رد: محتار يا جماعة بليز وارجو المساعدة
 

والله يا استاذي انا مجابت سيرة اللوجان انا كان كلامي ليك لوجة الله فقط - بس عموما لو مش عاجبك شكل اللوجان فية سانديرو شكلها احسن - وعلي فكرة الصوت اللي انت بتسمعة من الماتور لما التكييف بيبقي شغال دا صوت مروحة التبريد ودي بتبقي السرعة التانية بتاعتها مش صوت الماتور والسرعة دي بتشتغل بس لما تكون العربية واقفة او علي سرعة اقل من 30 كيلو عشان قدرة التكييف ما تقلش لكن وانت ماشي السرعة دي مابتشتلغش اصلا

وبرضة انا لا بقولك لوجان ولا سانديرو انا بقولك علي الصح(من وجهة نظري) قبل ما تشتري اي عربية زيرو شوف النوع اللي توكيلة قريب منك لانك متضطر انك تعمل صياناتك في التوكيل مدة 3 سنوات عشان ما تفقدش الضمان واهم حاجة سمعة التوكيل دا كويسة ولا مدوخ البشر

وبالنسبة للاستعمال بالمبلغ اللي معاك دوس وماتقلقش بس قبل ما تشتري اكشف علي العربية كويس - في المرور وعند ميكانيكي نضيف سيبك من موضوع التوكيلات دا - وربنا يوفقك لما فية الخير باذن الله

رد: محتار يا جماعة بليز وارجو المساعدة
 

والله ياباشا انا مش قصدى فعلا انا جبت سيرة اللوجان عشان انا كنت مقتنع بيها اوى بس اللى خلانى اوى انى اغير وجهة نظرى فعلا لما لقيت قلة قطع الغيار ليها فى المنصورة وانا هاقسط عاوز حاجة حنينة عليا اوى لو جرالها حاجة قطع غيار انا كمان كنت هاروح احجز سدقنى بس فى اخر لحظة واحدة زميلتى وهية ماشية بالعربية وبتاخد يو تيرن حصان خبطها اة بجد حصان دخل فى العربية براسة لغاية الوقتى العربية متكلفة تلت الاف جنية ولسة ماخلصتش باب وشوية حاجات كدة يعنى فا دة اللى قصدى اما من اللى انا شايفة كامستعمل بصراحة ان تقريبا 80 % من اللى بيبيع عربيتة بتكون فعلا متهانة وفاتحة بقها انا فعلا تعبت من التدوير حرام اوى لما تكون فيرنا 2006 نصف كماليات وراشة برة و 150 الف كيلو ب 47 الف حرام يعنى كتير اوى وكتير بردة فيرنا 2008 كاملة ب 57 الف لية يعنى مش عارف هوة لية الناس اللى بتبيع كدة بتغالى اوى فى السعر يعنى وحاسس بردة ان بعد الثورة العربيات حتى المستعملة سعرها رفع اوى الفين تلاتة مش عارف لية يعنى طب الجديد ويقولك الجمارك وفرق العملة طب المستعمل بقة لية يعنى حاجة بجد صعبة يعنى وشكرا ياباشا بجد اوى على نصيحتك ليا بس فعلا انا اتخنقت اوى اصعب حاجة فى مصر بقت ان انتا تشترى عربية مستعملة ويا حمرا يا قرعة وكتير اوى قرعا

رد: محتار يا جماعة بليز وارجو المساعدة
 

مش عارف اقولك اية بصراحة - انت عندك مليون حق بس للاسف اللي عامل في بلدنا كده ان المنظومة من الاول غلط - يعني تقدر تقولي لية مصر كلها ركبت الفيرنا مع ان التوكيل اسوأ توكيل دا غير الصناعة اللي زي الزفت وكلها عيوب؟؟؟ - والله انا مابعيب في الفيرنا ولا حاجة عشان ملقيش شتيمة بقيت الموضوع - والغريب ان الناس بتدفع فيها الفلوس دي كلها حتي لو الغبور كل شوية عمال يزود في تمنها وطبعا اللي عايز بعد كدة يبيع حيبيع بالغالي مهو اصلا دافع فيها غالي واكيد لما يبيع حيشتري بالغالي (الدائرة المفرغة اياها) - طب اية البدائل؟؟؟؟؟؟؟؟؟ للاسف يا الفيرنا والانوس اللي قطع غيارهم علي قد ادينا بس للاسف مش قد كدة يا الاوربي عربية كويسة ومشاكلها قليلة بس قطع غيار نار وصعبة يا الصيني اللي لا كده ولا كده

كل ما سبق رايي المتواضع الذي قد يتفق مع البعض اولا يتفق - والاختلاف في الراي لا يفسد للود قضية

رد: محتار يا جماعة بليز وارجو المساعدة
 

سدقنى ياباشا لا خلاف ولا حاجة بالعكس انا مبسوط جدا من نقاش حضرتك الراقى والمحترم انا كنت يعنى مصمم على اللوجان بطريقة يعنى لا تتخيلها لدرجة ان لما كان حد بيقولى الصيانة وقطع الغيار واللى معاة رينو الله يعينو كنت دايما بدافع عنها جدا لكن اللى شوفتة لما زميلتى قدام عينيا اخدت اليو تيرن واتخبطت وودتيها التوكيل لقيت هايتكلف زيادة عن 3000 جنية وفى اية باب وشوية هبل سدقنى مش حاجة بدات افكر ميييييييييييييييييييييييي يييييييييييييييييت مرة اللوجان كعربية اكيد تتفوق عن الفيرنا والانوس وحتى الاوبترا فى رايى لكن كاعتمادية فى السوق لا لازم اللى يجيبها يكون عامل حسابة انة هايصرف عليها اذا قدر الله وجرالها حاجة والواحد يعنى هاجيبها بالعافية وكمان اقساط يبقة فعلا اللوجان بالنظام دة مش هاتنفع معايا ( للتنوية انا جبت مثال اللوجان عشان دى سيارة اوربى وانا كنت مستقر عليها جدا جدا ) بس انا حسيت ان برغم كل عيوب اللانوس انها احسن من الفيرنا ولا انتا اية رايك بصراحة انا روحت شوفتها لقيت انها مش فارقة كتير فلا عن الدايو لانوس 2007 و 2008 بس يهمنى بجد اسمع وجهة نظرك انا سمعت ان الشيفرولية فيها مكونات صينى بس بردة لما سالت ميكانيكى قالى بردة الدايو كان فيها مكونات صينى

رد: محتار يا جماعة بليز وارجو المساعدة
 

بص انا ححكيلك علي موقف حصل معايا - نزلت من البيت الصبح لاقيت الرفف اليمين مخبوط الكلام دا بعد 3 شهور من شرائي العربية طبعا قلت لأ العربية جديده ولازم تتصلح في التوكيل ولاكلام دا روحت التوكيل لقيتها حتتكلف 2000ج ؟؟؟؟؟؟؟؟؟ طبعا سبتهم ومشيت وربنا اكرمني بواحد دلني علي سمكري نضيف رحتلة وبصراحة قلت البيت والعيال اولي - تفتكر السمكري خد مني كام؟؟؟؟؟؟؟ 30ج اه والله ثلاثون جنيها لاغير لحسن تفتكر ان انا كاتب الرقم غلط ولا حاجة والعربية رجعت زي الاول واحسن مع ان الخبطة كانت جامده ومشوهة الرفف

من الاخر اي توكيل تكفة الصيانة فية غالية والفرق فقط في المعاملة

اما عن رايي في الانوس - مع اني كنت كاتبهولك قبل كده - بس الموضوع في الاخر انت وراحتك النفسية وانا شايف ان انت مرتاحلها كتير انا بصراحة مجربتش الشيفورلية بس كان معايا الدايو وكانت عربية ممتازة وجايز اللي بسمعة دلوقت عن الشيفورلية برضة وجهات نظر من ناس مارتحولهاش

استخر ربك اولا - وشوف انت مرتاح لايه ومن غير تفكير كتير روح اشترية وسيبك بقي من اللي يقولك واللي يعدلك وعلي راي الشاعر اللي قال من الاخر كلنا راكبين كنب اسطانبولي بعجل وكلها واحد ومش فارقة

رد: محتار يا جماعة بليز وارجو المساعدة
 

ياباشا متشكر اوى اوى اوى على ردك وكدة فعلا عندك حق كلة زى بعضة بس ماقولتليش رايك على القسط اية رايك فى موضوع القسط من بنك عودة وهل القسط مثلا فى مشاكل فى حالة لا قدر الله عدم الدفع ( انا ان شاء الله مش ناوى بس مجرد سؤال خطر على بالى ) كمان موضوع التامين هل امن تبع مصر للتامين كويس ولا مش كويس ولا اعمل اية اخر حاجة اية رايك فى المصرية والتعامل معاها

رد: محتار يا جماعة بليز وارجو المساعدة
 

انا مقسط مع كونتاكت وهما بصراحة مريحني جدا لكن للاسف مش حقدر افيدك في موضوع بنك عوده ولا في التامين لاني مجربتش الاتنين