المشاركة الأصلية كتبت بواسطة mohamed ibiza (المشاركة 224665)

هو ده كان الرد .. !! ..

الرد ده انا سمعته امبارح

الموقف كان كالأتي :

نزلت الصبح لقيت شكمان عربية والدي واقع و الكاوتش بتاعه مقطوع و واقع تحته

قلت اخد العربية اغير الكاوتش و اثبت الشكمان و تمت المهمة بالفعل

و راجع البيت و علي بعد شارعين من بيتي

سايق عربية والدي بمنتهي الهدوء لان الشارع مينفعش فيه اي نوع من انواع الجري ضيق و مليان ناس

و انا ماشي في اتجاهي الصحيح جيت عند حته معينه و هناك u-turn وسعت لنفسي و اديت اشارة و بدأت اخد الملف عشان اخش الشارع اللي في وش الملف ..

و انا في نص اليو تيرن فوجئت بشئ اصفر اللون يصطدم بيا صدمة شنيعه و قوية لدرجة اني اتنطرت الناحية التانيه و و الازاز كله وقع عليا

نزلت و انا مندهش و مصدوم و ببص لباب العربية اللي هي مرسيدس موديل 84 و انتوا عارفين الصاج بتاعها عامل ازاي ببص لقيت الباب بتاع السواق بقي بومبيه !!!

ببص عليه كده لقيته عربية نص نقل قديمة من اللي صاجها عامل زي القفص !

معلومة !

هو كان ماشي في الاتجاه المعاكس المفروض ده كان يبقي ماشي في الصف بتاعي لا البيه لقي الناحية التانيه من الطريق فاضية اكتر قام واخدها مع انها عكس الاتجاه

بقوله ينفع كده يعني ماشي غلط و خبطتني و بوظتلي الباب و الازاز ..

و بلاقي نفسي بتصدم برد انا ماشي غلط ايه المشكلة ما انت عارف ان هنا كله بيمشي عكسي !!!!

بيبرر غلطته ! بأن المشي العكسي بقي عادي دلوقتي !!!!!!!!!

الرد ده فوقني من الصدمة قلتله ماشي استني بقي اجبلك صاحب العربية ( والدي)

قام رد عليا صاحب عربية ايه و بتاع ايه و بيركب عربيته و هيمشي قلت لا الادب مش نافع كده قلة الادب للاسف لازم تشتغل قمت داخل فيه شمال و شاتمه و صوتي علي جداا و الناس جت و وقفت و غلطوه و هو مصمم و بدأ كلام الحقد الطبقي انت ماشي مشغلي التكييف و مش باصص حواليك ولا شايف حاجة ( انا مكنتش مشغل التكييف انا قفلت الازاز للحظة بس عشان كان فيه تراب و عفره)

قلتله انت شكلك مينفعش معاك ذوق و لازم تتلسع فيها و انا همشيها رسمي و محضر و هبهدلك و مش هتشوف سواقه تاني و تدفع غرامه 1200 جنيه و تتحبس شهر و تعويض ليا

والدي وصل ساعتها و شاف المنظر و التاني مستمر في كلامه و عايز يلبسني الغلط

و كعادة المصريين اللي من النوعية دي تحديدا سكت و حط وشه في الارض و دفع و هو اقل من ..... بعد ما اتهدد بالحبس و الغرامه و هكذا

خدت منه تمن الباب اللي تم تدميره

الخسائر عنده

رفرف .. فانوسين .. اكصدام حديد

عندي باب و ازاز

300 جنيه باب بالاكره بالكالون بالباكتات بحليات داخلية بالازاز

و الرش كان عندي رفرف مخبوط قلت نظبطه و نرشه بالمرة ب 500 جنيه باب و رفرف

الخلاصة و اللي عايز اقوله ان مبقاش فيه اي نوع من انواع الاعتراف بالخطأ ولا التقدير

نظام تلبيس و خلاص عشان ميدفعش

السير عكس الاتجاه في رأي الناس دلوقتي او علي الاقل اللي من النوعية دي بقي عادي و مش غلط و مش مشكلة !!!

و انا اللي ماشي صح بقيت غلطان و كان لازم اخد بالي !

مفيش احترام للمرور مفيش تقدير للناس مفيش احترام للنفس حتي !!

خدوا بالكم من نفسكم و ربنا يحمينا جميعا

لكي الله يا مصر !

المشاركة الأصلية كتبت بواسطة hazem_khidr (المشاركة 224958)

قدر الله و ما شاء فعل يا محمد
تصرفك صح و انا قايلك امبارح لما كلمتني
ال 300 جنيه مش مبلغ بس كان لازم يتأدب و انا لو مكانك كنت حملته تمن الدهان كمان.
امبارح كنت مسافر القاهره لقيت كميه غباوه و استهبال علي الطريق مالهاش حصر
لدرجه اني كرهت الطريق و ختمت في القاهره و انا داخل التحرير من عبد المنعم رياض
ماشي عادي و فجأه لقيت عربيه اوبترا داخل في اليمين و انا بعدي قمت واخد سنه يمين و فرامل و زماره
و البيه ماشي ولا همه قمت محصله و فاتح الزجاج (اصل كنت مشغل التكييف عقبال عندك:) )
و بقوله ينفع كده يعني (كان معاه مراته و اولاده)
يقوم يقولي انت اللي غلطان قولتله انا ماشي في حارتي ماجتش ناحيتك
فقالي واحد بيعدي قدامي فجأه قولتله يعني دا يديك الحريه تخبطني ما تمسك فرامل ولا تعمل اي حاجه
و روحت مكمل شتيمه و سيبته و مشيت!!!!
يعني غلطان و بيقاوح ولما اتزنق يقول كان واحد معدي في وشي
هو خلاص يعني مافيش حد بيعترف بغلطته
حسبي الله و نعم الوكيل