نظفت الرادياتير كويس، ومع ذلك مازالت العربية تسخن وتنقص مية إيه الحل
 

السلام عليكم ورحمة الله جميعا إخواني الأعزاء:
أرجو من أصحاب الخبرة في الصيانة إفادتي في هذا الأمر الذي لا أعرف سببه:
العربية كانت ماشاء الله ما بتسخانش إلا نادرا، وممكن أسافر بيها طنطا وأرجع من غير ما أمبير الحرارة يرفع، وممكن أقعد بالأيام ما أزودش مية.
وفجأة العربية بقت بتاكل مية وبتسخن، يعني ممكن مشوار 20 كيلو أزود لتر مية كامل وممكن أزيد.
رحت لبتاع رادياتير نظفته كويس جدا بمية النار، وخليته فوره وسلك كل المواسير بتاعته بالشامبر (السلك). وقلت الحمد لله كدة تمام، ومع ذلك العربية زي ما هي ، مازالت بتسخن وبتاكل مية بغرابة. هي مش بس بتاكل مية، هي زي ما يكون بترد المية، لأني كذا مرة ألاقيها لما تسخن الرادياتير ينزل مية على الأرض، والنهارده لقيت خرطوم الفايز مطلع هواء ساخن شديد. فمش عارف بترد المية ليه؟
مع العلم إن المروحة شغالة كويس، والرادياتير مش مخروم.
أرجو منكم مساعدتي ، وشكرا مقدما

رد: نظفت الرادياتير كويس، ومع ذلك مازالت العربية تسخن وتنقص مية إيه الحل
 

غطاء الردياتير هو السبب باحتمال كبير:)
رغم هيافته و صغر حجمه الا انه يمنع المياه السخنه من الوصول للقربه
قبل تبريدها و عند تلف السيكس بلف يقوم بتسريب المياه
لذلك انصح بشراء غطاء جديد من نوعيه محترمه و سوف تجد الامر مختلف ان شاء الله
و يا ريت تعرفني اذا كانت المشكله موجوده بعد تغيير الغطاء ام لا

رد: نظفت الرادياتير كويس، ومع ذلك مازالت العربية تسخن وتنقص مية إيه الحل
 

أنا متابع الموضوع ده باهتمام شدييييييييييييييد جدا لأن نفس المشكلة دى بالمللى كانت حصلت فى البيجو ال505 القديييييييييييمة بتاعتنا و عملت فيها البدع و غيرتلها المروحة بواحد أكبر و برضه مفيش فايدة و فى النهاية , اضطريت أنى أغير الرادياتير كله بواحد أجدد و أطول حوالى 10 سم و بالفعل العربية اتكسفت على دمها شوية و بطلت تسخن للمستوى اللى كانت بتوصله قبل ماغير الرادياتير, بس برضه الحرارة بتعلى , صحيح مش زى الأول , بس برضه بتعلى شويه, أيام زمان , كنت أمشى بيها فى جهمنم الحمرا -والعياد بالله- و مؤشر الحرارة مايعديش أول شرطة .

رد: نظفت الرادياتير كويس، ومع ذلك مازالت العربية تسخن وتنقص مية إيه الحل
 

حضرتك لفت نظري لشيء مهم جدا حصل معايا، فعلا الغطاء بتاع الرادياتير اتفك، يعني هو عبارة عن ثلاث قطع، القطعة الرئيسة وسوستة وقطع أصغر ماسكة في السوستة، فعلا هو اتفك، والقطعة دي وقعت مني تحت البطارية، ومشيت كام يوم من غير القطعة دي، وفعلا من هنا بدأت السخونية، بس أنا شلت البطارية وجبتها وركبتها تاني في السوستة، وقلت كدة تمام، فهل مع كوني ركبتها تاني، برده الغطاء يبقى عايز تغيير؟
سؤال تاني يا أستاذي الكريم:
هل هذه السخونية تؤثر على استهلاك البنزين؛ لأني الاستهلاك عندي عالي جدا جوة البلد، ورحت برده لمركز كاربيراتير محترم، ونظفت الكاربيراتير وغيرت جوان، ومع ذلك الاستهلاك كما هو كبير. فهل موضوع السخونية ده مؤثر على الاستهلاك؟
وشكرا جدا يا أخي العزيز المحترم على ردك واهتمامك.

رد: نظفت الرادياتير كويس، ومع ذلك مازالت العربية تسخن وتنقص مية إيه الحل
 

شكرا لردك أخي الكريم، بس أنا متأكد إن الرادياتير كويس؛ لأني فكيته ونظفته جيدا، فأكيد إن شاء الله في حاجة تانية.