كل ماحد يشوفنى يستغرب و يقولى تنزل من كورى وتركب صينى

[مصطفى احمدمحمود]

امتى فعلا نتخلص من عقدة الصينى وان الصينى دة ورق وعلى اد فلوسة وعمرة قصير
انا كان معايا نوبيرا 1 موديل 97 بصراحة عربية حلوة قطع غيارها متوفرة بكثرة
واسعار قطع الغيار جميلة جدا بس يعيب العريية انها واطية ولو معايا 2 ورا العربية تحك فى المطبات ولازم تاخد المطب بالعرض وحاجات كدة ولو 3 قاعدين ميعرفوش يقعدو الصالون بتاعها كويس بس
مش زى اسبرنزا 516 الصالون بتاعها بحر بصراحة الشنطة جميلة جدا ومهما حد يقعد ورا متحكش فى المطبات سالت عن بعض اسعار قطع الغيار لقيتها متقاربة من اسعار النوبيرا كمثال الفانوس الأمامى 170 جنية زائد العربية اللى معايا موديل 2008 بقالها 7 سنين والعربية ماشاء الله عليها
بس العيب اللى فيها التجميع بتاعها بطئ شوية زائد تجيب 120 بسهولة اما بعد كدة تحس انها تجيب 130 او 140 بصعوبة مش عارف لية من خلال قرايتى للمشاركات هنا عرفت عشان تتغلب على كدة لازم تنقل على ار بى ام عالى شوية فوق 3
يعنى 3.5 او 4 لاقيت الرابع بيجيب 100 و 110 بس صوت الماتور بيعلى قوى رجعت انقل على 3 تانى مش عارف زى ما بيقولو العربية اتعودت على كدة
وفى ميكانيكى شغال فى الاسبرانزا فقط وسالت المواتير دية بيتعمل ليها عمرة
قالى يتعمل ليها عمرة واضمنها 5 سنين حسيت انها اشتغالة مش عارف لية .
بس فى المجمل عربية جميلة وواسعة والتكيف بتعها جميل جدا بس اللى خايف منه لسة قطع الغيار لانى مجربتش وخير ان شاء الله .

[aymanlaw]

حضرتك انا اتعمل معايا العكس لما اشتريت النوبيرا نفس موديل عربية حضرتك وكانت اوتو وعلى فكره موديل 97 بيعتبر من احسن الموديلات لأنه اول إنتاح للنوبيرا وكان الكلام ده سنة 99 وكان ايمها الكورى سمعته زى الصينى اليومين دول مع إن الكورى كانت منزله من الثمانينات عربية كان إسمها هيونداى بونى وكانت عربية محترمة وشغالة تكسى وحمالة آسية واعتقد إنها كانت امتداد للأوبل كادت هتش باك يعنى تصنيع كورى بتكنولوجيا شركة اوبل زى ماالصين بتعمل باالضبط وبعدين نزلت فى اوائل التسعينيات هيونداى اكسل وكان ايمها ذات شكل حديث وجميل وكانت عاملة جو وكان باالتزامن معها نزلت البيجو 405 وكانت تحفة هذه الأيام التى تم إنتاجها فى فرنسا سنة 87 ونزلت مصر سنة 88 وانتجها وجيه اباظه سنة 92 لغاية اعتقد 2002 وكان الناس ينظروا إليها كما ينظروا للمرسيدس لدرجة إنى اتذكر مقال كان فى الأهرام عن السلع الأستفزازية وكان من ضمنها البيجو 405 وكانت سعرها غالى جداً بأسعار تلك الحقبة فكان إبزاى تشترى كورى لما ممكن تشترى البيجو مثلاً مع إن الكورى كان نازل بأسعار تقل عن الفرنسى بعشرة ألاف ويمكن أكتر ولكن الناس كانت ليها نفس الظرة الدونية للصينى وده طبعاً ثقافة عدم القراءة والأطلاع فى متابعة تطورات إنتاج هذه الدول وإخفاقتها ونجحاتها وطبيعى فى البداية ان يدخل السوق المصرى سيارات مثل جيلى وجيلى فورته وتفشل لسوء إنتاجها وكمان لأننا سوق وإقتصاد فقير فكان لازم الصينين يجربوا فينا ويمكن الوضع ده يكون ميزه لينا لأننا جربنا إلى ان وصلنا مع الصينين لأنتاج من وجهة نظرى لايقل شىء عن السيارات الكورى بل بدأ ينافس بقوة الأنتاج الكورى وفرض نفسه على ساحة الأسواق الواعدة المتنامية مثل البرازيل وشيلى ومعظم دول الأميركان لاتين كما فرض نفسه على معظم الدول الأفريقية منها على سبيل المثال الجزائر وكمان فرض نفسه على سوق يعتبر ترمومتر وعلامة فارقة فى وضع الأنتاج الصينى فى الميزان وهو سوق دول الخليج كما فرض نفسه على بعض دول شرق آسيا وايضاً شرق اوربا وعلى رأسهم ورسيا إذن فأن منحنى ومؤشر نجاح هذه الصناعة الأستراتيجية الصينية فى إرتفاع مما يعنى نجاح الصينين فى تطوير هذا المنتج باالضبط مثلما كان طريق كوريا الجنوبية ..

[AbOnOrA]

انا مليش تجارب اوى مع الصينى بس بالقياس انا ركبت كورى كان عملى واقتصادى مليون مرة عن اليابانى مثلا او حتى الاوروبى هى مش قاعدة طبعاً واعتقد مع الوقت الاجيال اللى جاية ديه مش هيفرق معاها يابانى من هندى هى براندات وبس