تقرير عن بيجو 3008 حسب طلب اسلام باشا Semsem999999

[horas3000]

السلام عليكم جميعا
زي ما وعدنا و بناء علي طلب اسلام باشا
ده تقرير مفصل عن البيجو 3008

اولا العربية تندرج تحت تصنيف الكروس اوفر و الاتي بعض من مواصفتها حسب الموديل المعروض في التوكيل

المحرك: 1600 سي سي تيربو 156 حصان
الجير: 6 سرعات تريب ترونيك

الكماليات:
-سقف بانوراما
- Head up display
-حساسات امامية و خلفية
-جنوط 17 انش
-فرامل يد الكترونية
-7 فتحات تكيف
-فرش مخمل اسود

ده اللي فاكره و الباقي ياتي تباعا لو افتكرت حاجة تانية

الانطباع:
شخصيا انا شايف العربية شيك جدا و التصميم بتاعها من اروع التصاميم الفرنسية
الخامات المستخدمة و جودة التقفيل لا يعلي عليها كما عودتنا بيجو و الطبلون المقتبس من اودي هايل بصراحة
المساحات الداخلية ر باس بيها و تلبي احتياجات معظم الناس
المساحات التخزينية داخل العربية كتير جدا و متنوعة بذكاء
المحرك واضح انه قوي و شايف اكتر من كافي للعربية

ده كده انطباعي باختصار و هسيب المكرفون لمحمد باشا كمال لانه عمل تست دريف لل 308 الفل و هو اقدر للحكم علي اداء العربية اللي حسب رجل المبيعات ال308 متقاربة من ال 3008 في المستوي

اتركم مع الصور

و ده فيديو عن العربية

http://www.youtube.com/watch#!v=2zUrYqTeI3U

[dego_story]

لاء بجد رووووووووووووووووووعة ..

[bmkbmk]

صباح الفل عليكم يا شباب مصر موتورز
و تحية خاصة لإسلام باشا

و شكرا طبعا للكينج شريف منسى على الصور و المواصفات و الانطباعات

أما عن رايي فى العربية فلا يختلف عن رأى شريف باشا طبعا ...

أول حاجة شدتنى للعربية انها 1600 سى سى .. و بذلك دخلت دائرة الضوء مع العربيات اللى ممكن تتجاب و ننزلها مصر فى الاخر كمغتربين عايشين برة مصر و طبعا زى ما قال شريف باشا و اسلام باشا ... ان اول حاجة تيجى فى بالك كمقارنة مع العربية دى هى الاوكتافيا ... و بغض النظر عن اختلاف الفئات التى تنتنمى اليها كل سيارة ... الا انها تمثل خيارات متنافسة من حيث السعر و الكماليات و طبعا انها ممكن تنزل مصر و تتجمرك تحت اقل شريحة

و على فكرة سعر الفل اوبشن 8000 دينار كويتى ما يوازى 160 الف مصرى
و فيه سيارات اقل فى الاوبشنز هتوصل قريبا ان شاء الله .... و سيتراوح سعرها بين 7000 و 7500 دينار كويتى

العربية من جوة ما شاء الله شيك جدا و فيها اوبشنز كويسة جدا و وسعها معقول جدا بالنسبة لحجمها يعنى انا و شريف باشا كنا قاعدين ورا بعض و مرتاحين .. و مش متضايقين يعنى .. بس هى طبعا أضيق من SW و احنا الاتنين طولنا قريب من بعض حوالين 180 سم

و المدهش بقى فعلا مساحات التخزين فى الشنطة الخلفية و تحت أرجل الركاب فى الخلف و بين السائق و الراكب الامامى و ايضا حول أرجل الراكب الامامى ......

و طبعا الكماليات قال عليها شريف باشا فى اول الموضوع ....

طيب لحد كدة كويس ... ايه بقى اخبار الاداء و الثبات ؟؟؟ اقترح عليا رجل المبيعات ان انا اعمل تست درايف للبيجو 308 اللى هى 1600 مع تيربو بقدرة 140 حصان .. علشان يقنعنى بأداء و ثبات البيجو .. فوافقت فورا طبعا

و لحسن الحظ كانت عربية التست درايف هى الفل اوبشن .... بسقف بانوراما وكراسى رياضية و سنسور و جنوط 16 انش ... و نظام ملاحة (مش حلو قوى) و خدناها و توكلنا على الله ......

أول ما تركب العربية تحس طبعا بالشياكة العظيمة و جودة التقفيل و الخامات و طبعا شاشة الملاحة التى تفتح اوتوماتيكيا من التابلوة مع تشغيل السيارة ......

و العربية تحس انك قاعد مرتاح قدام مع ان الكراسى ناشفة شوية ... أما فى الخلف طبعا فكما اسلفنا ان الكراسى مش مريحة خالص و خصوصا ان مسند الراس بيبقى فى نص ظهرك تقريبا .. مش عارف ازاى.. و من الاخر رجل المبيعات هو اللى قعد ورا ....

زوايا المرايات كويسة جدا و المرايات كبيرة و كاشفة ما حول العربية بالكامل .. الدركسيون مريح و ان كانت اصابع يدى بما انها متغذية شوية خبطت مرتين فى الكوفر البارز اللى فوق عدادات السرعة و طبعا لأن الدركسيون كان مرفوع على الاخر.....

طلعنا بالسيارة و كانت الانطلاقة جيدة جدا التيربو اشتغل بقى و ال 140 حصان صحيوا من النوم ....

لحد سرعة 70 أو 80 كان التسارع جيد جدا و لكنه قل بعد ذلك بصورة ملحوظة مع ان الدواسة كانت على الارض.. و رجع لى احساس العربيات ال 1600 بعد ما كنت نسيته من زمان ... انك تجيب البنزين على الأرض و تسيب العربية تجمع مع نفسها ... بس هى طبعا احسن من الاوكتافيا بكتيير جدا فى التجميع

نظام التعليق حيرنى بصراحة مع انه قاسى شوية فى الملفات و المشى عموما بس تقريبا معاه ماتحسش بالمطبات ولا الحفر الجامدة .. و محدش يسالنى ازاى و بالنسبة للثبات بصراحة انا ماكنتش فاكرها كدة .. ما شاء الله العربية ثابتة جدا جدا و فى الملفات ممتازة و بيساعدها على كدة حجمها الملموم و انها طبعا هاتش باك .. مع العلم ان اقصى سرعة جبناها كانت 140 ....

بس و رحنا بقى لطريق العودة الخالى من السيارات و قفلت التكيف و شغلت السبورت ... و استعديت للانطلاقة الصاروخية .. و كانت خيبة الامل بإن شد العربية قل جدا عن المود العادى فا برر رجل المبيعات ذلك بأن السبورت مود بيحرق لأخر النقلة و طبعا شريف باشا اشار للنقطة دى برده و انا كمان عارف طبعا النقطة دى .. بس اللى انا فاهمه انهم عاملين السبورت مود ده علشان لما احب اجرى و احرق و اجمع سرعة ,,, برده مافهمتهاش النقطة دى

و جينا بقى لتجربة الفرامل .....

و نبهت الشباب و دوست فرامل .... و بعدين شديت تانى جامد و دوست فرامل جامد .... و الفرامل بصراحة لا تعليق عليها .. أداءها فى منتهى الجودة و الروعة و تحافظ على ثبات السيارة بصورة جيدة جدا مع قصر المسافة التى تحتاجها السيارة للتوقف تماما...

بس و بعدين اتجهنا فى طريق الرجوع للوكالة مع تعمد اكل بعض المطبات و الحفر للتأكد من نظام التعليق و تاكد نفس الشعور الموصوف مسبقا ... و لكن هناك نقطة ايضا تعيب السيارة و هى العزل الصوتى .. و اللى بصراحة ماعجبنيش ولا عجب شريف باشا ... و مش عارف هل التيربو مساعد فى الحكاية دى علشان معلى صوت الموتور شوية ولا ايه ...

بس يا شباب ... عموما لو 3008 أداءا قريب من أداء 308 تبقى سيارة جيدة جدا عموما و تبقى مناسبة خصوصا لمصر و حفرها و مطابتها و شوارعها الجميلة ...

[Semsem999999]

مشكووووووووووووووووووووور ين جدااااااااااااااااااااااا اااااااااااااا

أنا هموووووووت على ال 3008 اللي سألت التوكيل عنها وقالي معرفش عنها حاجة ؟؟؟؟؟؟؟؟؟؟؟؟

بس كان نفسي في شوية صور للصالون

وبعدين 8000 دينار كويتي يعني كام ريال قطري ؟؟؟

وإيه رأيكم هيا ولا الأوكتافيا ؟؟؟؟

[Semsem999999]

معلش نسيت سؤال : المفروض إن العربية ديه فيها شاشة زي ال 308 وكمان فيها شاشة تانية شفافة للمعلومات أثناء القيادة أمام السائق دول موجودين ولا لأ ؟؟؟