نويت انزل اشتري فيرنا 2013 تنصحوا بأيه وهل هي 1500 ولا 1600؟

[the necromancer]

السلام عليكم

بعد صراع طويل جدا مع عربيتي ال 127 لحد ما خلاص جبت اخري زحلقتها ونزلت اجرب حظي مع سوق المستعمل واجيب حاجه انضف شويه بقالي 3 شهور بلف حوالين نفسي شوفت جميع انواع العربيات واغلبه زي الزفت هتصرف عليه ضعف تمنه والنضيف شويه صاحبه بيتأمر وبيبع بالغالي كأن مفيش اخوه
فأستقريت اخيرا والحمدلله اني اجيب فيرنا زيرو كامله منوال واريح دماغي وابقى في السليم

فاياريت لو فيه حاجه معينه تحبوا تنصحوني بيها او اخلي بالي منها وانا بشتري يبقى كتر خيركم
وايه موضوع السي سي ده 1500 غير 1600 ولا الاتنين حاجه وحدة وبتتكتب كده ولا ايه وانهو الافضل وهل فيه اختلاف في السعر؟

وياريت لو حد يعرف اشتري منين في اسكندرية ويبقى اسعاره حلوه ويخلص الموضوع بسرعه ميلطعنيش
صحيح هو فيه مدة انتظار معينه ولا بستلم العربيه على طول ؟ وايه نظام الاجراءات

معليش اخوكم غشيم ولسه اول مره اشتري واتعامل مع عربيات نضيفه بالنسبه للكاررو اللي كانت معايا :D
متشكر واسف على الاطاله

[crime]

كده كده خلاص مبقاش فيه منها ١٥٠٠ سيسي اخرها كان موديل ٢٠٠٧التقفيل الكوري
انما من ٢٠٠٨ لحد ٢٠١٣
١٦٠٠ سيسي
تقبل تحياتي

[سيمون شحاتة]

الى انا فاهمه ان الفيرنا دى 1600 تقفيل مصرى بتاعة غبور و انه خلاص انتاجها حيتوقف يعنى اخرها 2012 و ابتدا ينزل بدالها الجيلى الأيمجراند.

[the necromancer]

المشاركة الأصلية كتبت بواسطة crime كده كده خلاص مبقاش فيه منها ١٥٠٠ سيسي اخرها كان موديل ٢٠٠٧التقفيل الكوري انما من ٢٠٠٨ لحد ٢٠١٣ ١٦٠٠ سيسي تقبل تحياتي

شكرا لأهتمامك

المشاركة الأصلية كتبت بواسطة سيمون شحاتة الى انا فاهمه ان الفيرنا دى 1600 تقفيل مصرى بتاعة غبور و انه خلاص انتاجها حيتوقف يعنى اخرها 2012 و ابتدا ينزل بدالها الجيلى الأيمجراند.

احيييييه :D لأ ازعل اوي لو كده بس انا شايفها على النت فيه 2013 منها عادي

طيب وعموما ياجماعه ينفع امشي بيها بنزين 80 ولا فيها مشكله؟؟

[myson medo]

انا رأيى سيبك من الفرنا وخليك فى اللوجان مانيوال او اوتوماتيك اللى يعجبك
بس انت الكسبان
وموفق ان شاء الله