مصر موتورز مجتمع السيارات - القدرة الحصانية

فى الماضى (تقريبا سنة 1800) كان فى عالم اسمه جيمس وات بيشتغل فى منجم فحم و بيطلعوا الفحم فى جرادل بواسطة احصنة مربوط فيها حبل و الحبل على بكرة و نازل فى البير فلما الحصان يمشى لقدام يقوم شادد الحبل يقوم الحبل رافع الجردل لفوق
فقرر يخترع وحدة قياس القدرة و سماها 1 قدرة حصانية = 33 الف رطل فى قدم فى دقيقة
على اساس انه فعلا لاحظ الحصان بيقدر يرفع مثلا 220 رطل من عمق 100 قدم فى دقيقة واحدة
طبعا ده يرد على جزء من السؤال ان الحصان فعلا يقدر يجر عربية بس لمسافة اد ايه و فى زمن اد ايه
المهم جيمس وات قرر يخليها 33000 رطل قدم فى الدقيقة
و مع الزمن بقت وحدة عالمية لقياس القدرة
طيب للتقريب تخيل نفسك راكب العجلة (بالبدال)
فعلا قدرتك = العزم (القوة مضروبة فى المسافة - و فعلا ممكن تقاس بال رطل (قوة الوزن) فى القدم (المسافة )) X عدد اللفات rpm
يعنى بالبلدى قدرتك المحدودة حتوزعها على عزم رجلك على البدال مضروب فى عدد اللفات
و ده بيبان فى بداية الطلعة تلاقيك عزمك جامد على البدال و عدد لفات قليل و بعدين البدال يخف (العزم يقل) بس فى المقابل عدد اللفات يزيد لغاية لما تجيب اخرك تقريبا عزم رجلك صفر ( مش قادر تدوس زيادة على البدال ) بس وصلت لاقصى عدد لفات
يعنى لو قدرتك 100 يبقى = 100 فى 1
او = 50 فى 2
او = 25 فى 4
لغاية 1 فى 100
يبقى كل ما ال RPM يزيد العزم يقل
علشان كده اخترعوا الفتيس سواء للعجلة او للعربية

و كرد مؤقت ان الموضوع داخل فى عامل الزمن المتمثل فى العربية بعدد اللفات فى الدقيقة RPM

و لو فى استفسار تانى منتظر