زيت شل الاحمر احادى الدرجة 50

[soltanfriend]

السلام عليكم النهارده روحت المحطة اغير زيت ما لاقيتش زيت بترومين الابيض اللى العربية متعودة عليه بس فيه هناك واحد اعرفه قعد يقولى حط شل الاحمر هو احسن زيت فى الدنيا وحلو ليك فى الحر والكلام دا انا عربيتى ميراج 98 والحمد لله الماكينة زى الفل ومش بتاكل زيت وصوتها هادى وكل حاجة تمام هو الجيركن ب75 مكتوب عليه احادى الدرجة 50 ومكتوب علين لمحركات البنزين ويصلح للديزل هو العربية ماشية عادى بس حاسس ان صوتها مكتوم حاجة بسيطة والسحب قل حاجه بسيطة جدا مع التكييف فهل اكمل بيه عادى ولا انزلة ولا ايه ؟

[حسام البورسعيدى]

زيوت شل ممتازه فى الصيف بالذات وانا عن نفسى بستعمل زيت شل الاحمر على طول وشغال معايا زى الفل فى عربيتى الأفانتى 97 ..

وساعات بتاخر عليه كمان لغاية 3 و 4 الاف كيلو وبينزل كويس بالرغم من التاخير .....

[Vanditta]

المشاركة الأصلية كتبت بواسطة soltanfriend السلام عليكم النهارده روحت المحطة اغير زيت ما لاقيتش زيت بترومين الابيض اللى العربية متعودة عليه بس فيه هناك واحد اعرفه قعد يقولى حط شل الاحمر هو احسن زيت فى الدنيا وحلو ليك فى الحر والكلام دا انا عربيتى ميراج 98 والحمد لله الماكينة زى الفل ومش بتاكل زيت وصوتها هادى وكل حاجة تمام هو الجيركن ب75 مكتوب عليه احادى الدرجة 50 ومكتوب علين لمحركات البنزين ويصلح للديزل هو العربية ماشية عادى بس حاسس ان صوتها مكتوم حاجة بسيطة والسحب قل حاجه بسيطة جدا مع التكييف فهل اكمل بيه عادى ولا انزلة ولا ايه ؟

زيت شيل الاحمر من على موقع شيل
معمول للمحركات القديمة اللى عدى على استعمالها اكتر من 100 الف كيلو
وبيقلل ظاهرة احتراق الزيت (لو العربية بتاكل زيت يعنى )

ف نصيحة لو الموتور عندك حالتة كويسة ومش بياكل زيت فالافضل انك تستخدم شيل الاصفر hx5 متعدد الدرجات
والفرق بين الاحادى والمتعدد ان الاحادى درجة لزوجتة مابتتغيرش بتغير درجة الحرارة والمتعدد العكس
ودة بيفيد فى الدوارة الصبح ان الزيت المتعدد بيبقى خفيف عشان المحرك بارد وبينتشر بسرعة فى جميع اجزاء المحرك وبيقلل من ظاهرة التأكل لاجزاء المحرك خصوصا الاجزاء العليا نتيجة الاحتكاك اللى بيحصل بدون تزييت عشان الزيت كلة بيبقى فى حوض الموتور
واما الموتور بيسخن درجة لزوجتة بتزيد

[soltanfriend]

تمام يعنى بكل الصور انا غلطت فعلا انى وافقت على الزيت دا بس الحل دلوقتى انى استنى ومع الغيار الجاى اغير نوع الزيت ولا انزلة دلوقتى وانا اسف للآطالة

[حسام البورسعيدى]

يا باشا ولا غلطت ولا حاجه .. الزيت كل ما يكون اتقل يحافظ على الموتور اكتر وخصوصا فى الحر الشديد ده .. شل الاصفر طبعا افضل فى نقطه انه متعدد الدرجات وانه بيقعد 3000 كيلو .. ولكن متقلقش خالص من الزيت اللى انت حطيته ......