|
#941
16-09-2010, 05:49 PM
|
||||
|
||||
رد: أدب الرحلات
سجن ايه ياولاد الأيه انا عيان ونايم فى البيت
هتطلعو علينا اشاعة والا ايه 
|
|
#942
16-09-2010, 06:50 PM
|
||||
|
||||
|
رد: أدب الرحلات
أسـاليب البـيـاعيـن وحركاتهم
والبياعين ليهم اساليب كتير وحسب المكان والمواصلة اللى انت راكبها 1ــ شفت واد بـيـبـيـع ساندوتشات ماسك صيـنـية كبيرة فيها حوالى 5 ارغفة (10 انصاص) محطوطين فى طرف الصينية وصعب عليا فقلت له بدل الصينية دى كلها هات واحدة صغيرة ولأنه عارفنى ضحك وقال / الساندوتشات كتـير بس انا كده بوهم الناس انى قربت اخلص فيلحقو يشترو ولما يخلصو بنزل اجيب غيرهم .... أشطـة؟ انا / أشطة (قشطة /قشدة) 2ــ فى قطارات الصعيد بالذات حيث الحر الرهيب والزبون غلبان مجرد م يفكر يبص بعينه على بتاع الحاجة الساقعة تلاقى الجردل نزل واتفتحت الزجاجة واترمت على حجر الزبون ويتخانقو شوية ولان المصريين طيـبـين وغلابة وخصوصا الصعايدة..... بيدفعو فى الأخر 3ــ واد نصاب بـيـبـيـع شباشب جلد يركب اى قطار لو باع جوز شباشب ب25 جنيه ينزل من القطار المحطة اللى جاية لان الراكب لو اكتشف خامة الشبشب هيرجعه وميركبش قطار واحد مرتين لمدة شهر وهو اللى حكى لى الكلام ده وسبب الحكاية ركبت من اسكندرية وجانى بعد سيدى جابر وقال لى/ انت بتركب كتير ومنفعتنيش ولامرة ماشى بكام ده 25 جنيه شكرا (دى عادتى مبعرفش أفاصل عجبنى السعر اخدت معجبـنـيش بمشى ومبشتريش) طب قول كلمتك غالى تاخده بكام شكرا ياعم قول 5 جنيه تاخده بـبلاش؟؟ لأ ومشى وفضل يلف ويدور حواليا لحد م وصلنا قليوب وجه قعد جنبى مبعتش من ساعة م خرجنا من اسكندرية وداخلين مصر خلاص ... قطار فقرى.... نفعنى انت انت مش جاى دوغرى ماشى هات 10 لا 7 ونص ووالله فيه نص جنيه كداب فيه 3 جنيه بس هاخده منك ضحك وقال / عفريت قديم انت برضه وانا حبيتك وهقول لك سر قول وحكى لى السر اللى قلته فى اول الحكاية بعد 3 شهورقابلنى وحرقـت دمه مش عايز شبشب تانى لا اللى اخدته لسه معايا فتح فمه باندهاش /معقول لسه قاعد معاك (هو عارف انه مشوارين بالظبط والزبون هيرميه ) ضحكت وقلت له / اصلى بصلى فيه الجمعه ومبلبسوش تانى لان فى صلاة الجمعة ممكن يتسرق وده م يتطمعش فيه ضحك ومشى 4 ــ دى مشهورة تركب الاتوبيس او الميكروباس من دول يركن بيك فى كافيتيريا معينة وطبعا اصحاب الكافـيـتـيـريا متفـقـيـن معاه مقابل فلوس او اكل او غيره حسب المكان ومن اعجب ما رايت سواقين ميكروباسات دمياط يوصل كفر شكر( مشوار ساعة او ساعة وربع بالكتير من عبود) ويركن رايح فين ياعم استراحة هو احنا لحقنا؟؟ بقلة ادب / هو انت اللى سايق والا انا واللى فهمته ان سواق الميكروباس غير البيجو غير الاتوبيس كل واحد له معاملته وأقلهم طبعا البيجو لانه جايب 7 ركاب بس وافضلهم الاتوبـيـس لانه جايب 52 راكب 5 ــ واحد يطلع ويرمى على رجلك حاجات بمنتهى الوقاحة وتقع على الارض وميفكرش يجيبها ولما تسيبها على الارض لحد م يـيجى يزعل جدا انك مجبتهاش لكن فيهم محترفين يرمى الحاجة على المكان اللى متقعش منه يعنى لو انت قاعد مربع ايدك يرميها على ايدك ولو نايم يرمى على واحد صاحى ولو قاعد معووج يرمى على اى حتة عدلة منك المهم انه فى اقل من الثانية يكون لقى المكان اللى هيرمى عليه حاجته 6 ــ واحد يطلع القطار او الاتوبيس يبيع مثلا شيكولاتة او اى حاجة ال10 قطع بجنيه مثلاوواحد تانى يطلع يبيع 12 والاول يشتمه ويتخانقو يروح حالف بالطلاق ليـبـيـع ال15 بجنيه والتانى يطلع بارد ويضحك ويقول له / ههههههههه 20 بالجنيه وورينى هتبيع ازاى المهم ترسى على 30 قطعة بالجنيه والناس تشترى وكل واحد ينادى عليه وف ايده جنيه والمهزوم يعلن هزيمته ويتوعده بالويل والثبور وعظائم الأمور وانزل المحطة الاقيهم بيقسمو الفلوس بينهم وبين بعض اتارى المعركة دى كلها فيلم هندى 7 ــ دى للاسف فى السوبر جيت (حكومة يعنى)وخصوصا خطوط القاهرة / بورسعيد تجيلك واحدة زى القمر ولابسة جيبة فوق الركبة بمترين او مترين الا ربع وحاطة نص طن مكياج وعاملة شعرها فى الخلاط وترمى نفسها عليك تحس انك محاصر ياتشترى يا تـغـتـصبك وتبص فى عينيك بمياصة وجبة يااستاذ شكرا بنفس المياصة /ليه بس انت مخاصمنى لا بس مش جعان ماشى كل الكلام ده بيتكرر مع كل الركاب مع تغيير كلمة او كلمتين حسب الزبون وبعد ساعة ترجع لك تانى وبمياصة اقوى شوية / اؤمر اكيد جعت لا والله مجعتش (مش جعان ) الحقيقة باندهاش مصطنع مخلوط بمياصة / ايه ده معقول ؟؟؟ كل ده ومجعتش هو احنا مشينا غيرها ساعة والا انا مش فاهم؟؟؟؟ بمياصة اشد شوية / ماشى بس خليك فاكر انت احرجتنى مرتين ولاتعليق طبعا وطبعا صاحبنا اللى بـيـتـخم (بينضحك عليه) بالطريقة دى يفاجأ بان حتة كرواسون وواحد شاى ب40 جنيه مثلا ولما يعترض يجد الوش التانى حضرتك الاسعار كده واحنا موظفين وبنديك فاتورة يعنى مش بنحط حاجة فى جيـبـنا وهنا يحس صاحبنا بالهزيمة ويدفع ومرة سالت واحدة فيهم / انتو بـتبـبيعو بالطريقة دى ليه طريقة ايه بسخرية / طريقة 4/2/4 ..... انتى فاهمانى وطبعا لازم اضحك عليها واستفز غرورها الداخلى فكملت كلامى وقلت / واضح انك انسانة ذكية جدا فمينفعش تعملى مش فاهمة لان باين عليك الذكاء وباين انك فاهمة ضحكت وقالت / اصل بيطلبو مننا تارجت (هدف بيع ) ولازم اعمله وطبعا لازم الجأ للاساليب البناتى لانها بتعجب الشباب ههههههههههههه وفى بالى قلت / قصدك انك بتضحكى بيها على عقول الشباب اللى هيتجوز على نفسه خلاص 8 ــ بعض الاستراحات تدخل عندهم قبل م تريح الجثة تلاقى الجرسون واقف على دماغك فتطلب شاى وتلاقيه بيراقبك اول م تخلص الشاى يستنى بعدها 5 دقايق وينط لك طلباتك يااستاذ شكرا مش عايز يستنى 5 دقايق وينط لك تانى شكرا فيستنى 5 دقايق تالت وينط لك فتزهق وتقوم 9 ــ واحد بـيـبـيـع شاى يطلع ينادى / شاى / كركديه / عناب سخن تطلب عناب يصب لك شاى انا عايز عناب خلص طب كركديه خلص هو الشاى وحش يابيه ده مشروب الملوك والرؤساء والبعض بيعديها لان الناس لبعضـيـها وبـيـشرب الشاى 10 ـــ مرة لقيت صابونة ضخمة جدا يعنى تحس انها ربع كيلو و.. بجنيه فاشتريت واحدة وكنا فى قطار الزقازيق ولما وصلت البيت افتح الورقة الاقى ريحتها سيئة ومبترغيش يعنى صابونة مبتخلصش وفعلا اخدت عندنا فى البيت اكتر من 3 شهور لحد مفتـتـناها واضفناها على الميه ومسحنا بيها البلاط واستنيت بتاع الصابون ده حوالى 9 شهور لحد م ركب تانى قطار الزقازيق بقول له / الصابونة دى زفت ومبترغيش ووحشه فقال / يابيه انت عايز صابونة بالحجم ده كله وبجنيه تشتغل صابونة ؟؟؟؟؟؟؟؟ اومال تشتغل ايه ؟؟؟ دى تضرب بيها جارك /واحد صاحبك / عايز تدى واحد صابونة تديها له هههههههههههههه دى بعض اساليب البياعين ولو افتكرت حاجة تانية هكتبها التعديل الأخير تم بواسطة خالدخليفة ; 16-09-2010 الساعة 07:04 PM
|
|
#943
16-09-2010, 07:47 PM
|
||||
|
||||
|
رد: أدب الرحلات
المؤتمر العاشـر(كلهم حراميـة)
وذات مرة راكبـيـن القطار ولقيت الناس بتتكلم عن الاسعار وغلاء الاسعار ووقتها كانو رفعو مرتبات الموظفين بنسبة 30% مرة واحدة والمنافقين هللو وبعدها بيوميـن رفعو اسعار البنزين بنسبة حوالى من 40% الى 50 % واصوات من هنا ومن هناك لكن الشىء العجيب والجملة الشهيرة عند الشعب المصرى كلهم حراميه كله بيروح فى جيوب الحرامية الكبار وانا اتغظت وقلت / ممكن نسأ ل سؤال ياجماعة واحد / اسأل ياعم هما مين الحرامية الكبار يعنى انت مش عارفهم؟؟؟ اللى ناهبـيـن البلد وسارقين خيراتها وواكلينها والعة وسايـبـين الغلبان ياكل طوب طيب سؤال تانى معلش استحملونى اتفضل لو حرامى دخل بيتكم هتعمل ايه واحد /ده انا اقطعه حتـت واحد تانى / امسكه واسلمه للشرطة واحد تالت / ده انا اخرب بيت ابوه انا / كلام جميل ولما واحد بيفكر انه يديك بومبة فى الشغل علشان يتخصم منك الحوافز مثلا بتعمل ايه واحد / ده انا اموته واحد تانى / ياواكل قوتى ياناوى على موتى ده انا اقتله انا / ياصلاة النبى .... أيه الحماس ده ...ولما انتو حلوين اوى كده ليه بتقولو كلهم حرامية وناهبـيـن البلد هو انتم بتتكلمو على بلد تانية بـتـتـسرق ؟؟؟ والا على بلدنا دى واحد / على بلدنا دى طبعا يعنى الحرامية دول بيسرقونا احنا واحد / طبعا انا / اومال ساكتين عليهم ليه واحد /عايزنا نعمل ايه واحد تانى / اللى عايز يعمل حاجة يتفضل يورينا شطارته انا / اولا دى سياسة انهزامية مقصود انهم يزرعوها جواكو علشان محدش يفكر يعمل حاجة يعنى حكاية اللى عايز يعمل يروح يورينا شطارته ده اختراع اخترعه المعلم فى موضوع فلسطين والاخوان المسلمين احرجوه لما جابو له اكتر من نص مليون عايزين يحاربو راح مبطلها ولو تلاحظو كان اخد فترة فى التسعينات كده يقولها ودلوقت بطل خاااااالص ثانيا /هو انا هعمل لوحدى لما كل واحد يتنصل من مسئوليته ميـجيـش يشتكى طالما عايز غيرك يشتغل لك يبقى تتحمل نتيجة انهزاميتك ومشيك جوه الحيط حتى مش جنب الحيط واحد ضاحكا / شكلك ثورجى قديم وناوى لنا على نية سودا هههههههههههه وضحكنا واتقلبت تريقة وتهريج ومفيش فايدة مشكلتنا مشكلة فكر والمخ مش شغااااال خالص بنكسل نفكر
|
|
#944
16-09-2010, 08:24 PM
|
|||
|
|||
رد: أدب الرحلات
عارف انتا مش هتسكت النهارده انا عارف الا لما حد فينا يقتل التاني وساعتها هينطبق عليك المثل القائل يقتل القتيل ويمشي في جنازته انا بفكر قريب احتل الزقازيق علشان خطرك واقطع سلك النت اللي متوصل لمحافظة الشرقية بالكامل يمكن تتهد وتبطل تولعها شوية
|
|
#945
16-09-2010, 08:26 PM
|
|||
|
|||
رد: أدب الرحلات
يا عم انا بقولك حبايبه في سجن القناطر يعني مش هيسبوك الا وانتا ناسي اسمك
|
 |
|
|
