فى حد هنا بيبفهم فى البورصة يا جماعة

[حسام البورسعيدى]

السلام عليكم ورحمة الله

واحشنى كتييير جدا والله واسف للغياب الفترة الطويلة دى

مبدئيا كده انا لفت نظرى موضوع البورصة من فترة ومكنتش افهم فيها اى حاجة نهائى .. المهم قعدت ادور فى المواقع على الانترنت وفى يوتيوب على اى حاجة تخص البورصة لغاية لما اتضحت الصورة بشكل كبير

وقررت انى ادخل المجال واجرب بمبلغ صغير وبالفعل دخلت البورصة بمبلغ 5 الاف جنية عن طريق التداول الالكترونى (من البيت يعنى) واشتركت فى شاشة لحظية علشان اتعامل على الاب توب من البيت

انا حاليا بقالى اقل من اسبوع فى البورصة وطبعا كمبتدئ خبرتى محدوده جدا فى قرارات البيع والشرا

فقولت اكيد وحوش مصر موتورز اخواتى وحبابيبى هيفيدونى فى الموضوع ده عاوزينه يبقى نقاش متبادل وتبادل خبرات حول كل شئ يتعلق بالبورصة وارجو من اى حد بيستثمر فى البورصة او عنده خبره فيها انه يشارك فى الموضوع ده

[ahmed_eng2001]

متابع معاك

[حازم فخرى]

ربنا معاك ويوفقك يا حسام باشا .. أنا أعرف إتنين من أصدقائي شغاليين في البرصة بقالهم سنين طويلة ومن البيت ودا دليل إنهم بيحققوا أرباح منها وإلا كانوا توقفوا من زمان .. حاولت أعرف منهم موضوع البوصة .. لكن يمكن علشان مكنتش مهتم جدا فمفهمتش أوي الموضوع دا .. لكن إللي عرفته إن لازم تكون مشترك في إحدى الشركات إللي بتتعامل مع البورصة من خلال النت ويكون لك حساب تحولك عليه الأرباح .. والبورصة بيع وشراء .. المهم في الموضوع انه عايز ذكاء وخبره تؤهلك إنك تاخد القرار المناسب في الوقت المناسب .. يعني انت ممكن تشتري سهم في وقت محدش ممكن يتخيل إن سعره يعلى .. وبعدين يلاقوا إن سعره علي وتكون إنت الكسبان لما تبيع .. هي حاجة زي كده
بس أكيد في ناس محترفه أتمنى يفيدوك أكتر .. أنا حاولت أقدم بس إللي أقدر عليه وأساعد بقدر المستطاع

ربنا يوفقك إن شاء الله

[حسام البورسعيدى]

المشاركة الأصلية كتبت بواسطة حازم فخرى ربنا معاك ويوفقك يا حسام باشا .. أنا أعرف إتنين من أصدقائي شغاليين في البرصة بقالهم سنين طويلة ومن البيت ودا دليل إنهم بيحققوا أرباح منها وإلا كانوا توقفوا من زمان .. حاولت أعرف منهم موضوع البوصة .. لكن يمكن علشان مكنتش مهتم جدا فمفهمتش أوي الموضوع دا .. لكن إللي عرفته إن لازم تكون مشترك في إحدى الشركات إللي بتتعامل مع البورصة من خلال النت ويكون لك حساب تحولك عليه الأرباح .. والبورصة بيع وشراء .. المهم في الموضوع انه عايز ذكاء وخبره تؤهلك إنك تاخد القرار المناسب في الوقت المناسب .. يعني انت ممكن تشتري سهم في وقت محدش ممكن يتخيل إن سعره يعلى .. وبعدين يلاقوا إن سعره علي وتكون إنت الكسبان لما تبيع .. هي حاجة زي كده بس أكيد في ناس محترفه أتمنى يفيدوك أكتر .. أنا حاولت أقدم بس إللي أقدر عليه وأساعد بقدر المستطاع ربنا يوفقك إن شاء الله

نورت الموضوع يامستر حازم ومتشكر جدا على الاضافة والمساعدة وفى انتظار مشاركات الخبراء فى المجال ده

شرفنى مرورك يا فندم

[حسام البورسعيدى]

لغاية لما يبقى فى نشاط ومشاركات فى الموضوع هحاول اقول شوية معلومات عن البورصة من واقع تجربتى الصغيرة

اولا : ازاى تشترك فى البورصة المصرية

الخطوات للى حابب يعرف :

- اولا بتروح لاى شركة تختارها من شركات الوساطة فى تداول الاوراق المالية (شركات سمسرة يعنى) وبتقدم اوى حاجة على طلب تكويد للبورصة وبتعمل عقد معاهم بتمضى عليه

- فى خلال 48 ساعة بحد اقصى بيتصلوا بيك وبيدولك الكود بتاعك فى البورصة اللى هو يعتبر الـ ID اللى بتتعامل بيه فى البورصة والتكويد ده مجانى

- بعدها بتروح تعمل عقد امين حفظ فى البنك التابع للشركة اللى بتتعامل معاها وده بيكلفك 20 جنية تقريبا

- وبعدين بتعمل ايداع بالمبلغ اللى هتستثمره فى البورصة فى حساب الشركة وبتاخد الوصل بتاع الايداع وتروح الشركة علشان ينزلوا المبلغ فى حسابك

- بس كده انت دلوقتى ممكن تستثمر وتشترى وتبيع براحتك وده بيكون عن طريق السمسار اللى بتتعامل معاه فى الشركة او انك تعمل عقد تداول الكترونى وتشترى وتبيع عن طريق الانترنت من البيت او الموبايل وممكن تشترك فى شاشة لحظية وتتابع الاسعار لحظة بلحظة اثناء جلسة التداول وانت فى مكانك