تليين شاريد 3 سلندر بعد شمبر+واستفسارات جانبية

[Kemo Kono]

صباح الفل
كل سنة و انتو طيبين و بعودة الايام
هحاول ارتب الكلام ..
آسف جدا للاطالة .. بس بالراحة كدا كله هيبقا تمام :D
جبت شاريد 90 هاتش باك 1000 سى سى .. 3 سلندر
العربية طبقا لكلام صاحبها القديم .. جاب مكنة استيراد ..
مقالش اى معلومات تانية .. (بادوات تغذية او بدون .. ستاندر ولا لا )
العربية كهربتها ملخبطة .. و بتنتش لما تبطلها ومش بتبطل على طول .. (كهربا زيادة)
دخنة شوية مش فاكر لونها بس غالبا سودا .. او عفرة كدا مش سواد يعنى .. الشكمان من جوا مهبب .. و فيه زيت .. و العلبة كانت مكبوسة زيت
غيّرت العلبتين ..
و الشكمان رجع يتوسخ ..
عملت سرفيس طبعا فلاتر و زيوت وابلتين و كوندنسر .. و الكهربا مش راضية تظبط .. العربية عايزة شمبر لاحكام الضغط ..
العربية بتتهز بغباء .. بتترجرج .. و عشان تظبط المفروض تعلّيها شوية
ولو علّيتها .. بتتأخر اكتر فـ التبطيل .. و بتفضل تنتش مدة اطول بعد ما تبطلها !!
حليت المكنة من قبل العيد .. و من يومين العربية خلصت
المكنة طلعت 040 .. يعنى البلوك مخروط ..
و رقم الموتور طلع على وش السلندر .. مش على البلوك !
يعنى جايز الاخ غير وش سلندر بس ! .. انما البلوك مش هعرف احدد تاريخ وجوده ..
عملت شمبر .. و دلايل .. و جوانات كاملة .. و صبابات
و تم قشط وش السلندر ( نضافة .. على حسب كلام الميكانيكى )
و الخلوص بين البساتم و الشمايز ممتاز و المكنة محكمة جدا .. و بدون اى خرط جديد المرة دى .. هى على وضعها .. مجرد حكمتها فـ بعضها بس ..
و جوان وش سلندر حطينا جوان دبل
مغيرتش ولا ديسك ولا اسطوانة .. بس السحب كويس من الاول .. و لحد دلوقتى ..
المكنة بتدور مرتاحة من الاول والتاكيهات مفتوحة دلوقتى و عاملة صوت عالى نوعا ما ..عشان الحر .. و لسه بتليّن ( لسه هرجع له بعد التليين يراجع الكهربا بقا )
اظن انا كدا قولت كل وضع الموتور ..
الميكانيكى احترم المكنة جدا و مقالش انها تعبانة .. قال فوق 80%
و العربية دلوقتى دارت حوالى 6 ساعات او اكتر شوية .. و مشيت 44 كيلو .. و العربية بتسحب جدا و سالكة بغباء ..
==================
استفسارات :
1 : التليين ازاى .. و لمدة اد ايه ..
2 : عندى بكرة مشوار ع الدولى الساحلى .. لحد رشيد .. اطلعه ولا بلاش ؟!
( انا لوحدى .. او معايا فرد تانى بالكتير )
==================
توضيحات :
الـ 44 كيلو دول انا مشيتهم من شوية .. خدتها فـ الروقان كدا ..ع البحر مـ المعمورة للقلعة ..
نقلت الغيار الاول على 20 25 .. التانى على 30 قبل 40 ..
و التالت فضلت ثابت عليه 40 .. و 45 شوية ..
و الرابع 45 .. موصلتش 50 ..
((المهم ان الارقام دى .. سرعات كم / ساعة ))
====================
استفسارات :
3 : انا معنديش RPM فـ العربية .. و انا عايز اركبه
( ياريت افادة بخصوص تركيب RPM خارجى .. او ممكن اغير العدادات بعداد شاريد بس من اللى لها RPM جنب الكيلومتر .. و معرفش دا بتاع الـ 1000 سى سى ولا بتاع الـ 1300 ..
العربية 3 سلندر و اظن بيبقالها عدادات مخصوصة )
4 : فيه صوت ونّة كدا فـ السرعة فوق 60 .. واضحة اكتر فوق 80 .. الفتيس كويس بس الغيارات بتعمل صوت تحكيم التروس .. بتحس الحركة فيه يعنى .. والسحب كويس
5 : ساعات بحس تكّة كدا فـ الطلعة لما بفصل دبرياج .. كأن الكوبلن محلول او بيتك ..
.. هى مش تكة اوى .. بس تحس بانتقال الحركة .. بحس بتكة كدا بسيطة خالص و مكتومة .. بس مفيش عربية بتعملها اظن ..
يعنى العربية مش بتتحرك بالتدريج .. لا .. تسمع التك .. و بعدها العربية تتحرك بالتدريج بس بسرعة نوعا ما
..
اعرف منين انه بلى العجل ؟!
اعرف منين انه كوبلن ؟!
اعرف منين ان الفتيس وحش ؟!
اعرف منين انه عيب جوا دايرة الدبرياج ؟!
( السحب حلو .. الغيارات برضه كويسة .. محكمة جدا .. بس انا مش عارف احكم عليها عشان انا لو قارنتها بالعربية اللى فاتت نوبيرا 2008 عاملة 30 ألف كيلو .. هبقا ظالم و مفترى :D .. يمكن صوت فـ آلات الجر .. او حاجة فـ بلى العجل .. لان الصوت مستمر مع سرعة العربية .. مش مع دوس البنزين .. ولا مع تعشيق غيار .. )
..
6 : عايز فلتر سبور .. مقاسه و نوعه و تمنه .. و ياريت مكان اجيبه منه ( اسكندرية )
..
7 : هتفرق لو جبت للعربية طقم سلوك و بوجيهات " سبور " ..
..
8 : حد بتاع قطع غيار استيراد .. عشان عايز كنصولة فيبر بين الكرسيين بتنزل فـ السيدان بنفس المقاسات ..
..
اكيد فيه استفسارات اكتر .. بس دول كدا من الاهم وانت نازل
و كنت عايز اجيب ميرايتين اكبر من اللى فيها .. المراية عندى زى بتاعت اللادا .. او الماروتى ..
مع ان بينزل عربيات منها مرايات كهربا .. او مرايات عادة .. بس بتكون الضهر ثابت و كف الازاز المراية بيتحرك .. ودا طبعا مريح جدا .. ع الاقل لما تتخبط المراية هفتحها الاقى المراية مظبوطة .. انما اللى عندى دى شلل .. و صغيرة جدا جدا ..
لو مرايات كهربا .. هتأثر ع الضفيرة ولا عادى تستحمل ؟!
و اعمل ايه عشان اركبها منغير تأثير سلبى ع الصفيرة ؟!
( ضفيرة العربية عندى فى حالة ممتازة .. و فيها زينون و انوار و اشارات و مساحات .. كله شغال بكفاءة وقوة مناسبة جداااا )
انا رغاى اوى :D
بجد بحاول احطكوا جوا كابينة القيادة .. يارب يكون فيه حد وصل للسطر الاخير و فهم اسلوبى و الفكرة ..
مستنى ردودكو ..

[Kemo Kono]

يامسهل الحال ..
تقريبا كدا هليين قبل ما حد ما يكون رد !
للرفع +1

[zing0]

يا باشا معلش الناس لسه بتعيد (رغم إن العيد تقريباً كده بيقولوا خلص)
المهم:
التليين لازم يأخد راحته و متستعجلش عليه
يعنى المفروض تخلص صفيحه بنزين (20 لتر) دايرة و هيا واقفه مكانها, و صفيحه تانيه ماشى بيها متزودش عن الـ 50 كم/س و عالرابع زى مبتقول, بحيث مينفعش تقرص عالغيارات دلوقتى خالص
المكنه المفروض أن بيحصل جواها إحتكاك شديد و ده بيخلى حرارتها زياده, و الجو أصلاً مش مستحمل, تابع الحرارة على طول, لو زادت , بطل المكنه شويه.
فيى ناس كانت بتجيب خرطوم مياه و تحطه فى الريداتير يبرد على طول طول ما المكنه دايرة.


أى أصوات ون و رعشه و برجله و الكلام ده أنساه دلوقتى. المهم تليين براحتك و بلاش مشوار الدولى ده
العربيه لما بتليين كويس بتقعد معاك فترة أكتر متحتاجش حاجه و المكنه بتبقى مستريحه و الأجزاء الداخليه طبعت براحتها.

باقى طلباتك محتاجه سوق قطع غيار سيارات محترم زى التوفيقيه فى القاهرة
معرفش أسكندريه فيها أيه؟

جاوبتك على قدر معرفتى
و ننتظر رد أساتذتنا

[Kemo Kono]

المشاركة الأصلية كتبت بواسطة zing0 يا باشا معلش الناس لسه بتعيد (رغم إن العيد تقريباً كده بيقولوا خلص) المهم: التليين لازم يأخد راحته و متستعجلش عليه يعنى المفروض تخلص صفيحه بنزين (20 لتر) دايرة و هيا واقفه مكانها, و صفيحه تانيه ماشى بيها متزودش عن الـ 50 كم/س و عالرابع زى مبتقول, بحيث مينفعش تقرص عالغيارات دلوقتى خالص المكنه المفروض أن بيحصل جواها إحتكاك شديد و ده بيخلى حرارتها زياده, و الجو أصلاً مش مستحمل, تابع الحرارة على طول, لو زادت , بطل المكنه شويه. فيى ناس كانت بتجيب خرطوم مياه و تحطه فى الريداتير يبرد على طول طول ما المكنه دايرة. أى أصوات ون و رعشه و برجله و الكلام ده أنساه دلوقتى. المهم تليين براحتك و بلاش مشوار الدولى ده العربيه لما بتليين كويس بتقعد معاك فترة أكتر متحتاجش حاجه و المكنه بتبقى مستريحه و الأجزاء الداخليه طبعت براحتها. باقى طلباتك محتاجه سوق قطع غيار سيارات محترم زى التوفيقيه فى القاهرة معرفش أسكندريه فيها أيه؟ جاوبتك على قدر معرفتى و ننتظر رد أساتذتنا

تسلم ياباشا بجد ع الرد ..
يامسهل نسمع رأيى ناس تانى
بس ردك وافى .. ألف شكر
انا لحد دلوقتى مقرصتش خالص .. الحق يتقال يمكن مشيت للحظات 60 70.. ع الرابع برضه .. منغير قرص ومنغير اى رعونة فـ الشد ..
ربنا يسترها و تعدى على خير