رعشة الطنابير الأمامية مع الفرملة brake disks vibration
 

رجاء الافادة من الساده الخبراء في موضوع الطنابير لانها فعلا بتعملي مشكله في جودة الفرامل خصوصا على السرعات العالية الرعشة بتكون جامده
نوع السيارة اوبل فكترا A مو 1995 200000 كم السيارة بحالة الفابركة عموما حتى العفشة ما عدا الطناير
... انا جربت الخراطة بس برده النتيجة بتكون كويسه في اول 2000 كم بس و نفس النتيجة لو غيرتهم بصراحة انا محتاس في الموضوع ده من بعد ما غيرت بتوع الفابريكة و صرفت كتير جدا.

المشكلة اعتقد انها بتكون في جودة الخامة و معدل التبريد خصوصا طبعا مع السفر الكتير و السرعات العالية
انا جربت انواع الماني و انواع تانية كويسة زي بريمبو و ريمسا (ده بيركبوه في توكيل مقار) و دول اسعارهم في حدود 400- 500 جنيه بس برده نفس النتيجة و بصراحة فكرت في حلين
الاول: اني اجيب طنابير رياضية لان معدل التبريد بيبقى عالي بس انا معرفش انواعها ولا بتتباع فين
الثاني: اني اجيب الطنابير و التيل GM أصلي الماني من التوكيل وادفع فيهم 1500 جنيه بس انا خايف بعد ماركبهم الاقي نفس المشكلة

ارجو الافادة و لكم جزيل الشكر

رد: رعشة الطنابير الأمامية مع الفرملة brake disks vibration
 

بلاش تدوس فرامل جامد وانت سحاب 160 وكدة
وخلى بالك من الطنابير سخنة متجبش عليها مية
خلى رجلك حنينة على الفرامل

رد: رعشة الطنابير الأمامية مع الفرملة brake disks vibration
 

هات طنابير استعمال نظيفة من الحرفين مفيش زيهم جديد ولا حتي ال GM بس ركبهم هناك عشان تجربهم علي طول ولو في حاجة تغيرهم وأنت واقف فية هناك الشيخ احمد وفيق بتاع الاوبل في ممر ارضي كدة عندة استعمال وجديد راجل محترم جدا وحاجتة مضمونة وبيغير لو فيها عيب

رد: رعشة الطنابير الأمامية مع الفرملة brake disks vibration
 

الثاني: اني اجيب الطنابير و التيل GM أصلي الماني من التوكيل وادفع فيهم 1500 جنيه بس انا خايف بعد ماركبهم الاقي نفس المشكلة

لأسف انا جبتهم وعندي نفس المشكلة في الكورسا ,,,,انصحك متجبهمش ولا تصرف كتير انت هات اي نوع الماني محترم وغيرهم كل لما يعملو الحركة دي انا عملت كدة لما غلب حماري متهيألي موضوع المية دة له عامل كبير اوي لأن انا لاحظت ان اللي بيعاني من المشكلة دي اللي مركب جنوط عشان المية بتدخلك بسرعة
وانت هنا في بلدك الناس بتحب تمشي تطرطش حتى لو انت داخل في المية براحة عشان خايف يجي واحد غبى من وراك بسرعته ويدخل في المية ويحميلك العربية

رد: رعشة الطنابير الأمامية مع الفرملة brake disks vibration
 

ألف شكر يا جماعة على النصايح الجامده دي

بس يا ريت لو في حد عنده اراء تانيه يفيدنا

جزاكم الله خيرا

رد: رعشة الطنابير الأمامية مع الفرملة brake disks vibration
 

السلام عليكم .... مظبوطه الردود الحقيقه ومعرفش إللى هقوله ده صح ولا لأ لكن مره بتاع الكاوتش كان بيغير لى الفرده الاماميه شمال بعد لحام الكاوتش ولقى الطنبوره فيها مسمار أمان مش موجود وقالى ده ممكن يعملك رعشه مع دوسة الفرمله حتى ممكن يغلبك لو حتى بتغير الفرده على الطريق لوحدك فخلى الميكانيكى بتاعك يركبه . وللعلم فأنا معايا أوبل إسكونا موديل 1984

رد: رعشة الطنابير الأمامية مع الفرملة brake disks vibration
 

للاسف بعد الامطار الاخيره
معايا اكسنت سامع صفاره باستمرار
الميكانيكى قالى هنفك نصنفر وفعلا اختفت بس رجعت تانى بعد 100 كيلو
التيل بقاله 2000-2500 كيلو فقط