بروتون ساجا 2010 ام ماتريكس وتويوتا مستعمل

[Rady2]

مش كده بردو يا جماعه
؟؟؟؟؟؟؟؟؟

العربيات الماليزى دى حاجه وبقية العربيات حاجه تانيه

سواء يابانى او حتى كورى
بسبب التجربة الكافية وتنزيل الموديلات الجديدة

لكن البروتون ابن امبارح دى رأيى الشخصى

[elwany_man]

نصيحه خليك فى الجديد والبروتون عربيات محترمه دى وجهه نظرى ولا تنسى الأستخاره

[ali farouk]

والله يا حماعة الواحد مش عارف يكون راى فى البروتون لغاية دلوقتى كله متخوف منها يا ريت اللى جرب العربية زى الاخ مالك الساجا يدون ملاحظاته بحيادية تامه

[أيمن عنابى]

احترامى للأستاذ بتاع الرينو احب اقولك ان الساجا ماليزى تقفيل ماليزى خليجى وبها قطع واجزاء يابانى اصلى وبعضها المانى وانجليزى الساجا عربية ممتازة اووى افضل من الانوس والفيرنا الزباله واحسن كمان من البيكانتو فى السحب والسرعة والمتانه والاتزان والوسع مش هقول اللوجان وحشه بس الساجا افضل شكلا وموضوعا منها كمان السعر وعلى فكره كل حاجة جديدة الكل يخاف منها لكن العربية الساجا اخدت شهره جامده اوى في مصر وابتدت تكتر اكتر من اللوجان مع العلم اللوجان نزلت قبلها بسنه انا من السويس وفيها تقريبا اكتر من 25 عربية ساجا ده في خلال شهرين بس واى معرض يجبها تتباع على طول ان شاء الله اشتريها منتظر الدفعه الجديدة والسلام عليكم

[أيمن عنابى]

السلام عليكم:
احب اولا ان اعرفكم بنفسى انا أيمن عنابى من السويس ، بصراحه انا اكتشفت وبعد بحث طويل بالمنتديات والمواقع ان العربية البروتون ساجا عربية محترمه جدا.
انا كان معايا عربية كيا برايد كورى اصلى تقفيل خليجى العربية جابت اخرها فبعتها بس كانت ممتازة جدا والله المهم بعد طووول بحث ودراسة متعمقه عشان اشترى عربية جديدة في حدود من 60 الف الى 75 الف قررت اشترى الساجا والحمد لله اشترتها ولونها ابيض ( اشد لون فيها مع انى مش بحب الابيض) بس اللون ده جامد في الساجا المهم عشان تنوى تشترى عربية لازم توضع نقاط مهمه جدا وهى:
اولا: السعر معاك كام
ثانياً: الجوده
ثالثا: قطع الغيار والصيانه
طبيعى السعر اللى معاك يحكمك فى شريحه معينه من السيارات فبالتالي نختار من الشريحه دى اللى يناسبك انت وظروفك يعنى الكيا البيكانتو متنفعش غير لبنت او مدام بس مع احترامى للشباب مالكى البيكانتو لانها عربية حريمى بناتى اكتر.
اما لو حضرتك شاب ومقبل على الزواج وتكوين اسره فمش هتنفعك البيكانتو خاااالص ( طبعا ضيقه وغير عائلية ) ** الساجا شبابيه عائليه جداا **.
نيجى بقي للعبيطه الفيرنا ( الفره) عربية كورى وحلوه الشكل لكن موتورها قوى اكتر من الازم عليها وهى مش ثابته خالص مع السرعات وصاج ضعيف ( اغلب الحوادث وده كلام حقيقي لازم يكون فيها فيرنا ) وصالونها ضيق جدا ** اجلس بصالون الساجا وانت تلاحظ الفرق والراحه **.
اما الاخت اللوجان فهى عربية كويسه وصاج متين جدا وعاليه عن الارض بس سحبها وقوة ماتورها ضعيف جدا بالنسبة للساجا الخطيره الاقوى سحب ومتانه موتور ده بخلاف انا اللوجان فرنسي لكن تقفيل مغربي .
دى بعض المقارنات والملاحيظ بين تلك الشريحه من السيارات بس احب اقولكم ان الساجا مميزاتها وعن تجربه وكلام اكيد من مواقع مختلفه وهى :
قوة سحب عاليه جدااا ، قوة موتور الخاص بشركة لوتس الانجليزية طبعا عرفين عربيات الفورميلا ، شكل جذاب جدااا ، شاسيه الساجا وده كلام اكيد شاسيه من الحديد الصلب ، ماكينة الفيتيس الاوتوماتيك ماركة متسوبيشى لانسر اليابانيه الاطول عمراً ، الجنوط الاسبور ، والعفشه الرياضيه ، طبعا بخلاف باقى الكماليات الجميله انتو عارفنها .
دى وجه نظرى وتحليلى من البحث الطويل جدا قبل شرائي لها .
من عيوبها اللى شفتها طبعا الدريكسيون مش خفيف زى باقى العربيات بس ده مش عيب لأنه هينفعك اوى لما تكون سايق على سرعات عاليه ( تحكم عالى جدا ).
مجال الريموت للمفتاح صغير 4 متر بس .
شفتوا طبعا مميزاتها وعيوبها اللى ناوى يشتريها يتوكل على الله وبجد مش هيندم ابداااااااا .