مصر موتورز مجتمع السيارات - المواجهة ▲AbOnOrA☼ ◄VS► ▲Hazem Shahin☼

مصر موتورز مجتمع السيارات (https://www.masrmotors.com/vb/index.php)

- منتدى السيارات العام (https://www.masrmotors.com/vb/forumdisplay.php?f=2)

- - المواجهة ▲AbOnOrA☼ ◄VS► ▲Hazem Shahin☼ (https://www.masrmotors.com/vb/showthread.php?t=101793)

رد: المواجهة ▲AbOnOrA☼ ◄VS► ▲Hazem Shahin☼

ألله معك ياأبونورا
وأنا متابع:12EA7A~153:

رد: المواجهة ▲AbOnOrA☼ ◄VS► ▲Hazem Shahin☼

استاذ حازم من الشخصيات المحترمة
الذى ستفتقدها ادارة المنتدى
ولكن سيظل دائما علم من اعلام مصر موتورز شكر وتقديرشكر وتقديرشكر وتقدير

وتحياتى وتقديرى له على صراحته فى كنبة الاعتراف
وشكرا لابو نورا على هذا الموضوع واسلوب سرده للاسئلة اللى ولا اسئلة امن الدولة
واحب اقوله نشوفك قريب يا جميل على كنبة الاعتراف ونعصرك اسئلة زى ما احنا عايزين :w6w2005041113562663

رد: المواجهة ▲AbOnOrA☼ ◄VS► ▲Hazem Shahin☼

اقتباس:

الذى ستفتقدها ادارة المنتدى

:thnkr::thnkr::thnkr:

رد: المواجهة ▲AbOnOrA☼ ◄VS► ▲Hazem Shahin☼

اقتباس:

المشاركة الأصلية كتبت بواسطة AbOnOrA (المشاركة 793073)

الجزء الاول

السؤال الاول عن السيارات
مطلوب تقييمك ورأيك الشخصى عن مجموعة من العربيات وهى

الحقيقة رأيى هيكون تقديرى لإنى ما جربتش بعض السيارات المذكورة لكن معلوماتى عنها من تجارب الآخرين

الغير صينية

1- الرينو لوجان

العربية دى وجودها كان مهم جدا فى السوق لإن فى وقت من الأوقات شريحة السيارات فى حدود 70 ألف كان مسيطر عليها السيارات الأسيوية الكورى و الصينى و الماليزى (اللادا طبعا خارج الحسابات و الزمن) بالإضافة للفيات بونتو القديمة على إستحياء ... المهم فى الشريحة دى من المستهلكين كان فيه برضه الجزء اللى بيحلم بالسعر ده يركب سيارة أوروبى و بالرغم من إنها رومانى الأصل و مغربى التجميع لكن علامة رينو عليها فتحت لها أبواب النجاح فى مصر بسهولة و سرعة .

السيارة جيدة مقارنة بالسعر كأداء و أمان و تحمل لكن يعيبها التصميم و تكنولوجيا المحرك نوعا ما تحس إنهم متأخرين شوية عن التريند الحالى فى السيارات الحديثة فيه عيب كمان بسيط و هو الإرتفاع النسبى لتكلفة الصيانة و قطع الغيار لكن إنتشار العربية و إستمرار طرحها هيحل المشكلة دى بالتدريج

2- الهيونداى النترا

سيارة محترمة من جيلين فاتو لكن أخر إصدار هجومى بشكل كبير لدرجة تخلى باقى المصممين يتكسفوا على دمهم ... الحقيقة تصميم الألنترا الجديد بيفكرنى بالتصميم الثورى للسيفك 90 إللى أصبح شكلها الإنسيابى و خطوطها الأساسية هو المعيار لتصميم السيارات بعد كده
نفس الكلام ده هينطبق (فى ظنى) على التصميم الحالى للألنترا و بعد سنة أو سنتين هتلاقى معظم العربيات بتاخد أفكار من إللى إحنا شايقينها فى الإلنترا حاليا
(ملحوظة مهمة : الموضوع ده بينطبق على السيارات المتوسطة فى نفس الفئة فقط _ أما السيارات الفاخرة فحاجة تانية خالص)

بالنسبة لأهم ما فى الإلنترا الجديدة هو الفتيس الأتوماتيك الست سرعات مش عارف نزل فى مصر و لا لأ لكن الفتيس ده كان صعب يتشاف فى عربية بالسعر ده ساعتها ..... اما الركن الإلكترونى فأعتقد إنه مش مؤثر هام فى نجاح السيارة من عدمه

3- الهوندا سفيك

طبعا الجيل الحالى كويس و كل حاجة لكن مش حاسس إن فيه روح هم فى السيفيك كل شوية يزودا مظاهر القوة فى السيارة على حساب الجمال و مش قادرين يوصلوا لتصميم مبهر زى السيفيك 90 مرة تانية إللى كانت تخطف الأبصار فى أى مكان حتى التابلوه الإلكترونى حاليا أنا شايف إنه قبيح و العدادات التقليدية أجمل بكتير

أنا شخصيا ليا تجربة مع الهوندا سيفيك 2000 أمريكانى و لازالت معايا و فى الحقيقة أنا بحب العربية دى جدا و بعتز بيها قوى و فيه بينى و بينها رابط عاطفى

أخيرا اهم ما يميز العربية دى هو الثبات لإن مركز ثقلها قريب قوى من الأرض (واطيه بنت اللذين)

الصينية

- اسبيرانزا تيجو

هى خلطة ناجحة جمعت ما بين الماتريكس و التيريوس و العربييتين ناجحين فى مصر و بالتالى كان طبيعى تنجح السيارة و اللى زود نجاحها سياسة أبو الفتوح التسعيرية الذكية إللى خلاها بدون منافس تقريبا فى فئتها و لغاية دلوقتى مع إرتفاع الأسعار و خصوصا لموديل 1600 و كمان أبو الفتوح نفسة بقى كإسم (رغم كل عيوبه لكن ما ننكرش إنه وكيل قوى و معتمد) كفيل بإنه يعمل من الفسيخ شربات مع العلم التيجو مش فسيخ أبدا

-جريت وول سى30

ما ليش تجربة مع العربية دى بأى شكل من الأشكال إلا يمكن شوفتها فى معرض من المعارض و لا حاجة لكن إللى أقدر أقوله ان شركة جريت وول من الشركات الناجحة و سياراتها جيدة نوعا ما و أهم إنتاجها كان السيارة الهوفر رباعية الدفع و هى أنجح SUV فى الصين فى سنوات 2009 و 2010 من حيث المبيعات
أم السى 30 و إخواتها (عائلة voleex) فتعتبر الجيل التانى من إنتاج الشركة بعد الجيل الأول المتواضع نسبيا و بالتالى فالمتوقع إنها تكون اكثر جودة و إعتمادية عن سابقتها و تتميز السيارة بالتصميم الجذاب و هى حاصلة على خمس نجوم فى إختبار التصادم الصينى

- واخيراً وبالاخص جيلى اميجراند الجديدة

أنا كنت منبهر بالسيارة أول ما أعلنت جيلى عن إنتاجها من سنتين و إعتبرتها هى و أنجلون حصان رابح للجيلى
طبعا محدش كان واخد باله من السيارة قبل غبور و خصوصا إنها كانت فى شريحة أعلى من أغلب الصينى و تقترب من الكورى

طبعا بعد غبور بقوته و تجميعها فى فى مصر و الأسعار المعلنة أتوقع إن العربية دى هتكتسح و حجزها هيبقى بالطوابير و على أبو الفتوح و الأمل يستعدوا للمنافسة الحتمية

طبعا متوقع إن الدفعة الأولى تكون مليانة عيوب زى ما إحنا متعودين من الإنتاج المصرى لكن مع مرور الوقت و تراكم الخبرات الجودة هتتحسن

و بالتالى أن بنصح أى حد بيفكر فى العربية دى إنه ينتظر شوية من ست شهور لسنة لغاية ما المهندسين و العمال فى جى بى يحفظو العربية

السؤال الثانى عن المنتديات
مطلوب تقييمك ورايك فى استخدام الانترنت كوسيلة دعاية للسيارات وبالاخص المنتديات طبعاً وامتى يكون ده فى مصلحة المستهلك وامتى يكون ضدة

للأسف لسة إنتشار النت محدود بين المستهلكين فى مصر عموما و ما بين أصحاب السيارات خصوصا يعنى على سبييل المثال ما بين 30 زميل فى العمل عندهم سيارات نصهم تقريبا بيستخدم الإنترنت 3 منهم فقط يعرفوا منتديات السيارات و ده بالرغم من وجودى بينهم و شرحى لهم على فايدة المنتدى و اللى فيه - الغالبية بتعتمد لسه على word of mouth يعنى يسأل المعارف و الأصدقاء عن اللجوء لوسيلة إعلامية ناهيك عن النت.
الخلاصة إن سلوكيات المستهلكين مخلية شركات السيارات ما تعتمدش كتير على النت فى الدعاية على الرغم من فوايد النت الكبيرة زى رخص الأسعار و طول فترة ظهور الإعلان و النفاذ و غيرها.
أما منتديات السيارات فقدمة خدمة جليلة للمستهلكين و بدل ما الواحد كان بيعتمد على مشورة 3 او 4 من معارفة فى المنتديات ممكن يستفيد من خبرات بالآلاف و فى كل الموضوعات و هو قاعد فى مكانه بيكتسب الخبرة و المعلومة
العيب الخطير فى مجتمع المنتديات بيكون فى عدم الموئوقية أحيانا بمعنى أنا و انا بستخدم المنتدى و بقرأ مشاركة عضو مييثاش عارف مدى مصداقية العضو ده و هل هو جدير بالثقة و لا مدفوع أو مأجور لو قدر المستخدم انه يعمل دراسة شاملة و يقرأ الرأى و الرأى الآخر و يفلتر الجيد من الخبيث هيتجنب الإقياد راء كلام الفتايين.

السؤال التالت
ايه اهم النصائح اللى توجها لإدارة الموقع الجديدة
وايه اهم الحاجات اللى تحب تنبهم ليها او تحذرهم منها

معلش هستأذن فى تأجيل السؤال ده لبكره لحسن كابس عليا النوم و الموضوع مهم

رد: المواجهة ▲AbOnOrA☼ ◄VS► ▲Hazem Shahin☼

اقتباس:

المشاركة الأصلية كتبت بواسطة AbOnOrA (المشاركة 793073)

السؤال التالت
ايه اهم النصائح اللى توجها لإدارة الموقع الجديدة
وايه اهم الحاجات اللى تحب تنبهم ليها او تحذرهم منها

صباح الخير

إن كان لى أن أنصح الإدارة الجديدة فأحب أقولهم إنتم هتستلموا كيان الحمد لله كبير و مؤثر إتكلف مال و الأهم و اللى لا يقدر بثمن هو الجهد و الوقت طول السنين إللى فاتت أمانه عليكم تحافظوا عليه .......
يا وائل أنا لسه فاكر لما كنت بتوصينى على المنتدى ليلة جمعة الغضب مش علشان فيه حقوق مالية لولادك من بعدك لكن علشان مجهود الناس فى تلات سنين ما يروحش هدر و تفضل المنفعة مستمرة ...... يا ريت الفكر ده يتنقل لأعضاء الإدارة الجديدة علشان يبقى معروف حجم المسئولية الملقاه على عاتقهم

إذن الحفاظ على المنتدى هو الأولوية الأولى للإدارة يليها التطوير و التوسع

أما على المستوى الشخصى فأملى إن كل واحد من أعضاء الإدارة الجديدة ما يتغيرش بعد ما يبقى مشرف و يفضل هو هو بنفس أخلاقه و طباعة على المنتدى و يفتكر دايما إنه مهما طال الزمن هيرجع يبقى عضو عادى فى يوم من الأيام و اللى ما يحبش يشوفه من المشرف و هو عضو عادى ما يعملوش لما يبقى مشرف

كلمة اخيرة

فى أول نوفمبر 2009 إنضميت لإدارة المنتدى بالصدفة و فى أول نوفمبر 2012 سيبت الإدارة برغبتى و بين التاريخين دول مرت أحداث كتير
و شوفت أيام حلوة و ليالى سودة
أيام حلوة زى أيام ما قابلت أعضاء المنتدى
و يوم ما إتفتح المنتدى لجميع الستخدمبن
و يوم ما طورنا قوانين المنتدى
و يوم ما وصلنا لـ 100 ألف عضو
و يوم ما تفوقنا على المشابهين فى الإحصاءات
و يوم ما قامت الثورة
و يوم ما رجع النت أثناء الثورة
و يوم ما عملت منتدى الثورة
و يوم ما مشى مبارك
و غيرها كتير من الأيام الجميلة

و كمان كان فيه ليالى سودة
الليالى إللى الهاكر كانوا بيوقعوا فيها المنتدى
و الليالى إللى الحكومة وقت فيها النت كله
و الليالى إللى كان فيها خلافات و مشاكل
و الليالى إللى ساب فيها أعضاء المنتدى
و الليالى إللى كنت مضطر فيها إنى أحكم بين متخاصمين

لكن الأيام و الليالى دى بحلوها و مرها إديتنى تجارب و خبرات عمرى ما كنت همر بيها لو مكنتش فى مصر موتورز و حاليا بتعتبر جزء من مكونات شخصيتى يمكن تكون مفيدة ليا أو لأى حد تانى فى المستقبل ......

أخير أرجو من كل واحد إضطريت إنى أستخدم معاه صلاحيات الإدارة إنه يثق تماما إن مفيش بينى و بينه أى حاجة شخصية و إنى كنت بحاول أطبق قانون المنتدى فقط بقدر الإمكان .

بأمانة و من كل قلبى شكرا مصر موتورز

رد: المواجهة ▲AbOnOrA☼ ◄VS► ▲Hazem Shahin☼

اقتباس:

المشاركة الأصلية كتبت بواسطة حازم شاهين (المشاركة 793572)

أخير أرجو من كل واحد إضطريت إنى أستخدم معاه صلاحيات الإدارة إنه يثق تماما إن مفيش بينى و بينه أى حاجة شخصية و إنى كنت بحاول أطبق قانون المنتدى فقط بقدر الإمكان .

انا واخد منك الانذار الوحيد فى حياتى وبشكرك عليه لانه غيرنى للافضل وعلمنى كتير فى المنتدى لغاية ما بقيت مشرف ... وبجد يا استاذ حازم كلنا فخورين جدا بك :Wkiss5:

رد: المواجهة ▲AbOnOrA☼ ◄VS► ▲Hazem Shahin☼

أنا أستمتعت جدا بالموضوع و بالأسئلة الجامدة دى و ربنا يديم المحبة و الأخوة بين الأعضاء

شكر وتقدير للأستاذ حازم شاهين و الأستاذ أبو نورا و المشرف الكبير M.TONSY الرد بتاع حضرتك أبهرنى الصراحة شكر وتقدير لكل المشرفين و الأعضاء دمتم بخير