عيوب لادا 2107 ادخل فوراً

[aslann]

عايز أعرف عيب في اللادا 2107 هل بتسخن وما هي حل مشكلة التسخين أن عندي واحد قريبي بيركب مروحة كابريس 8 ريشة ....أفيدوني

[hack_storm]

المشاركة الأصلية كتبت بواسطة ahmed1981 اللادا عفشتها الأمامية على بيض بيملص وعلبة الدركسيون بنظام الدودة وبالتالي لو البيضة ملصت يبقى عليه العوض والدركسيون بعد فترة قصيرة بيبقى فيه بوش واضح

كلامك مظبوط فعلا ياباشمهندس أحمد ودي فعلا نقطة مهمة نسيت اني أوضحها
وهي ان اللي معاه لادا المفروض لما يغير البيض الامامي يركب الطقم كله بيت تحتاني لأن الجوز التحتاني بيستحمل أكتر بكتيروأساسا اي واحد بتاع عفشة عارف المعلومة البسيطة دي وده بيطول عمر البيضات بصورة كبيرة جدا
ثم ان انا ذكرت موضوع تربيط العفشة كل فترة للسبب ده تحديدا وبكدة هاتتلافى المشاكل
نقطة الدركسيون أحب اصحح المعلومة ان العربية اساسا بتكون نازلة على الارض من المصنع وهي فيها البوش الواضح اللي في الدركسيون يعني مش حاجة مش موجودة وهاتجد على العربية لأن ده الطبيعي في اللادا وده مش عيب فيها على فكرة
انا كنت فاكر انه عيب في العربية لكن لما رحت لبتاع العفشة اول مرة طلبت انه يشوف قصة البوش ده فضحك وقالي ياأستاذ لو لغيت البوش ده الدركسيون مش هايلف معاك اساسا

[hack_storm]

المشاركة الأصلية كتبت بواسطة aslann عايز أعرف عيب في اللادا 2107 هل بتسخن وما هي حل مشكلة التسخين أن عندي واحد قريبي بيركب مروحة كابريس 8 ريشة ....أفيدوني

أخي الفاضل من المعروف عن اللادا انها بتسخن ولكن الحل بسيط جدا زي ما حضرتك ذكرت بتفك المروحة الكهربائية بالقميص بتاعها وتستغنى عنها وبتركب مروحة كابريس 8 ريشة على عمود طلمبة المية وبتلغي الترموستات اللي في الكوع
وبكدة تكون حليت مشكلتين غلسين شوية اولهم الترموستات اللي دايما يتحرق وثانيا البطارية اللي بتستهلك بسرعة بسبب المروحة الكهربائية
بس لو سمحتلي هاضيف اضافة خفيفة بتتعمل مع موضوع المروحة الكابريس
ممكن تجيب مروحة امام الريداتير ( مروحة سرابنتينة تكييف) ودي بتكون رفيعة وصغيرة وتركبها أمام الريداتير مش وراه وتوصلها بالترموستات بتاع الريداتير بدل المروحة القديمة ودي استهلاكها اقل للكهرباء واساسا هاتشتغل كخط تبريد تاني في حالة ان العربية سخنت منك وانت ماشي في وسط الزحمة لأن مروحة عمود طلمبة المية بتلف بعدد لفات عمود الكرنك فطبعا وانت في الزحمة بيكون عدد اللفات قليل وبالتالي العربية هاتسخن برضو.
انا عامل كدة عندي والعربية مش بتوصل حرارتها لل 80 ابدا

[acer]

الاخوة الاعزاء
انا معايا لادا2107 منذ اربع سنوات وعيوابها بالنسبه لية كالاتى
طلمبه الميه بتتغير كل سنه العربيه ناشفة ويمكن علاج دة بانك تعمل مناول للدريكسيون ودة مش غالى اى حد بتاع عفشه يقدر يعملها وبعدين لو سيادتك طويل القامه حيبقى عندك مشكله حتتطر انك تروح للسيروجى يهبط ليك قاعدة الكرسى وطبعا الابواب بتاعتها ثقيله
المميزات بقى الشنطه واسعة جدا والجنبه الخليفيه برضه واسعة قطع غيارها متوافرة ومش غاليه

[fanjary]

الأخوة الأعضاء والزوار والمراقبين المحترمين
ياجماعة الخير : أنا معروض عليا سيارة لادا 2107 روسي موديل 2006 مكيفة عدادها ماشي 171 ألف كيلومتر ولم تعمر من قبل ، أرجو من الأخوه الأعضاء والزوار الكرام ممن لديهم فكرة أو خبرة بهذه السيارات إفادتي عن مميزاتها وعيوبها ، وماهي المواضع التي يتم التركيز عليها عند الفحص ، والسعر المناسب إن أمكن ذلك ؟
وللجميع جزيل الشكر والإمتنان