هام لكل مالكي إكسبلوجن II

[TELEBK]

السلام عليكم ورحمة الله وبركاته
أمتلك سيارة إكسبلوجن II منذ تسعة أشهر ، وقد قابلتني عدة مشاكل فيها وهي بالمناسبة ليست بالجوهرية وممكن تظهر في أي عربية تانية ، يعني مش في الأساسيات ، ولكنها مشاكل في زرار بيعلق وكنت بروح التوكيل وبيصلحوه ، ولو مش موجود زي وحده زراير التكييف همه بيقولولي إنها في السكة وجاية إن شاء الله ، ولكن فيه موضوع أنا إتعرضت ليه وده كان تعليق كتير من حضراتكم وكتير من العملاء إللي بقابلهم في توكيل المسلمي ، وهوه موضوع العضة في الفتيس لمه باجي أغير وبالمناسبة الحمد لله حليته .
وده كان تاعبيني وكل ماأقولهم في التوكيل يقولوا ليه عادي هيه حتروح بعد الألف كيلو , ورحت ليهم بعد الألف قالوا ليه بعد الخمسة ، وبعدين بعد العشرة ، لحد ماعملت بيها 10.000 كم ومفيش فايدة برضة ، سألت الميكانيكي بتاعي قالي غير زيت الفتيس ، وبالفعل غيرته بزيت موبيل 80/90 وبالفعل نعم الفتيس شوية لكن برضة العضة فضلت فيه عند الغيار الأول وفي المرشدير لدرجة إني كنت بحس إن الفتيس حيتكسر مني من كتر الزق في عصاية الفتيس ، لحد ماعملت معاهم مشكلة في التوكيل وصوتي علي والحقيقة همه ناس محترمين إستحملوني - وده طبعا لإني علي حق - وجربها ميكانيكي عندهم وعلي فكرة الميكانيكية عندهم شطار ، وديه كانت أول مرة يقعد في العربية ميكانيكي ويركز في العيب ده ، وطلع العيب من مجموعة الدبرياج ، وغيرت إسطوانة وديسك وبلية ، وكانوا عايزين يدفعوني حقهم لكن أنا قلت ليهم إن ده عيب صناعة ودفعوني المصنعية بس ، وبالفعل والله العظيم الفتيس نعم وبقه حته ملبن تحت إيدي ، وبقي سحب العربية أحسن من الأول .
فأي حد من مالكيها تواجهة نفس المشكلة يغير زيت الفتيس الأول ويتوكل علي الله ، وإن شاء الله حتكون كويسة معاه .
بالمناسبة : التوكيل حالياً بقي أحسن من الأول بعد مامسكة واحد تاني كان لواء في الجيش فاهم هوه بيتعامل مع مين وإزاي يحل المشاكل إللي بتواجه العملاء .
وبالتوفيق
د / خالد

[بدر بسيونى]

شكرا لنصيحتك وربنا يجازيك خير وبالتوفيق ومستنين رايك فى العربية والتوكيل بصورة مفصلة شكرا ليك

[abdullah_yousof]

هل كانت مشكله عند حضرتك فقط ولا منتشره عند الجميع؟ يعني ظاهره؟

[TELEBK]

المشاركة الأصلية كتبت بواسطة abdullah_yousof هل كانت مشكله عند حضرتك فقط ولا منتشره عند الجميع؟ يعني ظاهره؟

الحقيقة هيه ماوصلتش لحد الظاهرة بس هيه ظهرت عند أكتر من واحد قابلتهم في التوكيل ، وكانوا مش واخدين بالهم منها ، وقريت عنها في بعض المواقع إن البعض لقاها في عربيته ، أنا بأتكلم عن الناس إللي أنا قابلتهم وشفتهم بنفسي ، بس الحقيقة فيه عربيات تانية إكسبلوجن 2 مافيهاش المشكلة ديه ، وبرضة أحب أقول إن فيه ناس مش دقيقة الملاحظة لعربياتها المهم أهيه عربية وسايقينها ومش بياخدوا بالهم من أي صوت بيظهر فيها وممكن يمشوا بالعربي وفيها مشكلات كتيره ومايخدوش بالهم ، فعموما أنا نقلت إللي حصل معايا وحبيت أبينه لحضراتكم علشان لوحد واجه المشكلة ديه في عربيته الأكسبلوجن خاصة أو أي عربية تانية عامة يعرف إيه إللي ممكن يعمله .
مع خالص شكري
د / خالدptmnlo123per154

[zoomaa&mizaa]

شكرا دكتور خالد والدى معاة العربية دية وهى موديل 2009 وأنا عارف المشكلة دية وبالفعل هو دة رد التوكيل على المشكلة بس انا ناوى فى صيانة ال5000 أطالب بتغير الفتيس كامل وعلى فكرة المشكلة دية منتشرة فى الاكسبلوجن كلها بس هى عربية كويسة وشكرا