قواعد القيادة في مصر

[سيد عبيد]

قواعد القيادة في مصر تحت شعار " مانت كده كده ميت "

القاعدة 1:

لو عربيتك كبيرة أو قديمة، أستخدم المبدأ القانوني: اللي خايف على عربيته يوسع!!

ملحوظة: ابعد عن سكة العربيات المخرشمة ،
بيسوقوا بنظرية ضربوا الأعور على عينه!!

القاعدة 2:

قاعدة البوز بيز: اللي يدخل ببوز عربيته الاول للتقاطع هو صاحب أولوية المرور! احرص على أن تكون صاحب أول بوز.

ملحوظة: لا تطبق الـبوز بيز مع أي لوري أو أتوبيس، حرصاً على بوزك لا مؤاخذة.

القاعدة 3:

الإشارات تكشف نواياك للأعداء، أياك أن تستخدمها!

القاعدة 4:

لا تترك مسافة للأمان بينك و بين السياة التي أمامك فهذا له عدة مخاطر:

1. عربية ثانية حتملا الفراغ في ثواني و برضوه ما يبقاش فيه مسافة بينك و بين الي قدامك، كل الي كسبته انك اتأخرت لورا شوية.

2. حتدي فرصة للعيال يعملوا غرز قدامك.

3. كل المشاة حيغمضوا عينيهم و يعدوا من الحته دي.

4. الي وراك حيقعد يزمر - لو كان مؤدب -
أو تسمع شوية أسامي حيوانات لو كان سواق تاكسى- مؤدب - ،
أو حيخبطك من ورا لو كان سواق مشروع- و دول مفيش حد منهم اصلا مؤدب -

الإشارات مش معمولة علشان تنظم المرور ، معمولة علشان شكل مصر
يبقى متحضر بس!

اعتمد على العساكر ( مع تحملك كامل المسؤلية لو واحد منهم شاورلك تعدي و بلدياته الناحية الثانية فتح السكة للوري ) أو يفضل أن تستعمل البوز بيز ( راجع القاعدة الثانية ).

القاعدة 5:

اذا كنت مش واقف في الصف الأول في الاشارة اعمل حسابك تزمر بشكل متواصل و هستيري أول ما الأشارة تفتح، لأن الناس الي قدام بيبقوا واقفين في الاشارة من زمان و جايز جداً يكونوا ناموا!!

القاعدة 6:

معظم الحوادث تحدث في التقاطعات أول الأشارة ما تحمر، كل ما عديت الإشارة الحمراء أسرع كل ما قلت فرصة انك تتخبط!

القاعدة 7 :

الشارع مكان مقرف، سوق بأسرع ما يمكن حتى تتخلص من هذا الهم بسرعة، الناس الي ماشيين بالراحة مرضى نفسيين بيستمتعوا بالعذاب ، يستاهلوا الي يجرى لهم.

القاعدة 8:

من حقوقك الدستورية أن تركن أمام باب المحل الذي تريد أن تشتري منه، اذا سبقك واحد تيت و ركن قدام الباب، فمن حقك أن تقفل عليه و تركن صف ثاني أو ثالث، و مش مهم لو الشارع اتقفل، ايه يعني أما الناس تتعطل عشر دقائق علشان تستمتع بحقوقك الدستورية؟ هي يعني الدنيا طارت ولا كان وراهم الديوان؟

القاعدة 9:

من حقك أيضاً أن تخرج من مكان انتظارك في أي لحظة تشاء، اكسر الدركسيون شمال و اطلع، أي حد ماشي في الشارع لازم يقف لك فوراً، راجع البند السابق.

القاعدة 10:

إحترس من ثلاث أنواع من السائقيين بيسوقوا و كأنهم مستحيل يموتوا:

1. Computer Gamesالعيال الروشين الي بيلعبوا فاكريين إن ممكن يكسبوا زيادة لو ساقوا أسرع
Life
2. موتوسيكلات توصيل الطلبات ( Home Delivery ).

3. سواقين الميكروباص وتحتها 113 خط.

ملحوظة: إوعى تحاول تثبت لحد منهم إن فكرته غلط. فاهمني وبالذات رقم 3!!!.

القاعدة 11:

الرصيف ليس للمشاه، بل لركن السيارات و فرشات الباعة الجائليين و المحلات... الخ، لذلك يحق للمشاة السير في وسط الشارع، لمزيد من الأمان،

:D :D

وبكده يبقى انت اكيد اكيد اكيد ف مصر♥

[AMRK]

نفس اللي بعمله بالظبط

[memo59]

هو ده حال المصريين

[Toyota Corolla]

[QUOTE=سيد عبيد;872625]

الإشارات تكشف نواياك للأعداء، أياك أن تستخدمها! و كمان بتستهلك كهربا

هههههههههههه أنا بعاني من الموضوع ده جدا و بالذات اللى يحدف من أقصى الغرب الى أقصي الشرق عشان يخش فى شارع فرعي

[reda310]

موضوع جميل وقواعد مهمة معظم المصريين بيستخدموها الوقتى
وعليك اما تاخد جنب وتمشى على قواعدك القديمة وتوصل براحتك ويدينا ويديك طولت العمر
او تنقل للقواعد الجديدة دى وتبقى مصرى اصيل