قبل أن تشتري اسبيرانزا - احذر!

[khalidsdk]

باختصار سأروي لكم خلاصة تجربتي المريرة ومعاناتي مع اسبيرانزا 516 -1600cc حتى تم بيعها والحمد لله ،هذا ليس للنقد ولكن للاستفادة وأخذ العبرة لمن يريد :

(سيارتي كانت موديل 2007 وعملت بها 20000كم ولونها ،Sky grey- سيارتي السابقة كانت نوبيرا 2003 أوتوماتيك)

1) بداية استلام السيارة المكيف كان لا يعمل ودواسة البنزين بتقطع، تم ضبطهم بصعوبه وبعد عده زيارات للتوكيل وعده خناقات أيضا.
2) العفشة ناشفة جدا وتحس بكل زلطة في الطريق وتسمع أصوات غريبة وانت بتلف يمين أو شمال حتى بعد تعديل العفشة .
3) سحبها ضعيف جدا خاصة عند تشغيل التكييف وياسلام لو كنت محمل معاك ناس في العربية وطالع كبري في عز الظهر (فضيـــــــــــــــحة)، وحتلاقي في الأحوال العادية والله بلا مبالغة الـ 128 بتسبقك في الطلعة وكذلك جميع السيارات الـ 1300 والـ 1600 طبعا ، وموضوع انها 117 حصان وانها 147 نيوتن ده كلام فاضي وكذب عن تجربة وهي من واقع التجارب تقدر تقول انها فعليا 90 حصان ، 130 نيوتن/م
4) في المطبات وما أكثرها تسمع صوت طقطقة قدام ولما المطب ييجي وره تسمع نفس الصوت ورا وهو صوت ثابت في المطبات ومنتظم. (سوف تتعود عليه).
5) صفارة الفرامل وخاصة عندما تسخن الطنابير تحس انك ماشي بصفارة ممتازة تغنيك عن أي كلاكس (أيضا فضيحة)، نوعية التيل سيئ جدا بياكل الطنابير ، وكذلك نوعية الطنابير سيئة جدا - الطنابير اتاكلت بعد 20الف كيلو - طبعا خارج الضمان.
6) التابلوه بدأ يتقوس ويقب من الشمس ولسة العربية ما كملتش سنة !!
7) الباغة الخاصة بالكلاكس في الدركسيون غير حساسة وأحيانا بتعلق ونوعيتها رديئة .
8) الدوكو الخاص بالسيارة خفيف جدا لو عملتوا بأظافرك حيطلع علطول والاكصدام الأمامي والخلفي بدأوا في التقشير بعد الشهر الأول!!
9) صوت المارشدير عالي جدا (أيضا فضيحة ) الفتيس بيعض في المارشدير حتى بعد ضبطه في التوكيل ( لكن حتتعود عليه)
10) عيب قوي جدا في تصميم الموتور وأنه مقلوب ستجد الهيدرز الخاصة بالشكمان والفرن تم وضعهم إلى الداخل ناحية السائق والتابلوه وليس إلى الخارج كما هو الحال في جميع السيارات الأخرى المحترمة (فهل هذا اختراع جديد ؟) مما يسبب دخول حرارة الشكمان إلى الداخل ودليل ذلك حط يدك على الكاسيت بعد السير لفترة طويلة حتلاقيه مولع وسخن جدا ، انا كنت مركب صفارة انذار في الموتور ساحت واضطررت لتغييرها من سخونة الموتور ، فحركة قلب الموتور سيئة جدا وفكرة فاشلة تضر بالسيارة على المدى البعيد.
11) سماعات الكاسيت الأمامية كانت لا تعمل وتم ضبطها في توكيل كلاريون (السيارة زيرو !!!)
12) التوكيل وما أدراك ما التوكيل المعاملة الفعلية سيئة جدا جدا جدا ، لا تنخدع بالابتسامة وحضرتك ويا افندم وتحت أمرك ... ، انا عايز واحد يشتمنى بس يصلحلي العيوب اللي رايح عشانها مش بعد ما أحجز قبلها بأسبوعين وأروح وأضيع يوم كامل وأدفع مبلغ لا بأس به أرجع البيت بنفس العيوب !!!! (ضحك على الذقون)
13) أسعار الصيانة غالية صيانة 10000كم 300 جنيه - صيانة 20000كم - 700 جنيه ولدي ايصالات دفع بذلك ،طبعا كتير جدا غير اللي كنت بأدفعه في الزيارات اللي في النص مع المعاناه مع حضرتك وتحت أمرك يا فندم والكلام الفارغ ده والنتيجة ولا حاجة.
14) سنتر الباب الخلفي يمين لا يعمل وذهبت للتوكيل 3 مرات دون جدوى السنتر مش موجود حاليا ياا فندم على مدى شهرين !!!!
15) يوجد حدفة يمين لوجود عيب في الشاسيه باعتراف التوكيل وكثير من مالكيها سواء شعروا بها أو لم يشعروا وليس لها حل .

عموما هذا ما أذكره وهذه تجربتي الشخصية لمن يريد أن يستفيد ، والحمد لله بعت العربية وخلصت منها واشتريت الآن دايو ليجانزا مو 2001 أوتوماتيك وهي الحمد لله زي الفل وربنا يبارك فيها .

وتقييم نهائي للسيارة أعطيها 60% وقد تكون جيده لمن كان لديه قبلها 128 - سيات 133 - 127- 125 أو شي من هذا القبيل مع احترامي الكامل لجميع السيارات السابقة ، وهي تصلح أكثر للسيدات وللاستخدام الخفيف غير كده للأسف مش حتنفع واللي حياخدها حيفكر يبيعها بعد أسبوع من شرائها .

اللهم قد بلغت اللهم فاشهد - نصيحة خالصة لوجه الله

أي استفسار انا جاهز 0123498224 م/ خالد جمال -
ملاحظة السيارة اتباعت بـ 60000جنيه ولو جابت أقل من كده كنت حأبيعها برضه.

[POP EL GAMED]

اشكر حضرتك جدا على النصيحه
لكن مكان موضوع حضرتك فى قسم الاسبيرانزا او الصينى العام
ارجو حد من الاداره ينقل الموضوع لمكانه الصحيح

[AbOnOrA]

م. خالد اهلا بيك فى مصر موتورز

رغم انى قريت تجربة حضرتك فى منتديات اخرى قبل كده ورغم انى معنديش العربية اصلا بس حابب انى اعلق على بعض النقط فيه

اسمحلى ابداء تقريرك من تحت مش من فوق تحديدا من

وتقييم نهائي للسيارة أعطيها 60% وقد تكون جيده لمن كان لديه قبلها 128 - سيات 133 - 127- 125 أو شي من هذا القبيل مع احترامي الكامل لجميع السيارات السابقة ، وهي تصلح أكثر للسيدات وللاستخدام الخفيف غير كده للأسف مش حتنفع واللي حياخدها حيفكر يبيعها بعد أسبوع من شرائها .

اتفق معاك تماما فى ما ذكرت العربية ممتازة لمقتنى سيارات جديد او لحد كان راكب عربية قديمة فانبهاره بالكماليات والتصميم هيفوق استيائه من قيمة الخامات وكثر عيوب التقفيل

العربية فيها نقاط قصور فعلا ممكن اختصارها فى الاتى

1- نظام تعليق غير مرن تماما (وده ينطبق على كل المكونات تقريبا حتى علبة الدركسيون الباور فيها بيطلع اصوات غريبة فى نهايتة )

اللى بيكبر المشكلة ديه ان العربية على جنوط وكاوتش 195/55R14
الفيرنا مثلا 175/70R13

خد حضرتك المقاس ده وحطة فى الفيرنا هتسمع من العفشة احلى طبل وزمامير كمان ptmnlo123per154
ليه لان المقاس ده اعرض وارفع كمان ده بالاضافة ان الاسبيرانزا اتقل وهيا فاضية من الفيرنا ب 200 كجم تقريبا يعنى كانك ماشى بالفيرنا وراكب معاك اتنين كمان


بالنسبة للاداء وضعف السحب فده راجع للمعاملات التالية

1- عرض الكاوتش
2- ابعاد (طول عرض ارتفاع) السيارة اكبر من مثيلاتها
3- المحرك تصميمة بيخلية يخرج قوتة على عدد لفات كبير (6350) الفيرنا مثلا على (4800)
4- وزن العربية اكبر من مثيلاتها كما شرحت مسبقا

وضعية الموتور والهيدرز المعكوسة كانت من اول تعليقاتنا عليها فعلا ولولا كبر حجم الحوض كانت هتبقى كارثة فعلا

مشكلة التكييف تم حلها فى الموديلات الجديدة

مشكلة التيل مازالت بغير حل نهائى على حد علمى

فانا مع حضرتك ان تقييم العربية من حيث الجوده / الاداء مابين 60 - 70 %

بس من حيث الكماليات والشكل اعتقد انها تاخد 100% لفئتها عند كتير من الناس (موضوع اذواق طبعا)

وده السبب ان ناس كتير ممكن ترضى ب 60% من الاداء فى مقابل 90% من الكماليات والشكل والسعر

وطبعا كل واحد ليه حسبتة

هقولها لحضرتك بشكل اكثر واقعية

انا وصديق ليا اشترينا عربياتنا فى يوم واحد هو جاب سبيرانزا وانا جبت البرايد علما بان امكانياتنا كانت واحدة وهو كانت اول ركوبة ليه وانا قبلها ركبت برايد برضو (هاتشباك) وقبلها دوجان

انا اخترت عربيتى وبعدت عن الاسبيرانزا علشان عارف طبيعة استخدامى وعارف اسعار قطع غيارها ففضلت ادنى مستوى من الكماليات فى مقابل اعلى مستوى من الاعتمادية والاقتصادية فى التشغيل

صديقى لانها اول ركوبة ليه ولان موظف فى مصر للطيران ويادوب احتياجتة مشوار من والى الشغل او شوية مشاوير بسيطة فى الاسبوع
فضل انة يجيب الاسبيرانزا (وهو بطيبيعتة محافظ على ممتلكاتة جدا ) او استخدامة نظيف كما يقال

هو كسب كماليات واستايل وانا كسبت شقى العربية ورخص قطع غيارها ومكوناتها

الخلاصة ان كل واحد ليه استخدام غير التانى ومتطلبات غير التانى المهم تبقى عارف عايز ايه وتختار صح

اشكرك يا باشمهندس على مشاركتنا تجربتك ويشرفنى انضمامك لاسرة مصر موتورز

[koty]

الحمد لله انك بعتها يا ريت لما تعرف أن حد عايز يشتري اسبرانزا تنصحه لأن فعلا العربية دي عيوبها ملحوظة جدا لكن الناس بتنبهر بالأوبشن والكماليات اللي جوه العربية والكارثة ان قطع غيار العربية دي رخيصة جدا بس تروح التوكيل تلاقي نفسك دافع ة جدا ....

[Nissan]

شكرا على معلوماتك و فعلا الصينى غير مقنع على الاقل بالنسبة لى