...

[Neo206]

تسلم ياباشا

[د.هبه77]

المشاركة الأصلية كتبت بواسطة dr.wael7yran قاعدة البيانات موجودة .. و في رقم بتتصل بيه في وزارة الصحة و هو بيدور ليك على مكان فاضي

المشاركة الأصلية كتبت بواسطة dr.wael7yran في مستشفيات وزارة الصحة و المستشفيات التعليمية .. بس و كالعادة ..اجراءات عقيمة .. في حجز الحضانة و نقل الطفل الى الحضانة .. حاجة بتاخد 5 - 6 ساعات كده على اقل تقدير ...

هو دة قصدي مفيش معلومات عن الحضانات الخيرية ولا اللي باجر رمزي ولا الخاصة ويفضل بقي والد الطفل يلف بالعربية بين الحضانات ويسال بنفسه طب ولية مبكونش كل حاجه موجودة بمعني في حضانة خيرية فيها 4 اجهزة وفي باجر رمزي 200 جنية مثلا عادية و400 بتنفس صناعي في مكان معين يبقي انا وفرت وقت كتير

[dr.wael7yran]

علشان تفهمني اسمع الحكاية دي ..
و متخافش مفيهاش اطفال بتموت ..
كنت مرة قاعد مع رئيس قسم الاطفال فى مستشفى حكومي عام قريب جدا مننا ..
و كان قاعد يتكلم مع دكتور تخدير زميله قدامي على مركزنا و هو ميعرفش انه انا شريك فيه ..
- عارف في واد دكتور كان نايب عندي ( قصده على الاستشاري بتاعي ) فتح مركز خاص قريب من المستشفى و عنده 8 حضانات شغال ناااااار و المركز مبيفضاش ( ما شاء الله يا اخي ) بس عيب عليك انا خدت موافقة من الوزير و هعمل مركز حضانات 25 حضانة و همسحه باستيكة ..
و لان من علمني حرفا ..فانا اتغاظت من اخينا ده و رحت سأله ..
-حضرتك قولت عندك كام حضانة
- 25
- و عند حضرتك كام ممرضة في كل شيفت
- 2 او 3
- طب تعرف حضرتك انه النايب بتاعك عنده 8 حضانات بس و عنده 3 بنات في كل شيفت ..
و نقف هنا و نحاول نفهمكم ..
كل بنت (ممرضة ) يعني اخرها تمسك 3 حضانات
علشان تعرف تركز و تشوف شغلها ..
الاخ اه عنده 25 حضانة .. بس عنده 3 بنات في الشيفت موش هيعرف يشغل اكتر من 9 حضانات ..
و التمريض ده اساس نجاح او فشل الحضانة ..
و ممرضة الحضانات الشاطرة الخبرة عملة نادرة و مطلوبة دايما وفي اي حتة و في اي بلد ..
اما ده ليه عنده 3 بنات على 8 حضانات و ده ليه عنده 8 بنات على 25 حضانة
فالاجابة سهلة جدا ..
لانه ده بيدفع للممرضة موش اقل من 1500 جنيه شهريا.. غير الحوافز
و ده بيدفع للممرضة موش اكتر من 250 جنيه شهريا .. و الشيفت بجنيه
فطبعا .. كل الممرضات بتطفش و تنقطع على الحكومة ..
بعد ما تتعلم و تتودك و تبقى خبرة في الحكومة ..
و ال 3 بنات اللي عنده دول ..يا متجوزات و عايزين المعاش ..يا محلوف عليهم من اجوازهم انه مفيش غير شغل الحكومة ..
و طبعا الخاص بيحمل مرتب التمريض على العيان ..
نرجع للقصة
- طب حضرتك عندك كام جهاز تنفس صناعي على ال 25 حضانة ؟
- 3 اجهزة
- طب انت عارف حضرتك انه على ال 8 حضانات عنده اربع اجهزة ..
- طب حضرتك ببلاش ؟؟
- لأ انا اليوم عندي اقتصادي ب 150 جنيه ..و العيان بيروح يشتري الدوا من بره ..
- طب انت عارف حضرتك انه اليوم عنده ب 400 جنيه و شامل الدوا .. يعني مفرقش كتير عن حضرتك ..
- يعني حضرتك كده هتمسحه باستيكة .. عندك وحدة فيها 25 حضانة و مفيهاش غير تلات بنات بتديهم 250 جنيه في الشهر .. و الدكتور بتديله 600 جنيه في الشهر بالحوافز و هو بيدفع للدكتور 250 جنيه في اليوم الواحد .. و عندك 3 اجهزة تنفس صناعي هتشيل منهم واحد احتياطي و تشتغل باتنين بس .. و انت مركز جذب للاحياء اللي حواليك و المراكز و القري و هيجيللك موش اقل من خمسين طفل في اليوم خمسة منهم على الاقل هيحتاجوا لاجهزة تنفس صناعي و موش هيبقى في قدامهم حل غير انهم يروحوا للنايب بتاعك ..و يومك ب 150 جنيه غير الدوا اللي موش هيقل عن 100 جنيه و المعاملة عندك معاملة حكومة .. و هو يومه ب 400 جنيه و الفندقة و المعاملة و الطب عنده احسن .. و عايز تمسحه باستيكة ..انا هاقوم اقوله نفتح فرع تاني ..
و خلصت القصة على كده ..
يا ترى فهمت بقى ايه من القصة دي ..
مستني ردودكم ...

[nktis]

لا حول ولا قوه الا بالله....
سارد بعد صلاه العشاء...