رد: سؤال عن موقف حصل في نقطه تفتيش علي الطريق
 

الف شكر لردودكم جميعا
جزاكم الله خيرا
استاذ خالد الكمين ده هو الكمين الي ادام هيبر وان في طريقك ل 6 أكتوبر
هو حتي نفس الكمين وقف كذا صديق ليا سايقين عربيات والدهم وبيطلب منهم التوكيل وبيوقفهم شويه وبعدين يسبهم

رد: سؤال عن موقف حصل في نقطه تفتيش علي الطريق
 

السلام عليكم

استاذ خالد انا كان معى جميع اوراق العربية من فاتورة شراء

وجواب للمرور للترخيص ....... وكل الاوراق باسمى وبرضو الضابط كان

رخم جدا لدرجة انى لما عديت على اكتر من كمين وكان الضابط بيسأل

على الرخص وكنت باديلة الايصال كان بيستغرب جدا !!!!!!!!!!!

اما النمر التجارية فعلى حد معلوماتى زى ما حضرتك ذكرت للتنقل بين المصنع

و المعارض او للتحرك بصفة عامة لاجراء الترخيص وكمان بتعطى للورش

للتنقل للسيارات الخارجة من حوادث وبتكون نمرها اتسلمت واتمنى السلامة للجميع

رد: سؤال عن موقف حصل في نقطه تفتيش علي الطريق
 

ممكن صاحب العربية يكون لسه ما خلصش الرخصة بتاعتها
وفى الحالة دى بيحط نمر تجارية
او ممكن يكون فيه مشاكل فى الرخصة
تقدر تكون مثلا بتاعة ورثة ولسه اعلام الوراثة ماخلصش
اللى اقصده ان لنمر التجارية مش معمولة علشان المعارض او الورش فقط




تحياتى للجميع

رد: سؤال عن موقف حصل في نقطه تفتيش علي الطريق
 

هو قانونا من حقه انه يشك و يسأل لان مش مكتوب سائق او مثبوت في الرخصه ان والد عامل توكيل ليك
لكن الضابط المفروض فاهم لما بيشوف اسم الاب و اسم الابن ما بيتكلمش
و هو دا الضابط المحترم اللي بيطبق روح القانون و ليس القانون
لكن عندك ضابط غشيم تلاقيه عاوز يعمل منظر و خلاص
و دا تتكلم معاه بذوق علي قد ما تقدر علشان تنهي نفسك

رد: سؤال عن موقف حصل في نقطه تفتيش علي الطريق
 

ياراااااااااجل كمين هايبر وان ؟؟؟؟؟ دى ناس لذيذة خااااااااالص طيب كويس انك قلت يبقى انت عملت كذا غلطة هقوللك عليهم سعادتك داخل على الكمين تجرى وبدون تشغيل الانتظار وضارب النور العالى ف عنيهم وياسلام لو العالى ده زينون يعنى النور الازرق وممكن تكون معلى الكاسيت على آخره الكلام ده يقلق اى ظابط واقف فى كمين ويخلى دماغه تشتغل واحساسه الامنى يبدأ يشتغل فيعمل كذا حاجة اولا يقف هو و2 معاه ادام العربية بحيث يبقى مستعد انه ينط من ادامك لو جريت وغالبا بتبقى ايده ع الطبنجة او قريبة منها طبعا انت ملاحظتش ايده وطبعا سنك صغير جدا او شكلك ميديش زيادة عن 20 او 25 سنة بالكتير كل الحاجات دى مجتمعه تخليه يقلق ويفتش العربية كلها وبعد كده يبتدى يتطمن لكلامك فيبتدى يضايقك لانك قلقته ويركنك شوية عقابا ليك على حالة القلق نصيحة ليك ولكل اخوانى طالما داخل على كمين تعمل الأتى اولا تهدى السرعة من قبلها بمسافة بحيث حتى لو كنت بتجرى ميخدش باله انك كنت بتجرى اصلا ثانيا تدى اشارة انتظار وانت دداخل عليه وتهدى السرعة جدااااا اول متقرب منه ثالثا تطفى انوار العربية العالى والواطى لحد متعدى منه ورابعا و دى اهمهم تربط الحزام من بعيد قبل ميشوفك لانه هو فى الملاكى غالبا بيدور على الحزام والحزام بيديه انطباع انك شخص ملتزم خامسا / تطفى الكاسيت او توطيه خالص لانه بيستفزه وممكن يقوللك انت داخل على كازينو انت داخل على كمين سادسا / اول متيجى جنبه ودى انا جربتها شخصيا ابتسامة خفيفة كده ف وشه وتقول له سلام عليكم لله اولا وثانيا دى بتخليه حتى ولو ناوى يوقفك كلمة السلام والابتسامة بتخليه نفسيا من جواه بيتطمن لك ويعديك اخيرا بعض اخوانا ممكن يزعل من كلامى وخاصة البند الاخير بند الابتسامة والسلام ويقول احنا هنحايلهم طبعا نحايلهم انت فى بلد غير ديموقراطى وابسط شىء شفته كمين فى مدخل اسكندريه ع الصحراوى موقف ييجى 7 او 8 عربيات ملاكى ليه ؟ من غير سبب ابسط شىء يقوللك هكشف عليك كومبيوتر خد لك عطلة نص ساعة ولو ف قبلى خد لك عطلة 3 ساعات لان معندهومش فى الكماين كومبيوتروياسلام لو واحد مجرم عامل كذا جناية وهارب طلع اسمه شبه اسمك فيها عطلة يومين تلاتة ومش هيسيبك غير لما تثبت انك مش هو والسلام لله بتاخد عليه حسنات لكن هو من حقه فى الكمين يوقف اى حد ويساله وياخد رخصه فلما تقول له سلام عليكم مخسرتش حاجة بل كسبت حسنات وثانيا بيتطمن لك والابتسامة صدقة زى م قال النبى عليه الصلاة والسلام ومعلش طولت عليكم هقوللكم نكتة لذيذة حصلت معايا كنت داخل على كمين ولابس الحزام وحزام عربيتى بيج وانا لابس تى شيرت بيج فوقفنى وقال هات رخصك فانا فهمت فعملت نفسى بقلع الحزام علشان اجيب الرخص فلما شافه قال لى امشى خلاص اسفين يااستاذ اتاريه مكانش شايف الحزام ههههههههههه

رد: سؤال عن موقف حصل في نقطه تفتيش علي الطريق
 

وبمناسبة السلام اذكر فى كمين كفر شكر و ده كمين ظباطه معندهومش يامه ارحمينى وخصوصا وردية بالليل من بعد 12 لكن بصراحة دايما انا ربنا رازقنى معاهم بكل خير واذكر مرة امين الشرطة اخد منى الرخص بدون سبب وراح لظابط المباحث فجالى بقول له سلام عليكم قال وعليكم السلام لامؤاخذة يابيه واخد الرخص من امين الشرطة واداهالى فى حاجات بسيطة لكن تأثيرها كبير حتى فى معاملاتنا الشخصية مع بعض وأذكر انى اخدت عهد على نفسى مشتمش حد حتى ولو كان غلطان ولو انا غلطان مش عيب انى اقول آسف وشعبنا طيب جدا كلمة شكرا او آسف تأثيها محترم وتدل على انك محترم حتى ولو كان ناوى يشتمك بيرجع ولو شتمك بيتكسف من نفسه ولو محصلش كل ده انت كده كده كسبااااااااااااااان لان العداد بتاع ربنا شغااااااااااااااااااااااا ااااااااااااااااااااال لكن شوف لو شتمت كل واحد يكسر عليك او يغلط فيك عداد السيئات شغاااااااااال تعمل حسنات باليمين وتركب عربيتك تصرفهم بالشمال / ومر ه واحد داخل عكس بقول له حرام عليك عطلت الطريق راح شاتمنى فقلتله متشكر فقال انت بارد بشتمك وتقول متشكر سبحان الله عربجى معدى بعربية كارو بيقول له اومال عايزه ينزل لمستواك ويشتمك وراح ضاربه ببتاعة الحصان دى عورته والتانى مردش وخد عربيته ومشى يعنى ربنا جابلى حقى فى ساعتها ارجو اننا ناخد الكلام ده بعين الاعتبار لان القيادة اخلاق اولا وذوق ثانيا وفن ثالثا لان الاخلاق والذوق هيساعدوك على فن القيادة وهيخلو الناس تتجاوز عن اخطائك اشكركم جميعا

رد: سؤال عن موقف حصل في نقطه تفتيش علي الطريق
 

انا سمعت ان القانون يتاع التوكيل ده نازل قريب و لازم صاحب العربية يعمل توكيل لكل اللى بيسوقها حتى لو ابنه
و انا طبعا بسوق عربية ابويا من غير توكيل لغاية دلوقت