رد: شويه اسئله علي عفشه الكريستاله
 

ياخبر ابيض ياdriv3r

شكل العربيه ياعيني بعد ما كانت 17 واتحولت 15 اتغير خاااااااالص

انا مش بسافر بالعربيه
يعني اغلب مشاويري جوه البلد
رمسيس مصر الجديده مدينه نصر المعادي
كده يعني
يعني الطريق مش متسفلت وبلاقي مطبات وكده
وانا عارف اني مش حتعلم ببلاش
بس لازم اخد بتجارب اللي قبلي

انا انهارده كنت في التوفيقيه وسألت عالمساعدين المونرو وقلتله انا اسمع ان المونرو انشف شويه من الكي واي بي
طبعا قاللي مش اصلي وبتاع والكلام ده

فانا ان شاء الله حروح الحرفيين اشوف اربع مساعدين استيراد كده وربنا يكرم ممكنش يبقي كي واي بي ان شاء الله

بالنسبه للتجنيط فانا نفسي اجنط 15 بس كلكو اجمعتو اني لو جوه البلد حتأذي كتير وحتعور في العفشه وكل شويه زي مانتا بتقول بيض وبارات ومقصات والشغلانه دي

فانا وقفت تفكير في موضوع التجنيط ده مؤقتا لحد ما ارسي علي بر
وحستمر بال13 دلوقتي
وممكن احاول ادور علي جنط 13 شفه عريضه شويه يبان شكله حلو
يبقي انا كده في النص

وممكن ان شاء الله اعمل زي ما استاذ حازم قال
اجنط 14 وابقي في النص لا كده ولا كده

ايه رأيك

رد: شويه اسئله علي عفشه الكريستاله
 

عندي سؤال كده محيرني بقالي يومين

هوا ازاي بتوع التاكسي والسوزوكي بيجنطوا ويعرضوا
مع ان الناس دي بتكون شغلها كله جوه البلد

وسؤال تاني

هل لو فرضنا وجنطت 15 اما ناس تركب معايا مثلا
العربيه حتوطي اكتر وتحك في اي مطب او كده؟؟

رد: شويه اسئله علي عفشه الكريستاله
 

لو تلاحظ حتلاقي كل التاكسيات اللي مركبه جنوط يا اما مركبه نفس المقاس او لو معرضه زي ما بتقول يبقي مزود في ارتفاع العربيه بغباء و دا علشان لما يحمل فيها الكاوتش الخلفي مايحكش في الرفرف

رد: شويه اسئله علي عفشه الكريستاله
 

مظبوط كلام سيادتك ياحازم باشا
تسلم اراءك

رد: شويه اسئله علي عفشه الكريستاله
 

منور يا ميكي ما كلمتناش عن عربيتك و قولت جايبها امتي و بكام و ايه المشاكل اللي بتقابلك فيها انا عاوز اعمل يوم نقابل فيه كل الكريستالاويه في المنتدي و نتصور و نشوف عربيات بعض ايه رأيك؟؟

رد: شويه اسئله علي عفشه الكريستاله
 

انا جبتها شهر 1 - 2010
جبتها ب50 الف
غاليه صحيح بس كانت حاله نضيفه
موديل 2000
كامله مانيوال glx
160000
وعامله دلوقتي معايا 175000

مشاكل شفتها منها
والله دي تاني مشكله اقابلها منها من ساعه ما جبتها

اول مشكله كانت من طرمبه الميه في رمضان
باظت مره واحده والعربيه سخنت جامد وكان يوم
جبتها ب135 جنيه وغيرتها

وتاني مشكله كانت مشكله الطقطقه والكلام ده وطولت معايا شويه واتضح بعدها انها بارات واتياش
واللي عرفت بعدها انه عيب فيها واغلب صحابي كله ماشي بيطقطق

غير كده ولا الهوا

مشكلتي اني مبطيقش عليها الهوا ولازم يتعمل في ساعتها
ولاني مش ناوي اغير خالص
وان الكريستاله كانت حلم حياتي من وانا عندي 12 سنه تقريبا اول ما نزلت
وكان جارنا جايبها جديده وكانت فيراني بردو
وانا حبيتها منه

كانت نضيفه علي طول ومتجنطه وحلوه اوي اوي وكان مدلعها دلع علي حق ربنا

ولانها دلوقتي بقت عربيتي واوول عربيه املكها في حياتي
فليها عندي معزه خاصه جدا
وصعب اوي اني افرط فيها

بحب فيها ان قطع غيارها رخيصه اوي ومتوفره اوي
ونفسي ربنا يقدرني واجنطها واغير العفشه اخليها ميراج واسقط موتور 1600
واغير الشنطه اخليها ميراج واركب فوانيس متعدله ورا ليدات وقدام رينجات سمووك
وتخش فرن دهان من اول وجديد واجيب 2 اكصدام جداد واركب فوانيس شبوره بزينون

بس ده اللي نفسي اعمله فيها كله
اعتقد بعد كده ممكن انام جواها ومتطلعش بيتنا تاني

وانا ماشي في الموضوع واحده واحده اهو
وان شاء الله اظبط نفسي

عشان كده اما بقولك نفسي اجنط 15
ده حلم من احلامي
العربيه دي ليها صوره في خيالي كده مش عارف افارقها

تصدق انا من ساعه ما عملت الموضوع هنا وانا ماشي في الشارع ببص علي اي كريستاله متجنطه في الشارع
وابص عالكاوتش اشوفه مركب مقاس ايه
وامبارح وانا في التوفيقيه كان فيه سايس جراج حيضربني
عشان لقيت كريستاله واقفه ومتجنطه جنط جامد اوي اوي
وكنت عاز اصورها واخد مقاس الكاوتش
فعمال اقرب منها اوي وده عمال يقول مين العبيط ده
واما طولت ولقيته حيتكلم مشيت
:) :)

ياريت ياحازم باشا نعمل مقابله كريستاله ونتصور ونتبادل الخبرات
انا عملتها بيني وبينك بس هناك مش هنا :) :)

وان شاء الله اتعرف علي الناس الحلوه اللي هنا
دايما تلاقي في كل منتدي ناس تحببك في المنتدي

رد: شويه اسئله علي عفشه الكريستاله
 

الحمد لله خلصت مشكله العفشه

اشتريت طقم بارات واتياش وتيل فرامل وبطاحات
واربع مساعدين kyb

وظبطت الاداء والحمد لله كله تمام
وزي الفل


يتبقي لنا ان شاء الله الجنوط والكاوتش
ادعولي قلبي يطاوعني واركب ال14 ده

مش عارف حاسس اني في اخر لحظه حروح قايله هات 15
مش متخيل اني بدفع الفلوس دي كلها وفي الاخر بعمل حاجه انا مش عاوزها


افرح ياحاززززززززززززززززززززز ززززززززززم

:) :) :)