هيونداى I10 ولا فيرنا فيفا ولا رينو لوجان ؟؟

[ahmed hamdy]

أنا محتار جدا وعايز رأيكوا يا جماعة ...
أنا متزوج وعندى بنت عندها سنتين .. أغلب الوقت بكون لوحدى أو أنا وأسرتى الصغيرة .. يعنى مش بحتاج الشنطة إلا قليل .. بس ساعات بحتاجها وأفضَّل عربية بشنطة على الأقل للمستقبل ..

فكرت فى الـi10 عربية حلوة وتصميم جديد وتكنولوجيا جديدة وواخدة تقييمات حلوة بره .. شكلها صغير من بره بس من جوه معقولة جدا .. شنطة معقولة بالنسبة لحجمها بس طبعا صغيرة بالمقارنة ببقية السيارات اللى بقارن بيها .. خاماتها كويسة جدا وتصميم التابلوه جميل وشيك ..
مش عاجبنى فيها الكاوتش رفيع وأعتقد ده بيحسس الواحد بالمطبات والطريق أكتر ..
أعتقد ان قطع غيارها غالية شوية ..

فكرت فى الفيرنا فيفا لان المصرى بصراحة مش عجبانى .. الفيفا تقفيلها أحسن وأعلى عن الأرض .. المصرى موتورها بس أحسن بس مش فارقة معايا ..

وفكرت برضه فى الرينو لوجان .. رحت اتفرجت عليها وهى طبعا واسعة وشنطتها واسعة جدا وعالية عن الأرض وبيقولوا انها بتستحمل جامد .. بس خاماتها متوسطة وتصميم التابلوه بتاعها قديم ومش أوى يعنى .. وأعتقد قطع غيارها حتبقى أغلى من الفيفا ..

يعنى كده عندنا:
1- عربية جديدة فى التصميم والتكنولوجيا وحلوة فى الخامات بس أصغر فى الحجم والشنطة وأغلى فى قطع الغيار ---> I10
2- عربية كبيرة وبشنطة بتصميم وتكنولوجيا قديمة وخامات معقولة --> فيرنا فيفا
3- عربية كبيرة وبشنطة بتصميم وتكنولوجيا قديمة وخامات متوسطة مع تحمل أكثر --> رينو لوجان

نختار ايه ؟؟

[itsonlyme]

أنا شخصيا معجب جداً باللوجان.

عربية واسعة واعتمادية وكفاية انها أوروبية (حتى لو كانت مغربية الصنع) وتكسب بالمقارنة بالفيفا.

أما بالنسبة لل i10، فهي عربية حلوة بس صغيرة. يعني لما بنت حضرتك تكبر وربنا يرزقك بطفل آخر حتبقى ضيقة. بعدين أنا مأمنش على اسرتي (حتى لو صغيرة) في عربية صغيرة زي دي.

أنا رأيي توكل على الله وجيب اللوجان.

[alref]

حاليا شايف ان ولا واحدة من دول تناسبك
استني شوية علي اللوجان لما تثبت نفسها و نسمع اخبارها

[hazem_khidr]

بدايه احب اشكرك علي تحليلك المنطقي الرائع لاحتيجاتك و نظرتك الشخصيه لكل سياره.
بدايه الI10 عربيه مدنيه جدا و مش بتاع سفر كتير و بهدله يعني لو شغلك كله و مشاويرك في نطاق الميدنه
فالعربيه دي حتبقي مناسبه ليك في حدود 5 الي 7 سنوات(تكون بنتك كبرت و ربنا رزقك باخ او اخت ليها)
بعد كده حتبقي العربيه ضيقه عليكوا و حتضطر انك تغيرها.
الفيرنا الفيفا عربيه معقوله و متوسطه الحجم و مافيش منها مشاكل عيبها ان شكلها قديم شويه
مناسبه ليك لو بتسافر اكتر من الI10و ما اعتقدش انك حتغلب في اكسسوارتها و قطع غيارها.
الرينو لوجان عربيه لسه جديده و مش متجربه في مصر اينعم تكنولوجيا و شكل قديم نسبيا لكن لسه
ما حدش جربها سنه و اتنين علشان نحكم عليها.
يبقي كده ممكن اختيارتنا تبقي علي اساس:

عاوز عربيه شبابيه و جديده و ليها برستيج معقول بس حتغيرها في خلال خمس سنين يبقي الI10
عاوز عربيه تكنولوجيا قديمه و اسم كبير و عندك استعداد للمخاطره و قلبك جامد تبقي اللوجان
لو عاوز تمسك العصايه من النص يبقي الفيرنا!!!
...............
رأيي الشخصي حط الفيات بونتو في اختياراتك خصوصا ان فيه عرض عليها و ب 66 الف جنيه فقط فول اوبشن و جنوط و فوجات

[ahmed hamdy]

متشكر جدا يا أستاذ حازم ..

أنا فعلا دلوقتى بفكر جدا فى البونتو .. وأول لما شفت العرض بتاعها قلت خلاص حجيبها إن شاء الله ..
بس رجعت فكرت ما بين إنى أجيبها زيرو خاصة بعد العرض ده .. ولا أجيبها مستعملة ..

أنا معايا تقريبا 25 ألف .. أدامى اختيار من اتنين :
1- جمعية بعشرين ألف - أحطهم ع اللى معايا يبقوا 45 وأجيب واحدة مستعملة - ممكن تبقى موديل 2002 - 2003 ..

2- أدفع اللى معايا مقدم - لإنى مش حينفع أدفع جمعية وقسط - وأقسط الباقى فى عربية زيرو ..
طبعا أنا نفسى أجيبها زيرو وأريح نفسى بس شايف ان حيبقى فى عدة زيادات فى تمن العربية "زيادة القسط + زيادة التأمين + زيادة مصاريف الصيانة لانها لازم تتعمل فى التوكيل فى فترة الضمان" ..


رأيك ايه ........ ؟؟؟؟؟