قيادة النقل و الاتوبيس!

[SAMER_ENGINES]

بالمختصر المفيد انا مجنون عربيات و تريلات و اوتوبيسات و بالمختصر كل مركبة لها عجلة قيادة و اربع عجلات فما فوق انا اعشقها بالعربى كدة مدمن..

كلنا افتكر سوقنا عربيات ملاكى بمختلف انواعها و اشكالها لكن سواقة العربيات التجارية كما يطلق عليها اللى هى النقل و الاتوبيس و كدة له طعم آخر تماماً..

فأحكيلنا بقى:-
1- هل سقت عربية نقل او اتوبيس قبل كدة او اتحطيت فى موقف زى ده كان ايه الموقف (لو ممكن) و قول لنا بقى ايه اللى عملته بمنتهى الامانة و بصراحة السؤال بشكل تانى عكيت الدنيا و لا كويس و لا ايه؟ و كان ايه نوع و ماركة المركبة دى؟؟

2- و لو محصلش و مسقتش لحد دلوقتى حاجة زى كدة لو اتحطيت بقى فى موقف حتقدر تسوق و لا هتتصرف ازاى و تقدر تسوق لحد ايه يعنى تريلا عربية نقل عادية اتوبيس مينى باص ميكروباص.

3- ايه المركبة الثقيلة اللى شفتها و قلت ياااه لو اسوقها او احركها و اجرب سواقتها ؟

اجاباتى انا:
1- اول حاجة سقتها او بمعنى اصح شاركت فى سواقتها كانت اتوبيس نصر ماجيروس بتاع الهيئة ايوووووووة هحكيلكم كان فيه خط من جمب البيت فى السكاكينى عندنا لحد باب الوزير كان رقمه 68 و كان فيه كمسارى اسمه عيد اللى انا فاكره و اتنين سواقين واحد اسمه طلعت و التانى اسمه ابراهيم (الله يصبحهم بالخير لو احياء و يرحمهم لو ميتين) و عم ابراهيم ده هو اللى كان متولينى و كان عمرى حوالى 10 سنين و من صغرى و اتارى ساعتها كان شغال معايا ادمان السيارات و هما فاكرينى عيل بيلعب و خلاص لحد ما وصلت للصورة دى و كان بيخلينى اقفل الابواب و افتحها بعد طلوع و نزول الناس و اضرب الكلاكس لحد ما مرة جه قالى تعالى اقعد قدامى على كرسى السواقة فرحت طبعا و جرى قعدت و بدا يخلينى امسك الدركسيون و هو رجليه على الدواسات لانى مكنتش طايلها اوى و كمان لصغر سنى و عدم تقديرى للمسافات و كدة كويس و ده اتوبيس مش فيات 28 المهم لقيت الاتوبيس بيتحرك و انا ماسك الدركسيون و هو ايديه حوالين ايدا و كان شعور لا يوصف و الحمد لله قدرت اتحكم فى الاتوبيس بكفاءة كبيرة نظراً لصغر سنى.
و بعد كدة لما كبرت اشتغلت على عربية شيفروليه دبابة 2010 و على عربية ميكروباص فولكس باص 80 كانت بتحمل بضاعة برضه مش ناس و سوقت التويوتا الميكروباص الهاى ايس الجديدة بس ركنتها بس يعتبر ممشتش بيها كتير و معايا رخصة تالتة حالياً.

2- لو اتحطيت فى موقف حسوق فى حاجة اكبر من كدة اكيد معنديش اى مشكلة لحد اكبر تريلا و اكبر اتوبيس لانى ناوى استبدل و اكمل فى مجال السواقة لانى الشهادة و الوظيفة مش بتأكل عيش حاف (بس ده موضوع تانى خلينا فى اللى احنا فيه) و علاوة على كدة كمان دى شغلتى اللى بعتز و بتشرف بيها بالرغم من انى بكالوريوس نظم معلومات ادارية و شغال موظف فى شركة كحيتى حاليا لكن اللى بيسألنى شغلتك الاساسية ايه بقول سواق لانى عاجلا ام اجلا هرجع لها فاكيد بإذن الله و الحمد لله اقدر اسوق اى حاجة .

3- اللى نفسى اسوقه حالياً هو الاتوبيس المرسيدس ترافيجو و ده مش ينزل مصر لكن حنزل له صورة هنا قريب
وكمان الاتوبيس الـ MCV المرسيدس الـ C120 اتوبيس الهيئة الحالى الأحمر و اللى موجود منه فى الاسكندرية كمان لونه لبنى على ما افتكر و ادعولى الاقى فرصة لقيادته.

سامحونى انى رغاى شوية و ياريت اسمع اجاباتكم عشان نشوف جبابرة قيادة السيارات الثقيلة فى المنتدى.

[mr_astra]

سوقت جرارمرسيدس اكتروس (الجرار + المقطورة ) وجبتة من الكيلو 90 طريق السويس وكولة تمام ما عكتش ولا حاجة بس انى اعتق الجرار مش ممكن فضلت يجى ساعة ومعرفتش لان ليها طريقة مكنتش باخد بالى منها انما السواق قلى عليها وبرضة معرفتش
ناهيك بقى عن المقطورة تلف الدركسيون يمين هى تروح شمال حاجة كدة اكنك شغال على ويندوز عربى

[كومندا]

سوقت ميكروباص توتوتا الشكل الجديد موديل 2006 تحفه بمعنى كلمته تحفه طياره ماشيه على الارض
وسوقت دبابه موديل 2005 رحت بيها مشوار مصر ورجعت حاجه تانيه برده خالص غير الملاكى صوت المتور له طعم كده كانك بتلعب بلاستيشن

[shooter22522]

انا سقت جرار رومانى وانا عندى15 سنه وكانت اصعب حاجه النقله بتاعته
نفسى اسوق تريلا مرسيدس اكتروس من 2007 لفوق

[sherifabden]

انا قبل كده سوقت مكروباص تويوتا هايس جديد بصراحة تحفة بمعنى الكلمة وكنت بشد مع سيراتو ولانسر وكورولا وغلبتهم خالص دا غير ان صوته قوي وممتع جدا
بصراحة سواقه عربيات النقل والمكروباصات ليها طعم خاص واحلى من سواقة السيدان العادية