رد: طلب مساعدة عاجلة من المهندس سمير عياد و باقى الاخوة
 

العواف عليكوا
ممكن اعرف ازاى بيتعمل الايدل ليرن
بجد انا بعشق القسم ده عشان الاستفاده منه وشكرا لمجهودكم يابشمهندس سمير ويابشمهندس احمد

رد: طلب مساعدة عاجلة من المهندس سمير عياد و باقى الاخوة
 

فاتحة اشراف مبشرة بالخير يا أحمد بك ... ربنا يوفقك

رد: طلب مساعدة عاجلة من المهندس سمير عياد و باقى الاخوة
 

مخبيش عليك انا عارفه بالظبط للانوس لانى جايبه من كتاب الصيانة بس باقى العربيات مش عارف بس متاكد ان معظم العربيات ليها

على العموم بالنسبة للانوس
ال idle learn
1- يفضل تكون العربية باردة
2- افصل البطارية لمدة 10 ثوانى على الاقل ( يكفى فصل الطرف السالب )
3- وصل البطارية
4- افتح الكونتاكت على الوضع on بدون ادارة المتور لمدة 5 ثوانى
5- الكنتاكت off لمدة 5 ثوانى
6- الكنتاكت on لمدة 5 ثوانى ثم قم بادارة السيارة ( على الوضع p لو الفتيس اتوماتيك )
7- انتظر حتى تصل السيارة لدرجة حرارة التشغيل الطبيعية ( و ذلك عندما تعمل المروحة و قد يمر من 10 الى 15 دقيقة للوصول لهذه الحرارة )
8- قم بتشغيل التكييف لمدة 10 ثوانى ( لو بها تكييف)
9- افصل التكييف لمدة 10 ثوانى ( لو بها تكييف)
10- لو السيارة فتييس اوتوماتيك امسك فرامل اليد ثم اضغط على الفرامل و ضع الفتييس على وضع d
11- قم بتشغيل التكييف لمدة 10 ثوانى ( لو بها تكييف)
12- افصل التكييف لمدة 10 ثوانى ( لو بها تكييف)
13- بطل الماتور و بهذا تنتهى عملية التعليم


ده تقريبا مالوش لازمة الا فى حالات نادرة
لان لو البطارية اتفصلت لمدة تزيد عن عشرة ثوانى فبيتمسح من كميوتر العربية خطوات التعامل مع صمام ضبط هواء السلانسيه IDLE AIR CONTROL VALVE
لان كميوتر العربية هو الى بيحدد حركات الصمام (تقريبا حاجة و خمسين وضع للصمام) بناءا على الاتى
1- درجة حرارة المياه (يعنى زى الشفاط ايام زمان ) و انت بتسخن بيقبى قافل الهواء علشان يعلى نسبة البنزين الى الهواء و بعد ما العربية تسخن بالتدريج الصمام بيفتح حتة حتة من خلال الكمبيوتر الى بيعرف من خلال الثرموستات الكهرباء الى راكب على يمين البلوك تحت الكويل
2- لو شغلت التكييف المفروض لو مافيش تحكم فى الصمام ده العربية حتبطل على السلانسيه لكن الكميوتر لما يحس ان التكييف اشتغل (من خلال حساس ضغط الفريون) علاطول يحرك الصمام علشان يحافظ على RPM السلانسيه و العربية متبطلش
3- اثناء التغيير ما بين النقلات ( يعنى لما تدوس دبرياج ) الصمام ده بيحافظ على الRPM انها متقلش علشان العربية متبطلش
4- التوقف السريع تلاقى برضه الصمام ده معلى ال RPM شوية يديك فرصة لو حتمشى تانى تبقى سهل تطلع و لو طولت شوية فى الوقوف بيرجع ال RPM طبيعى تانى
5- و يمكن ليه حاجات تانية انا مش عارفها دلوقتى

المهم الطبيعى ان الكمبيوتر عارف
فلما بتفصل البطارية و تيجى توصلها تانى بعد مدة (10 ثوانى فاكثر) الكميوتر بينسى كل حاجة عن التحكم فى الصمام ده
فتعمل الخطوات دى علشان يتعلم IDLE LEARN
بس ممكن تمشى بالعربية من غير ما تعملها و تلاقى العربية مبرجسة كام يوم (او اقل من يوم لو مشييت و بطلت كتير) و تظبط لوحدها بعد كدة (يعنى بالبلدى اتعلمت لوحدها من تجارب الحياة من غير ما حد يعلمها)
و الى عايزها ما تبرجس معاه الكام مرة دول يعلمها هوا بالطريقة دى
و فى النهاية مفيش ضرر من عدم عملها

و تقريبا لباقى انواع السيارات الى بتحتاج ايدل ليرن حتبقى النظرية واحدة و الخطوات قريبة بس دقة الخطوات تفرق

رد: طلب مساعدة عاجلة من المهندس سمير عياد و باقى الاخوة
 

السلام عليكم جميعا و كل عام و الجميع بخير
لمحاولة اصلاح عيب التبطيل جبت ايدل كنترول تانى و نضفته و ركبته بدلا من القديم و عملت ايدل ليرن و لكن الوضع كما هو لم يتغير و برده اول لما ادور العربية بتبرجل كام ثانية و بعدين تفصل و لما اشغلها تانى و لو اتحركت بيها تبطل و لو و انا واقف على الـ N و زودت بنزين و رفعت الـ RPM و شيلت رجلى فجأة الاقى الـ RPM يتهاوى و العربية تبطل الموضوع ده بيحصل و العربية باردة لكن لما العربية توصل لحرارة التشغيل الموضوع ده بيختفى و برده فصلت ال EGR و الموضوع زى ما هو فهل ممكن يكون فى حاجة مثلا مقاومتها تكون ضعيفة و العربية باردة مثلا فبتعمل برجلة و تبطيل و لا اللى ممكن يكون السبب
فى حاجتين تانى كنت عايز تفسير ليهم لو اممكن فى اوقات لما العربية تبطل و اجى ادور بالاقى لمبة الـ ABS بتفضل منورة فما هو مدلول انارة هذه اللمبة و هل ممكن يكون فيه مشكلة فى الـ ABS علما انى لما بتنور بافصل العربية و ادور تانى فتقوم تطفى
تانى حاجة فى الصباح لما بدور العربية بلاقى دخنة بيضاء مع قطرات ماء خارجة من الشكمان و تزيد الدخنة البيضاء و المياه بالضغط على البنزين علما ان منسوب المياه فى القربة لا يتغير و منسوب الزيت ايضا ثابت و الدخنة ديه بتروح مع وصول العربية لحرارة التشغيل فايه تفسير ذلك

رد: طلب مساعدة عاجلة من المهندس سمير عياد و باقى الاخوة
 

طيب أحنا عاوزين نفصص الأمور شويه كمان

علشان نتعايش مع المشكله بصوره أعمق

نفترض أنها عاكستك وبتعمل إللى بتعمله وهى بارده

أى وأنت لسه بدور صباحا

فهل لو جرشت لمدة ربع ساعه مثلا بعد ماكانت ساخنه والأمور تمام

وحدور من جديد

مبتعملش معاك الحركات ( النص كم ) إللى بتعملها وهى بارده

رد: طلب مساعدة عاجلة من المهندس سمير عياد و باقى الاخوة
 

رد: طلب مساعدة عاجلة من المهندس سمير عياد و باقى الاخوة
 

وأنت طيب يا أستاذنا الفاضل

ياترى كشفت على البوابه من الداخل وأختبرت تقل القرص من خلال تحكمك فى بكرة الأكسراتير

وشوفتها بتبقى قافله كامله وهى بارده ولا لم تعطى هذا الأمر أعتبار

لأن ممكن يكون الأكس بيزرجن معاك وبيخللى البوابه معلقه شويه وفاتحه

وتجرش على هذا الوضع للصباح

وطبعا ده يموت حمل المكنه صباحا

ومع السخونه وحركة الأكس بتسلك الأمور شويه

_______________________

وماهو نوع البوجيهات وهل تم الكشف عليها قبل الدواره صباحا

ومتى تم تغييرها

_________________

معلش تحمل أسئلتى شويه

لعل الله يهيىء لنا من أمرنا رشدا

ونمسك السبب