رد: رابطة ملاك ومحبى السفينه فيات 132
اولا مساء الفل على احلى رابطة والاعضاء الى فيها
كنت عايز احكيلكم على موقف حصل معايا امبارح وعايز رأيكم فيه
انا كنت ماشى بالعربية امبارح يعنى رحت بيها مشوار حوالى 30 كيلو وانا راجع لاقيت مؤشر الحرارة رفع عند 130 درجة يعنى وصل لاخره فصلت العربية بسرعة ونزلت اشوف ايه الى حصل لاقيت الماتور سخن اوى ومطلع دخنة فمسكت حتة قماشة وفتحت الريدادير لاقيت مفيش ولا نقطة ميه بجد استغربت اوى علشان انا لسه مطمن عليه الصبح وانا الريدادير عندى مبينقص خالص غير كل اسبوعين وبينقص شوية بسيطة
المهم انتظرت حوالى ساعة لحد ما الماتور برد فجبت مياة من محل على الشارع وملايت الريدادير وانا مشغل ولاحظت ان المياه نازلة من الحته الحديد الى عند الماتور والى واصل بيها كوعتين المياه الى خارجين من الريدادير فصلت العربية وجبت حد قطرنى لحد البيت
وهنا قولت اعمل نفسى ميكانيى واصلحها بنفسى وياريتنى ما عملت كده
المهم فكيت اكواع المية والمروحة وفكيت الكوعة الحديد علشان اعرف افك الحته الى عند عند الماتور اكيد انتوا عارفنها وهى مربوطة بـ4 مسامير على الماتور فبحاول افك اول مسمار لاقيته اتقطم وطلع معايا فقولت اسيبة واغير الجوان الى بينه وبين الكوعة الحديد الى هى المشترك فعملت جوان جلد وحاولت اركبه والحمد لله ركب اول مسمار وربط وجيت اربط المسمار التانى لاقيته مش بيربط معايا فغيرت المسمار لاقيته نفس المشكله فأتصلت بواحد اعرفه ليه فى الميكانيكا قالى هات المسمار واضرب عليه بالجاكوش اوى وبعدين اربط فعلا عملت كده وربط معايا وملايت مياه فى الريدادير والحمد لله مفيش مياه نازلة فرحت اوى وقلت الحمد لله كده بقى اتحلت المشكلة فقلت اركب المروحة ...... ركبتها كويس ووصلت السلك وفضلت اسخن فى العربية لحد ما اشتغلت بس لاقيتها اشتغلت عكس فقمت عكست السلكتين بتوع المروحة وشغلت العربية مرة تانية وفضلت اسخن اوى والمروحة مش راضية تشتغل وانا اسخن وفجأة
لاقيت دخان كتير خارج من الكابوت ففصلت العربية بسرعة وببص على الماتور فى ايه لاقيت الدخانة خارجة من السلك وفجاة ولعت نار جامد بس الحمد لله الناس نجدتنى وطفناها بالمياه فلاقيت ان سلك المروحة كله ساح واتحرق . وقلت توبة مرة تانية لو عملت فية ميكانيكى وقلت بكرة اوديها للكهربائى يشوفها .
بس كنت عايز اعرف حاجة المسمار الى اتقطم ده يزعل فى حاجة مع العلم ان مفيش مياه خارجه منه ولو حبيت اغيرها خالص ياترى بكام
معلش انا طولت عليكم بس انا قولت اقولكم القصة كلها من اولها لاخرها ومستى ارائكم
|