خطوات نقل ملكية سيارة مستعملة

[محمد السيد فهيم]

السلام عليكم دي نصايح كده لاي حد اشترى عربية مستعملة و بينقل ملكية علشان تنجز في الوقت و متقعدش تسال انا كنت بنقل رخصتي من مرور شبرا (مرور المالك القديم ) الي مرور فيصل علشان انا من سكان الهرم طيب ايه الليلة بقى ؟ اول حاجة انت بتاخد عربيتك و تروح المرور بتاعك و بتجيب الملف في الغالب هتلاقي ناس بتبيعه برة ممكن تشتري الحاجة من جوه المرور بس انا جبته من الناس اللي برة و خلاص علشان الحق طابور الفحص و بتعمل تأمين اجباري بعد كده بتاخد دور بعربيتك في طابور الفحص وبتخش تفحص بياخدوا بصمة الموتور و الشاسيه (بصمة يعني رقم الموتور و الشاسيه) المهم بتركن عربيتك في اي مكان و ترجع تاني لمكان الفحص الظابط بيختم ليك على الورقة اللي فيها البصمة ولازم يكون معاك عقد البيع المسجل علشان الظابط بيشوفه و بعدين بتروح للمهندسين اللي هناك بيفضل يكتب و يختم في الورقة دي و بيقارن الارقام اللي في البصمة بالرخصةو بيكتب في ضهرها للمرور بتاع المالك القديم و بيكتب في ورقة اسمها ورقة البيئة اللي هي فحص العادم و كده المهم يا ريس بعد كل ده بتروح تشتري المثلث و الطفاية و شنطة الاسعاف لو معاك طفاية قديمة في العربية بتجيبها بيكشف عليها لو سارية و سليمة خلاص مبتشتريش لو لا بتشتري و بيختموا ورق صغير بتاع الطفاية والمثلث و الشنطة و بعدين بترجع في عسكري كان بيتاكد انك اشتريت الحاجات دي وورقهم اتختم بياخد الورقة اللي عليها رقم الشاسيه و الموتور و بيدخلها للظابط تاني بيختمها ختم نسر تاخد انت الورق ده كله و تطلع على المرور القديم (مش لازم يبقى معاك العربية ) بتروح لمهندسين الفحص توريهم الورقة اللي فيها البصمة و برضه شوية كلام كده يتكتب على ما اتذكر يعني و بعديها يقول ليك روح الارشيف هات ورقة فحص قديمة من ملف العربية علشان نقارن البصمة بتقف في طابورك الحلو كده ولما يجي دورك على الشباك تروح تقول ليه عايز ورقة فحص قديمة من ملف العربية دي و تديه الرخصة او رقمها في ورقة فبيجيب الملف و يديك الورقة بتاعت الفحص القديمة و بياخد بطاقتك علشان لازم ترجع الورقة دي تاني . تاخد الورقة دي و تروح على المهندس توريه ليها بيتاكد من البصمة الجديدة اللي معاك انها مطابقة للبصمة القديمة اللي انت جبتها من الملف و يكتب و يختم و بعدين تروح الارشيف ترجع الورقة دي و تاخد بطاقتك بعدها و تروح للظابط اللي هناك يختمها ليك تروح بقى تشوف المخالفات اللي عليك و بتدفعها لو في و بتجيب شهادة مخالفات و دي سارية لمدة 15 يوم من تاريخ اصدارها يعني بيبقى قدامك 15 يوم علشان تكمل الورق بتاعك (لازم لما تشتري العربية من حد تخلي صاحبها يجيب ليك شهادة مخالفات انه دفع المخالفات اللي عليه متجيش انت تروح تنقل ملكية تلاقي نفسك لبست في مبلغ و قدره ) ترجع بقى يا باشا بكل الورق ده للمرور بتاعك تاني و ترجع لمكان الفحص المهندس بيكمل الورقة بتاعت البصمة دي و بعدين ترجع للظابط يختمها ليك تروح بقى تقف في طابور ترخيص ملاكي و بتقدم الورق ده كله في الشباك الموظف بيقدر ليك الضريبة و تروح تدفعها( و تجيب امر تسليم و استعجال هما 4 ورقات كده و ممكن تجيبهم قبل ما تقف على شباك الترخيص و قبل تقدير الضريبة) المهم بتاخد وصل الدفع و تصور الرخصة باعت العربية و بطاقتك و تشتري شنطة كده قماش بيتكتب عليها اسمك تحط فيها ورقك كله و تقف على الشباك تاني اللي قدر ليك الضريبة الموظف بياخد الورق اللي هو محتاجه في الملف و يحطهم في الشنطة القماش دي و بيديك الورق اللي مش عايزه و يدخل بيناتك على الكمبيوتر و يقول ليك استنى تسمع اسمك انت بقى تاخد امر التسليم و الاستعجال بعد ما الوظف يكتب فيهم بياناتك و بيانات العربية و بيرجع ليك منهم 2 بس و بيحط 2 في الملف و تروح تختمهم من الظابط (خلي بالك الختم يكون على الورقتين) وتروح تصور بطاقتك و رخصة العربية و تجيب لوحات العربية القديمة و تستنى تسمع اسمك اول ما تسمع اسمك بتروح شباك استلام الرخص و تستلم رخصة العربية الجديدة باسمك تروح تصورها و بعدين تروح مخزن اللوحات و تسلم الموظف صورة بطاقتك و صورة الرخصة القديمة و صورة الرخصة الجديدة اللي باسمك و امر التسليم و الاستعجال المختومين من الظابط و اللوحات القديمة و بتستلم اللوحات الجديدة زي المكتوبة في الرخصة الجديدة و بكده يبقى الف مبروك خلصت .
هتلاحظ الرخصة الجديدة مكتوبة فيها تاريخ من قدام مكتوب فيه نهاية التصريح و في الضهر نهاية الضريبة المهم سألت على التاريخ بتاع نهاية التصريح اتقال ليا انه ده تاريخ بروح فيه المرور تاني علشان اشوف ملف العربية و صل من المرور القديم للمرور الجديد ولا لا ولو وصل بتاخد تاريخ نهاية الضريبة كله ولو لا معرفش ايه اللي هيحصل
*شوية حاجات كده خلي بالك منهم :
1- حاول دايما تروح بدري اووووووووي علشان تنجز و تخلص بسرعة قبل الزحمة و خصوصا في طابور الفحص و طابور الترخيص .
2- خلي معاك دايما صور من كل حاجة بطاقتك و الرخصة القديمة علشان هيتطلب كتير زي ما انت شايف فمش كله شوية تخرج من الطابور و ترجع.
3- مش هيخسر لو معاك صورة عقد البيع احتياطي حتى ليك انت .
4- نفسي اقول حاجة في حوار فك اللوحات القديمة دي لو حاسس انك هتخلص في يوم الترخيص ده فك الارقام و خليها معاك علشان بس مش بعد ما تخلص و تروح تفكها يكون اسمك اتنادى عليه علشان تستلم الرخصة بس في الغالب مش هيحصل يعني لان الاسماء بتتاخر شوية .
5- الكلام اللي فوق ده كله في حالة ان رخصة العربية القديمة لسه سارية انما لو مش سارية تقريبا في حاجة بتستخرج اسمها شهادة بيانات .
دول كده تقريبا معظم الحاجات على ما اتذكر و ربنا معاكم جميعا.

[nktis]

جزاك الله خيرااااا علي مجهودك و نقلك للتجربه بالتفصيل .