ارشيف الاستراحة 2010

[mercedes]

السلام عليكم و رحمة الله و بركاته

أنا بصراحة قعدت حوالى ساعة أفكر فى كل أمور حياتى و المجتمع اللى أنا ساكن فيه حوالين منى , لقيت ان كل حاجة بلا أى استثناء, ماشية غلط و أى حاجة كانت ماشية امبارح صح, النهاردة غيرت رأيها و مشيت غلط و أى حاجة ماشية النهاردة صح, بكره, هتغير رأيها و تمشى غلط, و كله بالدور اللى بييجى عليه الدور بيغير اتجاهه أوتوماتيكى .

اللى خلانى أفكر فى الأمور دى بالشكل ده , ان زى ما أنتوا كلكم عارفين أن مصر مابتزرعش القمح اللى يكفيها و بنستورد و بأغلى الأسعار و بنجيب أسوأ أنواع القمح و كده و أكيد برضه أنتوا عارفين أن مصر اللى كانت مشهورة فى كل العالم بالقطن الطويل التيلة و اللى فعلا كانت سمعته عالمية , زى ما ألمانيا مشهورة بالعربيات المرسيدس بالظبط, و أنا لأن والدى -الله يرحمه- كانت أستاد فى هندسة الغزل و النسيج, فكان بيقولنا أن فى كل أوروبا, كان المنتجات القطنية المصرية أغلى من الباقيين , لكن كانت بتتخطف خطف, طبعا دلوقتى, القطن بتاعنا لا بقى طويل التيلة ولا حاجة و مكانتنا فى جودة المنتجات القطنية ضااااااااااااااااااعت , الحاجات دى ماحصلتش اليومين دول , الكلام ده من زماااااااااااااااان , الجديد بقه اييييييييهwhat)

محصول الأرز اللى هو بالبلدى (الرز), الفلاحين زرعوه السنادى -الكلام ده فى بلد جمبنا جمب المنصورة اسمها جوجر- و يستنوا أنه يكبر , أبدا , يستنوا أنه يطول و يطلع سنابل, أبداااااااااااااا, وطلع أنه فيه دوا بقه, الازازة منه ب 60 جنيه, لما تضيفه لمياه الرى , يقوم المحصول يبدأ يكبر و يطول , بس مش عارف ادا كان هيطلع سنابل رز ولا لأ, الكلام ده, اللى قاللى عليه ناس فلاحين معرفة من البلد دى, وده اللى هيفسر التوقعات بارتفاع أسعار الرز لهدا العام .

فأنا بصراحة, شايف أن الموضوع فيه (اننننه), زى مايكون فى حد قاعدلنا و مترصدلنا و عمال يدور على الحاجة اللى شغالة عندنا و لسه فيها الروح عشان يضربنا فيها .

و ده مايحصلش الا ادا كان ربنا- سبحانه و تعالى - غضبان علينا , لأن الفقر و الغم و الوكسة اللى مش باينلها انفراج دى , مش مجرد صدفة .

و الله ده احساسى و كل واحد حر فى احساسه .

مرسيدس اس550

[Bendary]

ظهر الفساد فى البر والبحر بما كسبت ايدى الناس

[xabi]

انا لسه واخد حالا مخالفه حزام ودفعت 50 جندى..والظابط بيقلى ان مكنش عجبك هدفعك 1200 جنيه غرامه سير عكس اتجاه.علشان انا كنت ماشى عكس الاتجاه لان الطريق اللى المفروض امشى فيه مكسر ومينفعش عجله حتى تمشى فيه..قعدت اقنع فيه ان الناس كلها بتمشى على الطريق ده مش راضى يقتنع وكان فيه عربيات النترا وكيا وتويوتا تعدى قدامه وماشين معاكس ولارابطين حزام ولا اى حاجه وشويه عيال صغيرين اللى سايقين..واجى اقوله يرد ويقلى انت هتعرفنى شغلى ولا ايه!!هتدفع ال50 جنيه ولا تاخد غرامه1200 جنيه..اضطريت للاسف انى ادفعهم.

اللى انا لاحظته ان الظابط عمال بيوقف العربيات الربع نقل والعربيات الاجره بتاع الناس الغلابه وبيدفعهم غرامات خرافيه.. قلت فى سرى الحمد لله ان جت على 50 جنيه..وربنا يستر


حسبى الله ونعم الوكيل

[عادل الشافعى]

دة البداية بس (من لا يملك قوتة لا يملك حريتة)

[prettykitty]

متزعلش نفسك والحمدلله انها جت على 50 جنيه واعتقد ان ده الطبيعى فى مصر شغل البلطجة سواء من المرور او الشرطة اللى حاضرة دايما لاهانة الشعب وفرض الاتاوات على الغلابة وحال بلدنا دايما فى انحدار مستمر والعياذ بالله كان ربنا غضبان علينا علشان كده بيسلط علينا حاكم ظالم وأوبئة وامراض وغلاء الاسعار والظلم والفقر اللى غرقانة فيه الناس,,حسبنا الله ونعم الوكيل وفوضنا الامر الى الله