|
انا ماشي غلط ايه المشكلة !!
هو ده كان الرد .. !! ..
الرد ده انا سمعته امبارح الموقف كان كالأتي : نزلت الصبح لقيت شكمان عربية والدي واقع و الكاوتش بتاعه مقطوع و واقع تحته قلت اخد العربية اغير الكاوتش و اثبت الشكمان و تمت المهمة بالفعل و راجع البيت و علي بعد شارعين من بيتي سايق عربية والدي بمنتهي الهدوء لان الشارع مينفعش فيه اي نوع من انواع الجري ضيق و مليان ناس و انا ماشي في اتجاهي الصحيح جيت عند حته معينه و هناك u-turn وسعت لنفسي و اديت اشارة و بدأت اخد الملف عشان اخش الشارع اللي في وش الملف .. و انا في نص اليو تيرن فوجئت بشئ اصفر اللون يصطدم بيا صدمة شنيعه و قوية لدرجة اني اتنطرت الناحية التانيه و و الازاز كله وقع عليا نزلت و انا مندهش و مصدوم و ببص لباب العربية اللي هي مرسيدس موديل 84 و انتوا عارفين الصاج بتاعها عامل ازاي ببص لقيت الباب بتاع السواق بقي بومبيه !!! ببص عليه كده لقيته عربية نص نقل قديمة من اللي صاجها عامل زي القفص ! معلومة ! هو كان ماشي في الاتجاه المعاكس المفروض ده كان يبقي ماشي في الصف بتاعي لا البيه لقي الناحية التانيه من الطريق فاضية اكتر قام واخدها مع انها عكس الاتجاه بقوله ينفع كده يعني ماشي غلط و خبطتني و بوظتلي الباب و الازاز .. و بلاقي نفسي بتصدم برد انا ماشي غلط ايه المشكلة ما انت عارف ان هنا كله بيمشي عكسي !!!! بيبرر غلطته ! بأن المشي العكسي بقي عادي دلوقتي !!!!!!!!! الرد ده فوقني من الصدمة قلتله ماشي استني بقي اجبلك صاحب العربية ( والدي) قام رد عليا صاحب عربية ايه و بتاع ايه و بيركب عربيته و هيمشي قلت لا الادب مش نافع كده قلة الادب للاسف لازم تشتغل قمت داخل فيه شمال و شاتمه و صوتي علي جداا و الناس جت و وقفت و غلطوه و هو مصمم و بدأ كلام الحقد الطبقي انت ماشي مشغلي التكييف و مش باصص حواليك ولا شايف حاجة ( انا مكنتش مشغل التكييف انا قفلت الازاز للحظة بس عشان كان فيه تراب و عفره) قلتله انت شكلك مينفعش معاك ذوق و لازم تتلسع فيها و انا همشيها رسمي و محضر و هبهدلك و مش هتشوف سواقه تاني و تدفع غرامه 1200 جنيه و تتحبس شهر و تعويض ليا والدي وصل ساعتها و شاف المنظر و التاني مستمر في كلامه و عايز يلبسني الغلط و كعادة المصريين اللي من النوعية دي تحديدا سكت و حط وشه في الارض و دفع و هو اقل من ..... بعد ما اتهدد بالحبس و الغرامه و هكذا خدت منه تمن الباب اللي تم تدميره الخسائر عنده رفرف .. فانوسين .. اكصدام حديد عندي باب و ازاز 300 جنيه باب بالاكره بالكالون بالباكتات بحليات داخلية بالازاز و الرش كان عندي رفرف مخبوط قلت نظبطه و نرشه بالمرة ب 500 جنيه باب و رفرف الخلاصة و اللي عايز اقوله ان مبقاش فيه اي نوع من انواع الاعتراف بالخطأ ولا التقدير نظام تلبيس و خلاص عشان ميدفعش السير عكس الاتجاه في رأي الناس دلوقتي او علي الاقل اللي من النوعية دي بقي عادي و مش غلط و مش مشكلة !!! و انا اللي ماشي صح بقيت غلطان و كان لازم اخد بالي ! مفيش احترام للمرور مفيش تقدير للناس مفيش احترام للنفس حتي !! خدوا بالكم من نفسكم و ربنا يحمينا جميعا لكي الله يا مصر ! |
رد: انا ماشي غلط ايه المشكلة !!
والله موقف يحرق الدم
كان الله فى عونك خبطة ومصاريف وعطلة وكفاية وقفة الصنايعية اللى الواحد بقى بيهرب منها ومن قرفها تحياتى للجميع |
رد: انا ماشي غلط ايه المشكلة !!
فعلاً مفيش دم خالص يعني غلطان ومش عاجبة حاجة تحرق الدم ربنا يرحمنا برحمتة ويحفظنا جميعاً.
|
رد: انا ماشي غلط ايه المشكلة !!
ده كان المفروض يتحبس احسن بس معليش
|
رد: انا ماشي غلط ايه المشكلة !!
بجد حاجة تخنق مفيش ريحة الدم عند بعض الناس الذين يسمونهم البشر ، امبارح حصلي موقف زى الزفت راكن عربيتي فى امان الله فى الباركنج ورحت اشترى شويه حاجات المهم رجعت بعد ساعة واحدة فقط لقيت ايه يا جماعة الرفرف اليمين مخبوط والعربية لسه فابريكة طبعا اتحرق دمي وناديت على السايس بتاع الباركنج وطبعا قالى انا ماشفتش حاجة وكمان مصمم ان العربية متخبطتش فى الباركنج أصلا، المهم كان معايا المدام والاولاد ومش هاخد حق ولا باطل معاهم ومشيت وقلت حسبي الله ونعم الوكيل فى اللى كان السبب 0
|
رد: انا ماشي غلط ايه المشكلة !!
قدر الله وماشاء فعل
بجد سواق عايز الحبس |
رد: انا ماشي غلط ايه المشكلة !!
هههههههههه الحقد الطبقى ده هتسمعه كتير وخصوصا لو عربيتك حديثة
وانا شخصيا سمعته كتير خد عندك اصل انا امى مجابتليش عربية (ده عيل واقف (بالنسبة لى عيل) فى محطة بنزين بيهزر وسايبنا واقفين مستنيين سيادته ولما كلمته قال الجملة دى 2 هو علشان ملاكى يعنى اللى زينا ياكل زفت بلد و.........( ده سواق ميكروباس خبطنى من ورا فى ميدان المحطة ولما كل الناس شهدت عليه قال كده) 3 ياولاد الـ.............. ياللى مش تعبانين فى الفلوس للاسف دى مشكلة اخلاق ونفس موقفك حصل معايا امبارح بس انا رديت لانى داخل شمال فى مكان ضيق فاخدت ناحية اليمين شوية وشاورت للى جاى ورايا( وكان سواق ميكروباس ) يستنى فقال انا مش عارف بالظبط انت عايز تعمل ايه مدى اشارة شمال ورايح يمين وبتشاور بايدك فقلت له لما تتعلم السواقه هتعرفى انى عايز اخد الملف على واسع لان الشارع ضيق اتشال واتهبد وانا بعرف اسوق احنا اتعلمناها على الاسفلت مش اتعلمناها ف مدرسة احنا بنشقى مش زيكو بتلاقو الفلوس دى طبقية موجودة للاسف لكن اللى زى ده مكانش عايزك انت ترد عليه لكن كان عايز واحد صوته عالى زى حالاتى يفرج عليه الناس او واحد جارى بس د ه مفترى ده شايل عتلة فى الشنطة اول م يحصل موقف زى كده ينزل يدغدغ العربية اللى خبطته ويمشى |
| الساعة الآن 11:59 AM. |
Powered by vBulletin® Copyright ©2000 - 2025, Jelsoft Enterprises Ltd.
www.MasrMotors.com ™ Copyright ©2008 - 2025
Egyptian Automotive Community
جميع الحقوق محفوظة - مصرموتورز 2008 - 2017