اساطير شائعة جدا في طب الاطفال .. التهابات الاذن الوسطى ..

[dr.wael7yran]

السلام عليكم ..
ازيكم جميعا ..
معلش اتأخرت عليكم ..
نتكلم النهاردة عن اكثر الاخطاء الطبية شيوعا بخصوص التهاب الاذن الوسطى ..
و اللي مقراش الموضوعين اللي قبل كده ..
انا اسمي د/ وائل .. اخصائي الاطفال و حديثى الولادة ..
و نقول كام معلومة كده على الماشي قبل ما نتكلم في الاخطاء :
اولا : التهاب الاذن الوسطى مرض شائع جدا في الاطفال و نادر جدا في الكبار ..
حوالي 70% من الاطفال تحت سن 3 سنين بيجليهم على الاقل مرة واحدة التهاب في الاذن الوسطى .. و تلت الاطفال دول بيتكرر عندهم اكتر من مرة ..
و اكتر سن الاطفال معرضين ليه لالتهاب الاذن الوسطى من 6 شهور و حتى 18 شهر ..
و كل ما بيكبر الاطفال كل لما مناعتهم تزيد و التكوين الداخلي لاذن الوسطى بيقوى و بتقل فرص حدوث المرض حتى تكاد تنعدم بعد سن 6 سنين ..

ثانيا : اكتر من 90 % من الحالات بتكون نتيجة مضاعفات من دور البرد ...
تقريبا تلت الاطفال اللي بيجيلهم برد في سن (6-18 شهر ) بيتطور الموضوع عندهم الى التهاب في الاذن الوسطى ..

ثالثا : في اطفال بيكونوا عرضة اكثر من غيرهم للاصابة بالتهابات الاذن الوسطى ..
1- الاطفال اللي بيرضعوا بالببرونة ( خصوصا و هم نايمين )
2- الاطفال اللي بيستخدموا السكاتة او التيتينا او pacifier
3- الاطفال اللي عايشين مع اب او ام مدخنين
4- الاطفال اللي بيروحوا بدري للحضانات .. التهاب الاذن الوسطى ذات نفسه موش معدي .. بس زي ما وضحت هو غالبا بيبقى نتيجة لدور البرد اللي فرص الاصابة بيه بتزيد جدا عند دخول الطفل الحضانة و خصوصا في سن صغيرة ( اقل من سنة و نصف ) ..

رابعا : 60 % من حالات التهاب الاذن سببها بكتيري ..
بس في 40 % سببها فيروسي ..
و في معظم الاحوال .. الاتنين يبقوا هم السبب ..
و الفيروس بيخلى الاستجابة للمضاد الحيوي اصعب ..

خامسا : التهاب الاذن الوسطي في غالبية الاحوال مرض خفيف ..
بس ساعات بيكون له مضاعفات و احيانا مضاعفات خطيرة - ربنا يبعد الشر عن ولادنا جميعا -
و من اشهر مضاعفاته حدوث ثقب في طبلة الاذن الوسطى ..
و نيجي بقى لاشهر الاخطاء الطبية ..

1- missing the diagnosis او بالبلدي يفوت على الام او الدكتور :
الاطفال اقل من سن سنة لا يستطعيون التعبير عن الم الاذن ..
ربما تظهر عليهم بعض الاعراض مثل النرفزة و العياط الكتير و عدم النوم ليلا او ارتفاع شديد في درجة الحرارة ..
و ساعات بيشدوا ودانهم جامد او بيقعدوا يهرشوا فيها كنوع من التعبير عن المهم ..
و كقاعدة عامة اي طفل سنه اقل من سنة و عنده برد و ظهرت بعدها بيومين الاعراض دي لازم نشك في التهاب الاذن الوسطى ..
وتشخيص التهاب الاذن الوسطى لازم يكون باستخدام منظار الاذن او Otoscope و مينفعش بالبق كده ..
و المفروض .. المفروض انه الكشف على الاذن جزء اساسي من اي زيارة لطبيب الاطفال ..
و لذلك .. و انا اسف وانا بقول كده .. لا تثق بتشخيص التهاب في الاذن الوسطى بدون الكشف على اذن طفلك ..

2- عدم التفكير في الاسباب الاخرى لالم الاذن :
موش اي وجع في الاذن يبقى التهاب في الاذن الوسطى ..
في اسباب تانية كتيرة و اهمها ..
1- التهاب الاذن الخارجية ( و خصوصا في ايام البحر و حمام السباحة )
2- وجود جسم غريب في الاذن ( حبابيبنا اللي بيحبوا يجربوا و يحطوا حاجات غريبة في بقهم و مناخيرهم و ودانهم )
3- الم مسمع في الودان من التهاب شديد في الاسنان او الزور مثلا ..

3- المضادات الحيوية :
طبعا اللي قرا الموضوعين اللي فاتوا عارف انه انا موش انصار المضادات الحيوية ..
بس هنا الموضوع مختلف ..
اذا ثبت التشخيص لابد من اعطاء المضاد الحيوي ..
و من احسن الانواع ال Unasyn و عائلته ..
و ال Augmentin و عائلته ..
او ال Ceclor و عائلته ..
و ال Cefizil و عائلته ..
بقية الانواع اقل تأثيرا ..
و لابد من اعطاء المضاد الحيوي لفترة لا تقل عن 7 ايام كاملين ..
و دي غلطة بتقع فيها الامهات لأن معظم الاعراض بتختفي بعد 24 ساعة من العلاج .. بس لازم نكمل المدة علشان نضمن عدم تكراره كتير ..
و برده الحقن موش فعالة اوي في علاج التهاب الاذن الوسطى ..

4- معلومات لازم تعرفها كل ام :
و اي دكتور لازم يفهم الام المعلومات دي كويس اوي ..
اولا : زي ما قلنا اول الموضوع انه التدخين في البيت و استعمال السكاتة و دخول الطفل الحضانة بدري فوق سن سنة و نصف بيخلي الاطفال اكثر عرضة لالتهاب الاذن الوسطى و لا بد من تحذير الوالدين من الحاجات دي ..
و خصوصا موضوع التدخين ده .. حرام عليكم ولادكم

ثانيا :التهاب الاذن الوسطى المزمن :
و ده يا جماعة معناه استمرار التهاب الاذن اكتر من اسبوعين ..
و اعراضه هي فقدان السمع الجزئي و ليس الم الاذن ..
يعني لا قدر الله لو لقيت ابنك مبقاش يسمع كويس و موش بيستجيب لكلامك بسرعة او هو ذات نفسه بدأ يتكلم طول الوقت بصوت عالي .. او دايما عايز يرفع صوت التليفزيون او الكاسيت .. روح اكشف على ودنه فورا ..
و ده علاجه بمركبات الكورتيزون و ليس بالمضادات الحيوية ..
و ادوية الحساسية Anti-histamine او ادوية البرد مالهاش لازمة ..
و لا بد من اللجوء الى اخصائي انف و اذن و حنجرة ..
لانه ساعات بنركب انابيب صغيرة كده لفترة مؤقتة كحل اخير ...

5- المسكنات و ادوية الحرارة :
و دي عايزة موضوع لوحدها ..
الم الاذن لا يطاق ..
و المسكنات ساعات بتبقى ضرورية ..
بس موش كل الانواع هتنفع لطفلك ..
و في انواع خطيرة و لا بد الابتعاد عنها ..
زي Aspirin
او Aspegic
او Vegaskine
او Novalgine
او Sulide
بس ده موش معناه ان كل المسكنات ممنوعة
في حاجات امان بس بجرعة محسوبة و لفترة محددة ..
و عموما .. من فضلك لا تلجأ للمسكنات بدون استشارة طبيب اطفالك ..


و كده انا ابقى خلصت معظم الاخطاء و الاساطير الشائعة بخصوص التهاب الاذن الوسطى ..
التهاب الاذن الوسطى من اكثر الامراض شيوعا بين الاطفال و خصوصا الرضع ..
التهاب الاذن الوسطى لا يتم تشخيصه او متابعته الا باستخدام منظار الاذن ..
في معظم الاحوال لابد من اخذ المضاد الحيوي الصحيح المؤثر و لفترة كافية ..
لا بد من المتابعة الجيدة لسمع الطفل بعدها ..
و الملاحظة الجيدة لحدوث اي مضاعفات او ظهور اعراض جديدة ..
و ربنا يستر على ولادنا جميعا ..
انا مستعد للرد على اي سؤال او استفسار ..
و اذا عجبك هذا الموضوع انتظرني في الموضوع القادم .. التهاب الشعب الهوائية ..
و تقبلوا سلامي جميعا .. :GR OWIN~12:

[nktis]

اولا شكرااا يا دكتور علي الموضوع والمعلومات...
بس ليه بلاش فيجاسكين اقماع للاطفال؟؟؟؟؟؟؟؟؟؟؟؟؟؟؟؟؟؟ ؟؟؟؟؟

[dr.wael7yran]

المشاركة الأصلية كتبت بواسطة nktis اولا شكرااا يا دكتور علي الموضوع والمعلومات... بس ليه بلاش فيجاسكين اقماع للاطفال؟؟؟؟؟؟؟؟؟؟؟؟؟؟؟؟؟؟ ؟؟؟؟؟

اولا العفو يا باشا ..
و ثانيا : احنا بنخاف من حاجة اسمها Reye's syndrome
و ده بيحصل لما التلاتة دول بيتجمعوا : التهاب فيروسي + ارتفاع في درجة الحرارة + مشتقات الاسبرين او salicyates
و الفيجاسيكين من مشتقات الاسبرين كما تعلم ..
و راي سندروم ده عبارة عن التهاب شديد في المخ و الكبد و قد يؤدي الى الوفاة او الشلل ..
و بيجي لطفل واحد كل مليون طفل ..
بس تضمنها ازاي دي ..و على حظك يقع الواحد في المليون ده عندك انت
و لذلك .. يفضل تجنب جميع مشتقات الاسبرين في الاطفال و خصوصا عند ارتفاع درجة الحرارة ..
و ربنا يوفقك

[nktis]

شكرااا علي التوضيح بس بصراحه الفيجاسكين بشوفه دايما في رشتات اطباء الانف والاذن والحنجره بكثره سواء كبار او اطفال بجانب كميات مضادات حيويه زي مثلا سيفاكسون لمده 3 ايام ويكمل بمضاد حيوي اخر شراب..........:1281F1~121 :

[m.m.]

شكرا يا دكتور على المعلومات الجميلة دى وعلى فكرة انا طالب بالفرقة الخامسة طب قصر العينى وكان فيه معلومة درستها فى الانف والاذن احب اخد رأي حضرتك فيها وهل هى شائعة ام لا :

هناك اعراض مصاحبة لالتهاب الاذن الوسطى فى الاطفال مثل القئ والاسهال وممكن الاعراض دى تؤدى الى تشخيص خاطئ وهو التهاب المعدة والامعاء ( gastroenteritis )