لو مخنوق ومش طايق عربيتك تعمل أيه عشان تحبها ؟!

[samirayad]

لو مخنوق ومش طايق عربيتك تعمل أيه عشان تحبها ؟!

أركب مواصلات كذا يوم

هتبص تلاقى نفسك رايح تاخد عربيتك بالأحضان

[mody112]

صدقنى هو فى فترة كده بتلاقى كل حاجة فى العربية ملخبطة ولكن ان شاء الله كل حاجه تتحل حاول تعمل كل حاجة واحدة واحدة وبعدين طالما انك قدرت تستغنى عن العربية 6 شهور متواصلة يبقى ممكن تكون العربية مش عزيزة عليك قوى يبقى ممكن تبيعها وتجيب حاجة تانى تكون احدث ومشاكلها اقل وكمان حاجنها تكون ارخص ولو متمسك بالعربية يبقى تسايسها وتخليك معاها واحدة واحدة وان شاء تبقى احسن من الزيرو بس ايدك لازم تكون فيها على طول.
وانا هقولك على موقف بعد ما اشتريت العربية بفترة ( مش كبيرة ) غيرت موتور كامل وبعدين كان عندىفحص روحت رشيت العربية كلها وكله تمام وكنت خايف قوى اخرج بيها اة مشوار وقولت اول مشوار اروحه بيها يكون المرور ولكن كنا فى رمضان والمواعيد مكنتش بتلحق تعمل فيها اى حاجة واتعزمت على الفطار عند قرايبى واخدت العربية وانا ماشى فى الشارع بحسس وكانى اول مره اسوق وفعلا شدة الحرص تخلى الواحد مرتبك جدا ومفيش بعد ممشيت بالعربيه حوالى 2 كم ولقيت الدنيا زحمه موت والعربيات والتكاتك كله يا معلم جاى عكس انا قمت متسمر مكانى وحاولت على قد ماقدر انى افادى كل اللى جاى عكس ولكن القدر كان اقوى من اى حاجة
ولقيت نوكتوك من اللى جايين عكس وبيعدى زى اللى عدو ولكن البيه صاحب التوكتوك كان مركب ديفندر على الجزء الخلفى وطالع بيه بتاع 25 سم لبره من جميع الاتجاهات وعديك قام واخدلى جنب العربيه كله من الفانوس الاماو للفانوس الخلفى وساعتها نزلت وعملت خناقة ( مانا بصراحة دمى اتحرق على البويه اللى لسه مبردتش وكمان لسه مشوار المرور ) وصاحب التوكتوك يعنى لو نفضته مش هتلاقى معاه 10 ج على بعض وبعد هيصه وزمبيلطه وبعد محسيت ان صيامى هيروح والناس اتلمت وكده يعنى سيبته وبعد ما مشيت شوية حسيت ان الحرص الزيادة عن اللزوم ده راح وبقيت اتخبط عادى واتحك عادى عادى طالما الحمد لله حاجات بسيطة مش مشكلة

[m elbekh]

لو صحيح مخنوق بدل ما انت تولع فيها روخ حطها جنب وزارة الداخلية وهما حيقوموا بالباقى ويمكن تاخد كمان تعويض ههههههههههههه:pod_of_gold :

[waleed_d82]

المشاركة الأصلية كتبت بواسطة samirayad أركب مواصلات كذا يوم هتبص تلاقى نفسك رايح تاخد عربيتك بالأحضان

معتقدش الكلام دا ينفع معاة علشان قدر يستغني عن العربية مدة 6 شهور الي انا مستغربلوا ان العربية مكنتش هماك اوي لدرجة انك تسيبها 6 شهور دا لو موبيل عايز يتصلح مش بسيبة للفني بقف علية لحد ميتصلح مش عربية علشان انت لازم تغير العربية كلها علشان تحس بالتغير الشامل وتبتدي تهتم بالعربية الي معاك

[ahmedraafat00]

شكرا يا جماعه على التجاوب والنصايح
أقسم بالله بقاء العربيه عند الميكانيكى 6 شهور مش بمزاجى دى تصرفات والدى وانا كنت معترض على الموضوع ده تماما ووصل الأمل لمشاكل بسبب الموضوع ده لكن دماغ والدى يقولك سيب الميكانيكى ياخد وقته عشان يعمل شغل كويس وفى الاخر أصلا طلع كان بقاله 3 شهور مفتحهاش وبعد فتره ودناها لوحد تانى وتانى سبب للتأخير العربيه الفقر دى جيب شيروكى اربعه سلندر وقطع غيارها بغض النظر انها غاليه بس الحمدلله الفلوس موجوده لكن المشكله ان قطع الغيار مش موجوده أصلا احنا فى اسكندريه بعتنا جبنا ردياتير حديد من القاهره و على ما قدروا يوفروه فى القاهره ويبعتوه هنا وكان الطريق مقطوع وبلاوى زرقه ده غير قطه غيار كتييييييير احنا صارفين عليها فى العمره دى 7750 جنيه لا وايه بعد كل ده مش عارف أمشى بيها الفتيس رايح فى داهيه الغيارات مش بتيجى وكلام الميكانيكى انها عايزه طقم دبرياج وللأسف الطقم ده ي2000 جنيه بس المشكله أنه مش موجود خاااااااااااالص ومطر أتكيف على الوضع الحاله مش عارف أزاى !!!!
ملحوظه : والدى مش بيسوق وانا بس اللى بسوق فى البيت ومش بستخدم العربيه كتير بس مقدرش نستغنى عنها بشكل نهائى لازم تبقى موجوده لما نحتاجها نلاقيها عشان كده مش بحب فكره البيع أما فكره اننا نبيع ونجيب عربيه تانيه احسن منها فالمشكله انى خايف نبيع دى والوالد ميجبش عربيات تانى عشان كده مش بفضل نبيع دى غير لما يكون البديل موجود بحيث نبيع دى النهارده وجيب البديل بكره