بفكر اشترى فليشيا بس محتاج رأيكم ضرورى جدا...

[prince_25025]

لو سمحتم انا حاليا عايز اشترى أول عربيه ليا فى حياتى وأنا قدامى عربيه سكودا فليشيا موديل 95 بس لسه ما جربتها و أنا قرأت كلام على النت عن الفليشيا ان عفشتها ناشفه بس انا الصراحه زى ما وضحت لكم جديد فى حكاية شراء العربيات دى فمش عارف حكاية ان العفشة ناشفه دى تعتبر ميزه و لا عيب فى العربيه و كمان سمعت انه فيه عيوب فى العربيه زى ان الدريكسيون تقيل أوى عن الموجود فى العربيات الكورى من نفس فئتها و مشكلة سخونة العربية فهل فعلا الكلام ده صحيح عن العربيه و لا لأ و اذا كانت المشاكل دى موجوده فهل هى فى كل موديلات الفليشيا .. و أسف جدا جدا على الأطاله

[AbOnOrA]

اهلاً بيك فى مصر موتورز وان شاءالله توفق فى اختيار السيارة المناسبة ونباركلك عليها قريب

العفشه الناشفة يعنى العربية مبتاخدش وتدى مع المطبات بمرونة وبالتالى بتحس بوعورة الطريق مع المشى وبتتعب فى القعدة لو بتمشى مشاوير كتيرة وطبعا التحكم فيها بيبقى مش مرن اوى وديه كلها حاجات مش محببه لينا فى مصر خاصة ان الشوارع اكترها مكسره
مشاكل الحرارة بنسمع عنها كتير فى الفليشيا فعلاً غير كده العربية رغم ان سعرها اقتصادى الا ان قطع غيارها غالية مقارنة بالبدائل الاسيوية
عامة ممكن تشارك فى قسم المقارنات وتحط ميزانيتك وطبيعة استخدامك ومتطلباتك واحنا نقولك البدائل المتاحة والفروق والمميزات فى كل عربية

[prince_25025]

شكرا جزيلا لك يا غالى على ردك القيم و فعلا مشكلتى النشوفية و السخونه دول هيحتاجوا أنى أفكر فى عربيه تانيه بس اعذرنى انا حاليا بدور على عربيه تكون فى حدود 30000 الى 35000 جنيه فياريت لو عندك أى اقتراحات تانيه تقولى عليها و شكرا لك مره اخرى

[ali farouk]

الفليشيا عربية شبابية وجميلة ومتينة وصاج مش زى الورق بتاع اليومين دول بس لية تاخد مو 95 خد 97 مكيفة ومش هتعدى الثلاثين للحالة الجيدة ، اما بالنسبة للسخونة والميكانيكا بتاعتها لو لقيت ميكانيكى سكودا كويس وامين ويكون جنبك انا ارشحلك الفليشيا بقوة لانها هتكون اول سيارة ومش هتحس بتقل الدريكسيون ، والنشوفية بتاعة العربية تربط عفشة كويس وتاخد المطبات ع الهادى، قطع الغيار غالية شوية لكن معمرة بالاخص لما تجيب الاصلى او مستعمل الخارج وده متوفر وكتير

[yaser4050]

بلاش الفليشيا دا رأيى مشكلتها الأكثر تكرارا و عن تجربة انها بتسخن بسرعة جدا