مشكلتي مع الدركسيون .. ساعدوني

[مانوورة]

المشاركة الأصلية كتبت بواسطة nawwara انا من رأيى انك افضل حاجة لما تنزلى لوحدك الموضوع ده هايتظبط معاكى بمنتهى السهولة واخدة بالك من تنزلى لوحدك دى ؟

ايوووووا لوحدي لوحدي بقي هههههههه عشان استفرد بالشارع .. و علي رأي الاغنية اللي بتقول : غريبة الناس غريبة الدنيا دية ،، حتي الدركسيون بيتمخطر عليا . هههههههههههه .
هو فعلا السواقة ممارسة مش هز دركسيووون

و انا طول عمري اسمع معارفي يقولولي يابنتي اول ماتتعلمي السواقة هتخبطي كتير و ترزعي في العربية لغاية ماتتعلمي
و طول عمري اعرف ان الخطأ هو اللي بيولد المعرفة يعني لو مغلطتش مش هتعلم
و اذا بي افاجأ اني مبغلطش دلوقتي و انا بتعلم و لا بخبط في العربية
يبقي اكيييييييييييييد في حاجة غلط

دعواتك بقي يا نوارة ..
و ميرسي جداا علي مشاركتك الجميلة

[مانوورة]

المشاركة الأصلية كتبت بواسطة Mohammed Hamada السلام عليكم سؤال صغير لحضرتك العربية اللى بتتعلمى عليها باور و لا لأ ؟ لو باور و مش عارفة تسيطرى عليها أطلبى منه المرة الجاية تغيير العربية بعربية بدون باور لحد ما تخدى على السواقة و على الدركسيون و مش حيحدف منك لأنه حيبقى تقيل

جزاك الله خيرا يا استاذ محمد
فعلا ملاحظة حضرتك مهمة جدااااا
بيتهيألي العربية باور لان فعلا الدركسيون خفيف جداااا معايا
....
هقوله ان شاء الله الحصة الجاية يوم الثلاثاء و لو اني اشك انه يتنازل و يتعطف و يغيرلي العربية
انت عارف بقي نظام تكبير الدماغ و كدا
..

الله المستعان

[peter magdy]

مساء الخير
انا لسة من اسبوعين فى القصة دى بردو مكتب تعليم
بقيت اسأل اصدقائى فى الشغل اقولى اية اتعلمة فى الحصة الجاية -- لان اللى بيدرب عايز يخلص عدد الحصص الملتزم بيها و شكرا على كدة هو عمل اللى علية
انا اتقالى كلمة علشان تعرف انك بقيت سواق ولا كل اللى اتعلمتة كويس ولا لآ
اولا اتعلمى الطلعة يعنى لما العربية تبقى واقفة و تدوسى بنزين و تحرير الدبرياج اعمليها عشرين مرة لانة هيعلمك جيبى الاول و سيبى الدبرياج سنة سنة لغاية ما العربية تتحرك و يقولك هايل
لكن عمليا فى ارض الواقع لو داخلة تقاطع هتتصلى بحد يجى يخدك من مكانك
اسمها الميزان اعمليها عشرين مرة قفى و ابتدى تانى من الاول
ثانيا
بعد ما تبقى تمام قوليلة عايزة اقف فى مطلع كوبرى و قفى لما تسيبى الفرامل العربية هتريح و ترجع ورا لو رجعت ورا يبقى لسة شوية
بالنسبة للزواية البايظة
بردو زىك بردو معرفش اظبطها و كمان ابعاد العربية
ربنا اكرمنى و اشتريت BYD F3 و بتعلم عليها و كل يوم يطلع معايا صديق
الابعاد و الزوايا هتبتدى تتظبط و بقيت امشى وسط الزحمة بس اهم حاجة الميزان علشان لو معرفتيهاش اللى وراكى مش هيستحملك عقبال ما العربية تتحرك
اتمنى اكون وصلتلك المعلومة

[مانوورة]

المشاركة الأصلية كتبت بواسطة queen لا شكر على واجب وعايزه اقولك ان المدارس فعلا مش بتعلم كويس لانهم بيخافوا على عربياتهم وبيلتزموا بكلام نظرى اكتر م الواقع اللى هيقابلك انا عن نفسى رحت مدرستين ومتعلمتش اسوق بجد غير لما جبت سواق يعلمنى على عربيتى وهو ده اللى خلانى ابطل اخاف وشويه وبدأت اعتمد على نفسى فى المدرسه الاولى المدرب كان صاحب المدرسه وكان مرعووووب على عربيته وطول الوقت لما تبطل منى يقولى كمان مره تعملى كده والعربيه تخرب واشيلها على كتفى ولما اغلط فى أى حاجه يقولى معرفش ليه مبتسمعيش الكلام مع انى سامعه الكلام بس لسه مش عارفه اتحكم وفضل يعقدنى وحسيت انى عمرى ما هسوق فى حياتى وانى فاشله 100% واضطريت اقوله انا اول مره اقعد على كرسى السواقه فى حياتى وحاول تعذرنى شويه وهو مفيش فايده وفى الآخر قلتله انا مش فارقه معايا وعارفه انى مش هخرج من عندك اسوق بكره فاعتبر انى جاهله وانك بتمحيلى اميتى بس عشان يهدى شويه مع انى بشهادته الدركسيون كنت بتحكم فيه كويس مشكلتى كانت الحساسيه على الدواسات واكيد حساب المسافات زى كل الناس وبجد خلصت الكورس وانا معرفش ان العربيه فيها سرعه غيرالأول لانه مقاليش اى معلومات غير كده وكمان اكتشفت ان عربيته دبرياجها تقيل جدا وكان بايظ فيها كذا حاجه وانا مش فاهمه وفاكره كل العربيات كده وان السواقه شىء مستحيل ولولا انى كنت فى ضروره شديده للسواقه وكنت مصره اتعلم كنت زمانى اتعقدت ونسيت الموضوع. عشان كده بقولك متهتميش برخامته اوى وركزى انتى بس ومهم أوى تتعلمى على عربيه مانيوال ويكون الدركسيون من غير باور عشان فعلا يبقى تقيل وتفهمى زواياه وانا فاكره كانوا بيقولوا ان اللفه ع الدركسيون 1 سم لاى اتجاه بتفتح العجل 50 سم عشان كده خلى ايدك حساسه ومتلفيش بعنف ولسه ادامك شويه على ما تملكى كل حاجه فى العربيه . وان شاء الله استناكى قريب وانتى داخله سباق الفورميولا الجاى

ميرسي جدااا يا ماي كوين علي شحنة التفاؤل اللي اديتيهالي دي
هو انا بصراحة كنت محتااااااااارة جدا قبل ما اقدم في مدرسة السواقة دي
ياتري اجيب عربية و اخلي حد يعلمني عليها؟؟ زي ما كتير نصحوني
و للا اتعلم في مدرسة احسن؟ زي ما كتييييير برضو نصحووني و ياللعجب !

بس اللي خلاني افضل المدرسة هو اني مش عايزة اجيب عربية و اكون تحت رحمة حد لغايية ما اتعلم
فكدا احسن بدل ما ابقي مييييييح خالص .. اهو حتي لما اجيب العربية ان شاء الله اكون فاهمة شوية و ابدأ بقي اتعلممن المواقف اللي بتحصل في الطريق

و انا و الله حاسة ان المدرب دا لولا اني بستجيب بفضل الله بسرعة للتعلم .. لكان بهدلني زعيق و شخط زي ما بشوف مدربين كتير بيعملوا كدا بعد ما يكونوا استغبوا المتدرب تماما .. و نقلوا له احساس انه حمااااااااااااااااااااار كبير

...

ان شاء الله ربنا يكرمني و يكرمك يارب و يبارك فيكي

[مانوورة]

المشاركة الأصلية كتبت بواسطة محمدصلاح القاضى اولا مبروك مقدما على الرخصه ثانيا طالما حضرتك بتعرفى تنقلى الغيارات وتتحكمى فى مشى العربيه فرامل وبنزين ودبرياج يبقى كدا عال العال اوووى ثالثا مشكله الدركسيون معاكى دى مشكله عبييييييييطه جدااا جداااا ومتخليش الموضوع دا يأثر عليكى خالص لان ببساطه العيب فى حاجه واحده هو انك بتمسكى الدركسيون بطريقه مش مظبوطه شويه ودى بقى ازاى انك بتمسكى الدركسيون بكل قوتك وبتنشفى ايدك عليه كأنه هيطير منك ولا حاجه ودى حلها انك تركبى وانتى عندك ثقه جامده جدااا وتمسكى الدركسيون براحه وبكل بساطه بس شرط تكون متحكمه فيه مش حاطه ايدك عليه بس وواحده واحده هتلاقى الامور انظبطت والدينا بقت ورد وفل وياسمين واهم حاجه فى السواقه الثقه بالنفس والقلب الحديد

لا و الله يا استاذ محمد مش بنشف ايدي عليه و لا حاجة بس هي دي مشكلة عندي لسه مش عارفة اظبطها
و هي ممكن تكون بالنسبة لك انت عبيييييييييييييييييييطة .. لانك بتسوق كويس
لكن اي حد ف كي جي وان زيي اكيد هتكون بالنسبة له مشكلة كبييييييييييييييرة جداا
..

شكرا لك جدااا علي مشاركتك
جزاك الله خيرا