مصر موتورز مجتمع السيارات - قيادة النقل و الاتوبيس!

بالمختصر المفيد انا مجنون عربيات و تريلات و اوتوبيسات و بالمختصر كل مركبة لها عجلة قيادة و اربع عجلات فما فوق انا اعشقها بالعربى كدة مدمن.. :sycho26:

كلنا افتكر سوقنا عربيات ملاكى بمختلف انواعها و اشكالها لكن سواقة العربيات التجارية كما يطلق عليها اللى هى النقل و الاتوبيس و كدة له طعم آخر تماماً..

فأحكيلنا بقى:-
1- هل سقت عربية نقل او اتوبيس قبل كدة او اتحطيت فى موقف زى ده كان ايه الموقف (لو ممكن) و قول لنا بقى ايه اللى عملته بمنتهى الامانة و بصراحة السؤال بشكل تانى عكيت الدنيا و لا كويس و لا ايه؟:fun_car: و كان ايه نوع و ماركة المركبة دى؟؟

2- و لو محصلش و مسقتش لحد دلوقتى حاجة زى كدة لو اتحطيت بقى فى موقف حتقدر تسوق و لا هتتصرف ازاى :w6w2005041113435869 و تقدر تسوق لحد ايه يعنى تريلا عربية نقل عادية اتوبيس مينى باص ميكروباص.

3- ايه المركبة الثقيلة اللى شفتها و قلت ياااه :thinkW19: لو اسوقها او احركها و اجرب سواقتها ؟

اجاباتى انا:
1- اول حاجة سقتها او بمعنى اصح شاركت فى سواقتها كانت اتوبيس نصر ماجيروس بتاع الهيئة :09C207~188: ايوووووووة هحكيلكم كان فيه خط من جمب البيت فى السكاكينى عندنا لحد باب الوزير كان رقمه 68 و كان فيه كمسارى اسمه عيد اللى انا فاكره و اتنين سواقين واحد اسمه طلعت و التانى اسمه ابراهيم (الله يصبحهم بالخير لو احياء و يرحمهم لو ميتين) و عم ابراهيم ده هو اللى كان متولينى و كان عمرى حوالى 10 سنين و من صغرى و اتارى ساعتها كان شغال معايا ادمان السيارات و هما فاكرينى عيل بيلعب و خلاص لحد ما وصلت للصورة دى :4: و كان بيخلينى اقفل الابواب و افتحها بعد طلوع و نزول الناس و اضرب الكلاكس لحد ما مرة جه قالى تعالى اقعد قدامى على كرسى السواقة فرحت طبعا و جرى قعدت و بدا يخلينى امسك الدركسيون و هو رجليه على الدواسات لانى مكنتش طايلها اوى و كمان لصغر سنى و عدم تقديرى للمسافات و كدة كويس و ده اتوبيس مش فيات 28 المهم لقيت الاتوبيس بيتحرك و انا ماسك الدركسيون و هو ايديه حوالين ايدا و كان شعور لا يوصف :01F6EB~150: و الحمد لله قدرت اتحكم فى الاتوبيس بكفاءة كبيرة نظراً لصغر سنى.
و بعد كدة لما كبرت اشتغلت على عربية شيفروليه دبابة 2010 و على عربية ميكروباص فولكس باص 80 كانت بتحمل بضاعة برضه مش ناس و سوقت التويوتا الميكروباص الهاى ايس الجديدة بس ركنتها بس يعتبر ممشتش بيها كتير و معايا رخصة تالتة حالياً.

2- لو اتحطيت فى موقف حسوق فى حاجة اكبر من كدة اكيد معنديش اى مشكلة لحد اكبر تريلا و اكبر اتوبيس لانى ناوى استبدل و اكمل فى مجال السواقة لانى الشهادة و الوظيفة مش بتأكل عيش حاف :fun_wallbash: (بس ده موضوع تانى خلينا فى اللى احنا فيه) و علاوة على كدة كمان دى شغلتى اللى بعتز و بتشرف بيها بالرغم من انى بكالوريوس نظم معلومات ادارية و شغال موظف فى شركة كحيتى حاليا لكن اللى بيسألنى شغلتك الاساسية ايه بقول سواق لانى عاجلا ام اجلا هرجع لها فاكيد بإذن الله و الحمد لله اقدر اسوق اى حاجة HPPYBUS .

3- اللى نفسى اسوقه حالياً :3mla: هو الاتوبيس المرسيدس ترافيجو و ده مش ينزل مصر لكن حنزل له صورة هنا قريب
وكمان الاتوبيس الـ MCV المرسيدس الـ C120 اتوبيس الهيئة الحالى الأحمر و اللى موجود منه فى الاسكندرية كمان لونه لبنى على ما افتكر و ادعولى الاقى فرصة لقيادته.

سامحونى انى رغاى شوية و ياريت اسمع اجاباتكم عشان نشوف جبابرة قيادة السيارات الثقيلة فى المنتدى.