توكلنا على الله !

[Bondo2]

السلام عليكم يا شباب ،
بعد أسئلة كتييير واستخارة عدة مرات ، وكلامكم اللى بجد استفدت منه حاجات كتير جدا ، قررت انى أتوكل على الله واشترى نيو اكسنت 2010 أوتوماتيك .
أنا ناوى ان شاء الله انى ادفع كاش ، وعايز أجيب من التوكيل مباشرة ، حتى لو حاستنى شهر ولا حاجة ما فيش مشكلة .

سؤالي للأخوة الأفاضل هو :
أنا المفروض ايه الورق اللى أحصل عليه مع السيارة ؟ ، وهل فى اى حاجة المفروض أخلى بالى منها سواء وانا بادفع الحجز أو وانا باستلم العربية ؟ سواء فى الورق أو العربية نفسها ؟

[ash257]

بالنسبة للحجز:
هاتروح اي فرع غبور قريب ليك وتحجز الفئة واللون اللي انت عاوزهم يعني مانيوال أو أوتوماتيك واللون اللي يناسبك وتدفع 1000 جنية حجز وهاتاخد وصل كتابي من المندوب وتروح تاني يوم تاخد الوصل الإلكتروني ومكتوب فيه ميعاد الأستلام وقبل ميعاد الاستلام بعشر أيام بتروح تدفع باقي المبلغ كله وإن شاء الله تستلم على خير انت وانا
بالنسبة للأستلام:
يا ريت حد يفيدنا في الموضوع ده لأني ماعرفش عنه حاجة

الف مبروك مقدما وربنا يديك خيرها ويكفيك شرها ولو مش عايز تستني كتير ممكن تروح ابو غالي اللي في الميرغني وكيل هيوانداي انا جيبت الفيرنا بتاعتي من عندهم افضل من انك تستني بالشهور علي ما تستلم عربتيك وهيه هيه لعلمك وكل حاجه هتمشي عادي جدا هتدفع 1000 جنيه حجز للعربية وهتاخد بيهم وصل علشان هيتخصم من باقي مبلغ العربية وبعدين قبل الاستلام بكام يوم هتلاقيهم بيتصلو بيك علشان تروح تدفع بيقية المبلغ وهتستلم طبعا ورق مخالصة العربية وتروح تسجلها باسمك بالورق ده في الشهر العقاري والف مبروك عليك العربية


بالنسبة للعربية نفسها هتستلم معاها الضمان بتاعها وضمان الكاسيت والبطارية والكتالوج بتاع العربية واتنين مفتاح وكوريك واستبن وعدة مكونة من مفتاح عاده وصليبة ومفتاح للعجل وتتاكد قبل ما تتحرك بالعربية من ان كل حاجه فيها شغاله زي الانور والكاسيت والولاعه وتفلي العربية اكنك هتشتريها مستعملة من تحت العربية ومن كل حته فيها لتكون واخده خبطة مش باينة ولا تكون واخده مطب من تحت يكون جرح العربية من تحت واهم حاجه عداد الكيلوات ميكونش معدي ال 50 كيلو وتقبل تحياتي والف مبروك وربنا يديك خيرها ويكفيك شرها وانتا ناوي ان شاء الله تجيب الاكسينت العادية ولا الاسبور

[sabry9]

ربنا يكرمك العربية حلوه وجميله ورغم شكلها الي يوحي انها ضغيره لكن لما تخش جواه وتشوف شنطتها حتلائي حاجه تنيا خالص

[Bondo2]

شكرا لكل الشباب اللى تفاعلوا مع موضوعى ، جزاكم الله خيرا

بالنسبة للأخ أحمد ممدوح : أنا ناوى ان شاء الله أجيبها الشكل العادى القديم ، بصراحة مش شايف ان الاسبور فيها مزايا تستاهل ، حتى منظرها ما عجبنيش صراحة !

معليش حاكون سخيف واستفسر منكم أكتر : هوا المخالصة دى الحاجة الوحيدة اللى باكون محتاجها علشان أرخص العربية ؟ وهو أنا لازم الأول أسجلها فى الشهر العقارى قبل الترخيص ؟